Medyi

 Medyi

Dyplamaty!

Vice-premjer dy ministar zamiežnych spravaŭ Michał Chvastoŭ vyjšaŭ na teleekran, i heta była “Padzieja”. Pramaŭlaŭ jon pa-rasiejsku, chacia biełaruskuju viedaje niabłaha. Ale ž pytańni “dziažurnalista” BT byli rasiejskamoŭnymi, tamu darujem ministru. Jak toj kazaŭ — miali, Mialeška, tvaja lapieška.

Mialeška spytaŭsia Chvastova, ci nie šukaje Maskva svajho novaha staŭlenika pierad biełaruskimi prezydenckimi vybarami. Ministar adkazaŭ, što z razmovaŭ z rasiejskim kaleham Ivanovym takoha nie adčuŭ, a potym uziaŭ dy zajaviŭ: “Pa-mojmu, vynik prezydenckich vybaraŭ — jon zrazumieły”.

Tut i prahrama skončyłasia: vo što značyć sapraŭdny prafesijanalizm! Pieramoža Łukašenka – Chvastoŭ skaža, što navat u ciažkija časy nizkaha rejtynhu prahnazavaŭ dy kavaŭ pieramohu. A prajhraje – možna budzie zajavić, što jašče ŭ studzieni pradbačyŭ haniebny zychod dyktatury.

Źlataŭšy ŭ Maskvu samastojna dy raspavioŭšy pra heta ŭ “Padziei”, praz tydzień sp.Chvastoŭ – kab nie pajści na pryjom da kiraŭnika KNH ABSE ŭ Miensku Hansa-Hieorha Vika — palacieŭ tudy ž razam z Łukašenkam adkryvać dni kultury Biełarusi, što finansavalisia hazavaj firmaj “Itera”, dzie ciapier pracuje prosty biełarus Ivan Ciciankoŭ.

BT nie abmiežavałasia pakazam taho, što razam ź ministram kultury Rasiei Švydkim dy kiraŭnicaju MCHATu Daroninaj taki samy medal Franciška Skaryny atrymaŭ prosta kulturny j vielmi dyplamatyčny čałaviek Ihar Makaraŭ, prezydent “Itery”. Užo ŭ pieršym repartažy z Maskvy ab prylocie Łukašenki bujnym planam prademanstravali žurnaliscki blaknot z symbolikaju “Itery”. Heta ledź nia pieršy vypadak na BT, kali schavanuju telereklamu, ci, pa-maskoŭsku, “džynsu”, ustavili ŭ aficyjny siužet pra Łukašenku.

Jašče adna piaraŭskaja akcyja atrymałasia na nastupny dzień. U “Panaramie” paśla kadraŭ, dzie pakazvali, jak na ŭvachodzie ŭ Ministerstva ŭnutranych spravaŭ lažyć źbity achovaju žurnalist Valery Ščukin (choć kamentar byŭ prosta haniebny dla kalehi-žurnalista, adnak narmalny dla novaha słužboŭca BT Jurki Prakopava), pajšoŭ čarhovy siužet Aleny Ładućki z Maskvy. Jak zaŭsiody, BT skrała videakarcinku z RTR, zamazaŭšy lahatyp apošniaha, a sama Ładućka vieraščała telefonam – jak zaŭždy, pa-rasiejsku. Napeŭna, hrošaj na narmalny telepierahon z bratniaje Maskvy nie chapiła. Ale ž dyktarka Łarysa Hryńko znajšła vyjście: pryniesła prabačeńnie za jakaść huku, što mahła być lepšaj, dy patłumačyła: “Prosta Alena Ładućka pieradavała pa telefonie”.

A to my dumali — pa faksie (prostym abo inter-...) ci praz pejdžer. Dyplamatku Hryńko nie pierarobiš.

Aściarožna – transformery!

Prykolnaja hazeta “Sovietskaja Biełoruśsija” maje nia tolki prykolnuju nazvu, ale j vartyja jaje zahałoŭki. “Hondoły na prikole” – pra spynieńnie ruchu na kanałach Venecyi. Abo pieršapałosnyja zahałoŭki pad adnoj rubrykaj “V stranie”, kali ich čytać nie paasobku, a zapar. Skažam, “Ostorožno – miaso! Čistaja rabota – Raznyje sud́by”. Abo jašče: “Doma-transformiery. S točnosťju do hradusa – Śmierť v podvale”. Pobač na pieršaj staroncy interviju z vybarkamaŭkaj Jarmošynaj: nad jejnym fota – słovy “Chočieš – značit možieš!” Na druhoj staroncy taho ž numaru za piatnicu – fatazdymak čarhi ŭ abmienny punkt dy zahałovak: “Finansy nie lubiat sujety”.

Da “bratanskaj” ambasady!

Cikavaja linhvistyčnaja znachodka atrymałasia ŭ kiraŭnika presavaha centru Prakuratury Biełarusi Alaksieja Taranava dy hazety “Čyrvonaja źmiena”. Paviedamleńnie pra troch žycharoŭ Połacku, jakim inkryminujecca arhanizacyja ŭzbrojenaje bandy razam z čatyrma žycharami Rasiei, maje zahałovak: “Razam z “bratanskaj” Ruśsiu”.

Pa-pieršaje, ciapier jość himn novych biełarusaŭ, što intehrujucca z novymi rasiejcami: “My, biełarusy, z bratanskaju Ruśsiu...” A niedzie ŭ siaredzinie tekstu – radki “Ale ad tajhi da “bratanskich” da moraŭ Pinžak naš čyrvony j kruty noraŭ”.

Pa-druhoje, kali vy ŭ časie demanstracyi apazycyi pačujecie zaklik “Da “bratanskaj” ambasady!”, heta nia značyć, što treba jści da anhielcaŭ na Marksa, 37. Na ŭvazie majecca rasiejskaja ambasada na Staravilenskaj, 48.

Merski alkahalizm dy prychadni z kosmasu

Daścipnyja žurnalisty pracujuć u hazecie “Viečiernij Minsk”, što nibyta vydajecca na rasiejskaj dy biełaruskaj movach, kali vieryć štodzionnamu nadpisu ŭ kancy apošniaje staronki. Pad rubrykaj “V Minhorispołkomie” nadrukavali zahałovak “Počiemu ludi ṕjut i prohulivajut?”. A pobač — interviju z dyrektaram “Mienskich televizijnych infarmacyjnych sietak” Ju.Vasileŭskim.

Pytańnie žurnalista: “Vy kazali pry našaj sustrečy ŭ pačatku 2000 h., što kaśmičnyja prychadni ŭvajšli ŭ 150—160 tys. kvateraŭ mienčukoŭ roznych rehijonaŭ horadu. A što majem siońnia?” Adkaz: “Kabelavana kala 190 tys. kvateraŭ mienčukoŭ”.

Źmicier Kalaradzki

Perliny «Biełorusskoj haziety»

Uładzimier Vałanin u «Biełorusskoj hazietie» rašuča padtrymlivaje ideju vyłučeńnia Kramlom Uładzimiera Mackieviča ŭ jakaści kandydata ŭ prezydenty Biełarusi. Analizujučy roznyja aspekty takoha varyjantu, jon pry kancy zadumvajecca i pra toje, jak pastavicca da takoha vyłučeńnia niezaležnaje biełaruskaje hramadztva. «Nakoniec, v-piatych - otnošienije k Mackieviču miestnoj oppozicii. Poniatno, čto «nievmieniajemyje» tut žie načnut istieričieski vopiť o kahebiešnom zahovorie. S ostalnymi žie vpołnie možno dohovoriťsia», — piša jon tak, kab być zrazumiełym dla svaich maskoŭskich čytačoŭ. Cikava tolki, čamu jahonaje vydańnie dahetul nazyvajecca «Biełorusskoj», a nie «Miestnoj hazietoj»?

Lonik Kinkiel