Bohuś Bijatlanionak. Adkryćcio fanackaha sezonu

 sport

Adkryćcio fanackaha sezonu

Pieršy sioleta vyjezd Blue-White Gang
zakončyŭsia kryvavymi bojkami na navapołackich vulicach

Asnoŭny tuśniak fanataŭ mienskaha futbolnaha klubu «Dynama» vypraviŭsia ŭ darohuna navapołacki matč svajoj kamandy ciahnikom «Baranavičy—Połacak». Rasčaravaŭšysia ŭ spańni na siadzieńniach z draŭlanych došak u ahulnym vahonie ci, pa-prostamu, «abščaku», «dynamity» łazili pa vahonach, pili z pravadnicami harełku, uciakali ad miantoŭ, chavajučy ad supracoŭnikaŭ milicyi abaviazkovy fanacki atrybut — «razetku» (tak na fanackim słenhu mianujecca šalik). Usio ž pilnyja milicyjanty vysadzili ŭ Barysavie dy Voršy samych bujanistych.

Pałačanie ździŭlena pazirali na kupki chłapcoŭ ź bieła-błakitnymi šalikami, jakija švendalisia ŭ horadzie, hojsali kala Bahajaŭlenskaha saboru dy Śviatoj Safii, kupalisia ŭ krasavickaj Dźvinie.

Mirna papivajučy pradukcyju samych roznych biełaruskich brovaraŭ dy prymajučy soniečnyja vanny pad histaryčnymi harami, hości sa stalicy zaŭvažyli niejkich kazłoŭ, jakija brudna łajalisia, kidali śmiećcie ci prosta pa-chamsku ržali. Para «dynamitaŭ» padvaliła da viasiołaj kampanii. Vyśvietliłasia, što heta rasiejskija hościki z kaliści našaha Nievielu pryjechali pahladzieć na połackuju Safiju. Niejki mały maskalonak kinuŭ pustuju plašku z-pad koły ŭniz. I ledź sam nie palacieŭ za joju. Uratavała jaho ekskursavodka. Na šum źbiehlisia «dynamiki», jakija, zaŭvažyŭšy na adnym z rasiejskich haściej čyrvonuju majku «Spartaka», radasna pačali kryčać: «Miasa! Miasa! Chaču jeści!!!» dy akružyli źlakanaha «miaśnika». La Safii jašče peŭny čas čulisia vyhuki kštałtu «Žyvie Biełaruś biez Rasiei» abo «Maskali — dadomu!». A maleńki «spartač», vidać, pryvioz dadomu pad vokam akuratny suvenir ź Biełarusi.

Matč pačaŭsia atakami «Dynama». Adna ź ich u samym pačatku hulni zaviaršyłasia ŭziaćciem bramy haspadaroŭ. Ale vielmi chutka «Naftan» zabiŭ hoł u adkaz. U dalejšym lik nie źmianiŭsia, chacia navapałačanie mieli šancy na toje, kab atrymać svaju pieršuju ŭ historyi pieramohu nad «Dynama».

Jak tolki mienskija fanaty razharnuli svaje šmatlikija transparanty dy ŭsimi tryma sotniami harlakoŭ (padjechali jašče aŭtobusy z zaŭziatarami) pačali skandavać «Dynama! Dynama!», z boku navapałačanaŭ paniesłasia brudnaja łajanka dy niejmaviernyja źniavahi na adras fanataŭ dy ichnaha klubu.

Varta skazać, što dobraja pałova navapołackich amataraŭ futbołu (tolki nie fan-klub «Naftana» — ź imi ŭ «dynamikaŭ» vydatnyja adnosiny) hłušać pad čas hulni mocnyja napoi. A nichto ž nie zabaraniaje! Milicyjantaŭ na ŭvachodach niama — niasi, što chočaš. Nu, a kali za ŭvachod taksama nia treba płacić, dyk možacie ŭjavić, u jakoj kandycyi siadzić bolšaść publiki na «Atlancie».

Źniavahi ŭ svoj bok mienčuki tryvali niadoŭha — nieŭzabavie navapałačanie pačuli družnaje «Dušy kałhas!». Pačali raspalvacca lakalnyja kanflikty, da mardaboju, adnak, sprava ŭ časie hulni nie dajšła.

Jon pačaŭsia praz kolki chvilaŭ paśla zakančeńnia matču. Kali «dynamaŭcy» vychodzili sa stadyjonu, uźnikła pieršaje žorstkaje sutyknieńnie pamiž mienskimi fenami dy miascovaj hapatoj. Bojku pierapynili milicyjanty, jakija zamiest taho, kab adkanvajavać mienčukoŭ na vakzał dy pasadzić u aŭtobusy, prosta adahnali haściej na paru socień metraŭ. Paśla byli zatrymanyja kala 30 fanataŭ, astatnich pahnali dalej, raśsiejvajučy. Kali tyja byli raźbityja na kupki pa 3—5 čałaviek, u spravu znoŭ ustupiła navapołackaja hopnickaja bracija. Jany bryhadami pa niekalki dziasiatkaŭ čałaviek, jak šakały, łavili žmieńki mienčukoŭ dy źbivali, navat nie šukajučy nijakich začepak. Takoha futbołu ŭ Navapołacku, mabyć, advieku nie było: kryk i tupat vakoł stadyjonu nie ścichali da ranku.

Viartańnie było cichaje dy spakojnaje. Dadomu «dynamity» jechali stomlenyja, biaz hrošaj dy chaŭčyka. Ranišni Miensk sustreŭ ich soniejkam dy zusim niekryvažernymi ziemlakami.

Bohuś Bijatlanionak,
Miensk—Navapołacak—Miensk