Na vajnie suprać Ukrainy zahinuŭ adzin z samych vysokapastaŭlenych pierabiežčykaŭ — hienierał-major, były načalnik departamienta SBU

Hienierał-major Uładzimir Lapkin zajmaŭ u SBU pasadu načalnika departamienta apieratyŭnaha dakumientavańnia. Jak piša prarasiejski palityčny dziejač Aleh Caroŭ, u jaho śfieru adkaznaści ŭvachodziŭ «niabačny bok pracy SBU — prasłuchoŭvańnie, vonkavaje nazirańnie, zbor infarmacyi».

Zvańnie hienierał-majora Lapkin atrymaŭ u 2013 hodzie. Tady ž jon asabista ŭdzielničaŭ u razhonie pratestaŭ na Majdanie, śćviardžaje Caroŭ.

«U samyja vostryja momanty pratestaŭ jamu davodziłasia ŭstupać u pramyja fizičnyja sutyknieńni, i ŭ takich situacyjach jon nie chavaŭsia za śpinami padnačalenych, a išoŭ napierad sam, pakazvajučy prykład», — napisaŭ jon.

U lutym 2014 hoda, adrazu paśla pieramohi pratestujučych, Uładzimir Lapkin byŭ zvolnieny z SBU ŭ liku inšych vysokapastaŭlenych aficeraŭ.

Były aficer uciok u Rasiju i pasialiŭsia ŭ anieksavanym Krymie.

Paśla pačatku vajny i akupacyi Chiersona Uładzimir Lapkin atrymaŭ pasadu namieśnika kiraŭnika «Dziaržaŭnaj słužby biaśpieki Chiersonskaj vobłaści» — pa formie ŭłasnaści heta była «dziaržaŭnaja kazionnaja ŭstanova» i zajmała budynak Haspadarčaha suda Chiersonskaj vobłaści. Zasnavalnikam «Dziaržbiaśpieki» staŭ były načalnik Lapkina pa SBU — Alaksandr Jakimienka, kiraŭnik ukrainskaj śpiecsłužby sa studzienia 2013 pa luty 2014 hoda, jaki taksama ŭciok u Rasiju.

U 2025 hodzie SBU paviedamiła pra padazreńnie ŭ kałabaracyjnaj dziejnaści ŭ dačynieńni da Uładzimira Lapkina. Pavodle viersii śledstva, jon u jakaści namieśnika načalnika i v.a. načalnika «Dziaržaŭnaj słužby biaśpieki» zajmaŭsia «filtracyjnymi mierapryjemstvami» i represijami suprać mirnaha nasielnictva. SBU ličyć, što paśla farmalnaj likvidacyi «Dziaržaŭnaj słužby biaśpieki» jaje pravapierajemnicaj stała ŭpraŭleńnie FSB pa akupavanaj Chiersonskaj vobłaści.

Aleh Caroŭ śćviardžaje, što hienieralskaje zvańnie Lapkina «de-fakta zachavałasia: jon tak i zastavaŭsia dla ŭsich hienierał-majoram užo rasijskich śpiecsłužbaŭ».

U publičnych ukazach «Miedyjazona» nie znajšła zhadak pra prysvajeńnie Uładzimiru Lapkinu zvańnia hienierał-majora FSB ci jakoj-niebudź inšaj siłavoj struktury.

Uładzimir Lapkin zahinuŭ 17 sakavika 2026 hoda. U poście Aleha Carova havorycca, što jon słužyŭ u atradzie «Bars-33» pad pazyŭnym «Batyj». Pra stvareńnie dobraachvotnickaha «bataljona im. Vasila Marhiełava» abviaściŭ akupacyjny kiraŭnik Chiersonskaj vobłaści Uładzimir Salda ŭ 2023 hodzie.

4 krasavika 2026 hoda ŭ padmaskoŭnym Nachabinie prajšło pachavańnie 59‑hadovaha eks-pałkoŭnika MNS Eduarda Małava. Na žałobnych stužkach było napisana «ad kamandzira i asabovaha składu «Bars-33». Małaŭ, jak i Lapkin, zahinuŭ 17 sakavika 2026 hoda.

U «UKantakcie» taksama byŭ apublikavany niekrałoh, pryśviečany śmierci dvaich vypusknikoŭ Taškienckaha vyšejšaha ahulnavajskovaha kamandnaha vučylišča — Eduarda Małava i Uładzimira Lapkina, abodva skončyli vučylišča ŭ 1989 hodzie.

• 28
• 0
• 6
• 0
• 0
• 0
• 0
• 0