Słava nieŭmiručym
“Ja naradziŭsia na hetaj ziamli, heta maja ziamla, tut ja i pamru, čaho b heta mnie ni kaštavała”, — zajaviŭ svaim žurnalistam u Babrujsku Alaksandar Łukašenka, kamentujučy sytuacyju z mažlivym nadańniem palityčnaha prytułku Słabadanu Miłošaviču. Łukašenka ličyć, što padobnuju pazycyju maje j Miłošavič.
Na hetaj supercytacie možna było b i spynicca, ale tema śmierci atrymała niečakany praciah na nastupny dzień užo ŭ Miensku, dzie adznačali 20-hodździe aŭtakatastrofy, u jakoj zahinuŭ Piotra Mašeraŭ.
“Piotra Mašeraŭ – pieršy sakratar CK kampartyi Biełarusi, Hieroj Savieckaha Sajuzu, Hieroj Sacyjalistyčnaje Pracy, jaki dahetul zastajecca ŭ krainie adnym z najbolš papularnych hramadzkich dy palityčnych dziejačoŭ respubliki”, -- paviedamiła blizkaja da Łukašenki ahiencyja “Interfaks-Zapad”.
Mahčyma, Mašeraŭ jašče žyvie i ŭznačalvaje treciuju biełaruskuju kampartyju? Mo jon sapraŭdy zastajecca ŭ niejkaj krainie, jakuju interfaksaŭcy ad nas chavajuć? A moža, jany majuć na ŭvazie, što paśla Vialikaha Kniastva Litoŭskaha, polskaje dy rasiejskaje manarchijaŭ, peryjadu respubliki (BNR—BSSR—RB) nastaŭ čas dyrektoryi? Pytańni, pytańni…
Ale ŭsio taja ž ahiencyja ŭžo ŭ nastupnym skazie paviedamlaje jašče cikaviejšuju navinu, jakuju my pakiniem biez kamentaru: “Aprača taho, kiraŭnik biełaruskaje dziaržavy pačciŭ pamiać... na mahiłach vybitnych dziaržaŭnych dy hramadzkich dziejačaŭ Biełarusi — Fiodara Surhanava, Siarhieja Prytyckaha, Cichana Kisialova, Vasila Kazłova”.
U hutarcy na mohiłkach z padručnymi žurnalistami Łukašenka zajaviŭ, što “siońnia dla Biełarusi jość važnym zachavańnie pierajemnaści pakaleńniaŭ” i dadaŭ: “My mieli dobrych kiraŭnikoŭ i treba zaŭsiody pavažać svaich papiarednikaŭ”.
Jakraz u hety dzień stała viadoma, što pieršy kiraŭnik niezaležnaje Biełarusi Stanisłaŭ Šuškievič, jaki atrymlivaje ciapier pensiju 3 dalary na miesiac i na jakoha mienskaja milicyja raspačała paśla “Maršu Svabody” sapraŭdnaje palavańnie, vyrašyŭ padać u sud pazoŭ na Łukašenku, bo toj źvinavaciŭ eks-śpikiera dy ŭsich udzielnikaŭ biełavieskaje sustrečy 8 śniežnia 1991 hodu ŭ atrymańni “miljardaŭ dalaraŭ” za skasavańnie SSSR.
Adnak vydzielenyja ŭ papiaredniaj cytacie słovy nabyvajuć asablivy sens, kali pračytać apošni skaz u infarmacyi “Interfaksa-Zapada”: “Jak paviedamiŭ Prezydent krainy, jon navažany ŭ najbližejšy čas aznajomicca z archiŭnymi dakumentami ŭ spravie trahičnaje hibieli Piatra Mašerava”.
Z čaho b heta? Hladzi pačatak…
Źmicier Kalaradzki
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty27
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)77
Kamientary