"Liberalizacyja" skončycca 21-ha?

U Ženevie sprava jdzie da ŭklučeńnia Biełarusi ŭ tak zvany specparahraf Mižnarodnaj arhanizacyi pracy. Praściej kažučy, u čorny śpis. Pra heta paviedamiŭ medyjam lider Biełaruskaha kanhresu demakratyčnych prafsajuzaŭ Alaksandar Jarašuk.

U Švajcaryi čarhovy raz znachodzicca i delehacyja ŭładaŭ — Piatkievič, Kabiakoŭ dy inšyja. Tam ža i Kozik. Tearetyčna jon, jak i Jarašuk, musić być apanentam uradu ŭ pytańni abarony prafsajuznych pravoŭ. Nasamreč ža FPB razharnuła šalonuju aktyŭnaść u inšym kirunku. Navat pierastarałasia. Skandał z padrobkaj podpisaŭ pad čałabitnaj u MAP ("techničnaja pamyłka", pa versii FPB) tolki zhuściŭ niespryjalny fon.

Karaciej, usie sproby ŭładnych dy praŭładnych dziejačaŭ davieści Mižnarodnaj arhanizacyi pracy, što pravy prafsajuzaŭ u nas uźniatyja na ŭzornuju vyšyniu,— pośpiechu, zdajecca, nia majuć. Chacia hrošaj na kamandzirovačnyja Miensk nie paškadavaŭ. Jarašuk naličyŭ u aficyjnaj delehacyi až 22 persony. Dźvie futbolnyja kamandy :-) I, musić, zahadana kaśćmi lehčy, jak u finale mundyjalu!

Kali ž Biełaruś zapišuć u toj specparahraf, to Brusel, u svaju čarhu, najchutčej što ździejśnić abiacanaje — pazbavić krainu z 21 červienia preferencyjaŭ u handli z Eŭraźviazam. Pra realnaść hetaj perspektyvy śviedčyć i kaskad kazionna-badziorych zajaŭ vysokaha ajčynnaha čynavienstva: maŭlaŭ, nia nadta j napałochali! Nam ekspart dyversifikavać — jak raz plunuć! Jak zaŭždy, pra lohiku prapahanda nie kłapocicca. Bo paralelna dziaržaŭnyja medyi vybivajuć ślazu, davodziačy, nakolki baluča sankcyi biazdušnaj Eŭropy ŭdarać pa biełaruskich praletarach — strataj zarobkaŭ, pracoŭnych miescaŭ i h.d.

Tak ci inačaj, siužet z preferencyjami dasiahaje kulminacyi. U źviazku z hetym palitolah Valer Karbalevič navat sprahnazavaŭ datu skančeńnia našaj palityčnaj pseŭdaadlihi (a pakul što, darečy, vo vam novy akt humanizmu: pravaabaroncu Ščukina nie ŭpiakli za kraty, a tolki pakarali ŭnušalnym štrafam!).

Na dumku Karbaleviča, "liberalizacyja" skončycca mienavita 21 červienia. Pryčym niezaležna ad taho, jakoje rašeńnie prymie Eŭraźviaz. Kali krainu vyklučać z systemy handlovych preferencyjaŭ, dyk tutejšaje načalstva pakryŭdzicca i jašče macniej zakrucić šruby. Kali ž Brusel daść słabinu i Miensk atrymaje adterminoŭku, to tut taksama vyrašać, što demakratyčnyja reveransy bolej niepatrebnyja. Bo našto handlavacca sa słabakami?

Što ž, pravierki hetaj versii čakać niadoŭha. Zaznačym, adnak, što siońnia ŭ biełaruskich uładaŭ niama taho mocnaha rasiejskaha tyłu, jaki raźviazvaŭ ruki va ŭnutranaj palitycy i raźviazvaŭ jazyk u dačynieńniach z Zachadam niekalki hadoŭ tamu. Tak što, badaj, mahčymyja varyjanty hulni i paśla 21-ha.

• 0
• 0
• 0
• 0
• 0
• 0
• 0
• 0