Taciana Śnitko. Apaznańnie ekstremista

Apaznańnie ekstremista

U piatnicu, paśla apublikavańnia hetaha zdymku ŭ hazecie “Naša Svaboda”, pravaabaroncam stała viadomym imia adnaho ź ludziej u milicejskaj formie, jakija kamandavali zachopam zdymačnych hrup ORT i RTR na vuł.Čyrvonaj u Miensku 25 sakavika. Pra heta karespandentu “NN” paviedamili ŭ mienskim haradzkim adździaleńni Biełaruskaha Hielsynskaha Kamitetu. Praŭda, pradstaŭniki BHK ličać, što źviestki patrabujuć dadatkovaha spraŭdžvańnia i tamu pakul što nie padlahajuć abnarodavańniu.

Padziei Dnia Voli ciapier abmiarkoŭvajucca ŭ zalach sudu Centralnaha rajonu stalicy dziakujučy dvum mienčukam – Hienadziu Mironavu i Alehu Proninu, jakija 25 sakavika apynulisia ŭ liku niekalkich socień zatrymanych milicyjaj hramadzianaŭ. Idučy ŭdvoch pa Čyrvonaj na Kamaroŭski rynak, mužčyny raptam ubačyli, jak “achoŭniki paradku” dahaniajuć, a potym źbivajuć teleaperatara. Aleh Pronin padniaŭ kryšku kamery, jakaja adlacieła, kali napadniki stali adbirać jaje, i siabry zapytali milicyjantaŭ, navošta źbivać čałavieka, jaki vykonvaje svaje słužbovyja abaviazki. “Upalavaŭšy” rasiejskich žurnalistaŭ, kamandavańnie hrupy zachopu, vidać, paličyła śviedkaŭ-minakoŭ zanadta cikaŭnymi. Pronina j Mironava dahnali, schapili zzadu i pačali nanosić im udary dubinkami i nahami. Tut padyjšoŭ pałkoŭnik, jaki kamandavaŭ hetaj “začystkaj”. Na pytańni zatrymanych ab padstavie ich hvałtoŭnaha zatrymańnia pałkoŭnik zahadaŭ siadać u mašynu i jechać tudy, dzie cikaŭnym “usio rastłumačać”. U tym miescy, dzie “ŭsio tłumačać”, 25 sakavika pabyvała i aŭtarka hetych radkoŭ – im akazaŭsia ŭžo znakamity anhar u vajskovaj častcy pa vulicy Majakoŭskaha.

H.Mironava i A.Pronina adpuścili tolki pad viečar — vyvieźli za horad na vialikaj chutkaści dy vykinuli na kalcavoj darozie za Čyžoŭkaj. “…Našaje zatrymańnie i źbićcio potym tranślavałasia praz telebačańnie. Majo dzicia, pabačyŭšy pieradaču, stała pytacca, što kiepskaha ja zrabiŭ, bo milicyja źbivaje tolki bandytaŭ”, — raspaviadzie potym Aleh Pronin sudu. Aŭtary skarhi prosiać sud spahnać z adkazčykaŭ-supracoŭnikaŭ MUS 1 miljon rubloŭ za naniesienuju maralnuju škodu.

Sudovy praces pa hramadzianskaj spravie, adkazčykami ŭ jakoj vystupajuć čaćviora pradstaŭnikoŭ vajskovaj častki 5448 (mieścicca pa vuł. Majakoŭskaha), pačaŭsia jašče ŭ pieršaj pałovie žniŭnia. Za hety čas, adnak, sudom nia tolki nie pryniata nijakaha rašeńnia pavodle skarhi Mironava j Pronina – faktyčna ŭ hetaj spravie prajšło tolki adno paŭnavartasnaje pasiedžańnie.

Chranalahična heta vyhladaje davoli cikava. Pieršaje pasiedžańnie było pryznačanaje jašče na 10 žniŭnia. Častka pradstaŭnikoŭ v/č 5448 u sud nie źjaviłasia, a tyja, što pryjšli, zajavili, što nie hatovyja da pracesu, i paprasili čas na vyvučeńnie materyjałaŭ spravy. Sud adnaviŭsia 24 žniŭnia, i paśla hetaha praces pačaŭ niezrazumieła zaciahvacca. Niezrazumieła, bo ŭ tych, chto padaŭ u sud, miełasia i videastužka padziejaŭ, i aŭdyjozapis, i fotazdymki ludziej, jakija rabili napad ci kiravali im, i numar mašyny, na jakoj ich vieźli za betonny płot vajskovaj častki.

Pavodle słovaŭ advakata paciarpiełych Andreja Atamančuka, jon byŭ vielmi ździŭleny, kali paźniej daviedaŭsia pra źmieny ŭ pratakole pieršaha pasiedžańnia sudu. U pratakole čamuści značyłasia, nibyta baki pažadali spynić raźbiralnictva, što nijak nie adpaviadała sapraŭdnaści.

Razhlad skarhi mieŭsia praciahvacca 11 vieraśnia ŭ druhoj pałovie dnia. Ale sudździa Jeśman niečakana zachvareŭ. Nastupnaje pasiedžańnie, pryznačanaje na 21 vieraśnia, taksama sarvałasia. Składajecca ŭražańnie, što pradstaŭniki Femidy vyrašyli zamiać spravu, bajučysia brać na siabie adkaznaść za jaje dalejšaje raźvićcio. Bo jurydyčnyja pradstaŭniki adkazčykaŭ u hetaj spravie prypierli, što nazyvajecca, da ścienki svaimi pakazańniami i sudździu, i tych, kaho sami chacieli vyharadzić pierad zakonam.

Jak skazaŭ sudu Aleh Marchocki, načalnik słužby pravavoha zabieśpiačeńnia vajskovaj častki 3404, zatrymlivali ludziej u Dzień Voli (Pronina j Mironava – u pryvatnaści) zusim nie supracoŭniki milicyi. “Mahčyma, heta byli ekstremisty ci złačynnyja elementy, jakija sprabujuć dyskredytavać milicyju, — zajaviŭ A.Marchocki. — Ja śćviardžaju, što heta byli nie rabotniki milicyi. Pry praviercy my nie zmahli vyznačyć koła asobaŭ, jakija ich (Pronina j Mironava — T.S.) zatrymlivali”. Da taho ž “ukazanaja mašyna UAZ-0625 u MUS nie isnuje”. Chaciełasia b być naiŭnym i pavieryć, što naša milicyja prosta pryznałasia ŭ svajoj biezdapamožnaści!..

U sp.Marchockaha jość versija, jak kankretna złačynnyja elementy mahli “padstavić” biednaje MUS. Niezakonna zatrymanych “mahli pryvieźci da punktu zboru i tam pieradać ludziam, jakija nie vałodajuć infarmacyjaj. Tamu nie byli składzienyja pratakoły”. Takim čynam, adkazčyki pryznali, što ŭ vypadku ź Mironavym i Proninym zamiest supracoŭnikaŭ MUS byli padstaŭnyja asoby, hetak moviačy, iłžemilicyjanty. Heta moh zrabić chto zaŭhodna. U nas vielmi šmat złačynstvaŭ apošnim časam učyniajecca ludźmi, adzietymi ŭ milicejskuju formu. Takaja forma pradajecca na rečavym rynku “Ždanovičy”.

Dalej Marchocki kaža, što pałkoŭnika na pradastaŭlenym istcami fotazdymku (kiraŭnika zachopu ludziej 25 sakavika) jon nia viedaje. “Złačynnyja elementy” ŭ milicejskaj formie, jakija, pavodle Marchockaha, nie pracujuć u milicyi, nie byli, adnak, abvieščanyja ŭ vyšuk: zakon patrabuje papiarednie ŭzbudzić suprać ich kryminalnuju spravu.

I voś tut, pry pieršym ža dotyku da temy kryminalnaj spravy suprać “hierojaŭ” 25 sakavika, pačałasia vialikaja błytanina adkazčykaŭ. Spačatku jany asprečvali fakt naniasieńnia zatrymanym cialesnych paškodžańniaŭ; potym uvohule zajavili, što Pronina j Mironava nichto nie zatrymlivaŭ. (Cikava, čyj ža zachop tady pakazvała televizija?).

Kiraŭnictva BHK źviarnułasia ź listom da staršyni KDB U.Mackieviča. Hałoŭny biełaruski čekist musić razabracca, čamu pa krainie hulajuć mažnyja dziadźki ŭ plamistych strojach z pahonami pałkoŭnikaŭ, tvoračy biezzakońni ad imia siłavych strukturaŭ. I, hałoŭnaje, chto jany, hetyja dziadźki, takija. Mahčyma, u krainie isnuje niezakonnaje zbrojnaje farmavańnie, zamaskavanaje pad milicyju.

Taciana Śnitko