Prapahandysty spytali ŭ biełarusaŭ, ci nie varta ŭ krainie zabłakavać YouTube
Prapahanda, aburanaja błakavańniem kanałaŭ Biełty, ANT, STB, pajšła spytać u haradziencaŭ, ci nie varta ŭ adkaz zakryć YouTube u krainie. Kali mierkavać pa adkazach tych, kaho pakazali ŭ videa, ludzi ličać, što heta nie zrobić asablivych prablem — «Ja prablemy ŭvohule nie baču».
Kali mierkavać pa apytancy, biełarusy nie tak užo časta vykarystoŭvajuć YouTube dla prahladu videa. A ŭ vypadku błakavańnia servisu spakojna piarojduć na jaki-niebudź alternatyŭny ajčynny videachostynh.
— Ščyra, ja vykarystoŭvaju šmat inšych płatformaŭ, akramia zamiežnych. Pa bolšaj častcy — heta ajčynnyja płatformy, — kaža chłopiec.
— To bok, kali jutub zabłakujuć u Biełarusi, vy b zmahli pierajści na inšuju prahramu?
— Tak, jość mnostva inšych prahram, — adkazvaje surazmoŭca.
Jutubam jon amal nie karystajecca. Što za ajčynnyja płatformy zamianili jamu jutub, chłopiec nie tłumačyć.
Stałaja žančyna havoryć, što słuchaje na jutubie pierad snom apaviadańni.
— Kali prybiaruć YouTube, napeŭna, apaviadańniaŭ nie budzie? — vykazvaje jana škadavańnie.
— A zmahli b u inšuju prahramu pierajści, kali jaje stvorać — voś čysta biełaruskuju? — fantaziruje karespandentka.
— Kali budzie takaja samaja, zmahu, viadoma, — adkazvaje žančyna.
Druhaja žančyna taksama karystajeciesia jutubam, «ale nie časta».
— Hladžu chakiej, u mianie dzicia hulaje, — kaža jana.
— Nie dumajecie, što biełarusam varta ŭvohule admovicca ad płatformy YouTube, kali jany błakujuć asnoŭnyja biełaruskija ŚMI?
— Ja nie tak časta karystajusia, tamu, u pryncypie… Nu čamu i nie?
— To bok vy ŭ hetym prablemy nie bačycie?
— Ja prablemy ŭvohule nie baču, — adkazvaje žančyna.
Maładaja dziaŭčyna taksama nie suprać, kab zabłakavać jutub.
— U cełym ja nie suprać, staŭlusia da hetaha stanoŭča, bo treba prasoŭvać biełaruskija płatformy, — kaža jana pra niejki biełaruski jutub.
A voś apošni chłopiec zasumniavaŭsia.
— Ci nie dumajecie vy, što biełarusam uvohule varta admovicca ad YouTube, kali jany błakujuć našy aficyjnyja ŚMI? — pytaje karespandentka.
— Nu… składanaje pytańnie.
— Vy časta jutub hladzicie?
— Davoli časta, ale chutčej słuchaju muzyku ŭ im. Kali jaho zabłakujuć, to, chutčej za ŭsio, užo pierajdu na inšyja płatformy, — adkazvaje chłopiec.
U kamientarach u treds — abureńnie.
«Žeść. Doŭha šukali hetych ludziej?»
«Jakija heta «aciečastviennyja» płatformy pa bolšaj častcy hety vypadkovy žychar Hrodna vykarystoŭvaje? I adkul jon viedaje, što zabłakavali kanały, pra isnavańnie jakich jon daviedaŭsia tolki što?»
«Jaki sens błakavać płatformu, na jakoj vielizarnaja kolkaść karysnaha videamateryjału? Tam i navučańnie, i instrukcyi, i jość błohi sapraŭdy cikavych ludziej. Pierš čym błakavać, varta padumać, čym vy zamienicie heta ludziam. Za hetyja kanały na hetaj płatformie naohuł poch**, ich tam nichto nie hladzieŭ. CA nie tam, jana ŭ zambiravanych skryniach».
«Jakija ajčynnyja płatformy, nu surjozna, samim nie śmiešna?»
«Kryndžovy vidos z akciorami».
«I respandentam spačuvaju, i tym, chto zdymaŭ, bo ad kryndžu, napeŭna, pamirali ŭsie».
«Nie viarzicie łuchtu. Nivodzin razumny čałaviek nie choča błakiroŭki jutub».
«Tam kantent rabiŭsia dziesiacihodździami. Užo jość na prykładzie braterskaja Rasija, dzie «paśpiachova» zamianili na ajčynnaje. Chočaš zamianić detal u mašynie, razabrać noŭtbuk, pyłasos ci zrabić doma elektrapravodku samomu — kali łaska na jutub. Heta jak zakryć zaŭtra ŭsie biblijateki ŭ krainie».
«Možna padumać, što apytańnie idzie niedzie ŭ Rasii. Što tut jašče možna dadać…»
«Dyk pakažycie astatnich 90% apytanych».
«Apytańnie pad dułam pistaleta».
«Vy končanyja, zrabicie choć apytańni sumlennymi, a nie padtasavanymi, usim zrazumieła, što nichto nie zdymie realnuju karcinu, chopić zabaraniać usio zapar, zadrali vy ŭžo. Prykład z Rasii brać nie varta, drenna skončycca. Dajcie ludziam spakojnaje žyćcio. Błakujučy — robicie horš tolki sabie i hramadzianam, sami ž nyjecie, što demahrafija admoŭnaja, ale pry hetym adny zabarony. Nach*r kamu treba tut naradžać vam, kab prabatračyć usio žyćcio za zasłonaj. Ludzi śviet ubačyć chočuć, a nie radavacca zabaronie čarhovaj».
«Pazoryšča».
«Vydatnaja statystyka. Adzin čałaviek nie karystajecca — zabłakujuć dla ŭsioj krainy. TRK Hrodna, ja pra vas nie viedaŭ i zusim nie škaduju».
Kamientary
[Zredahavana]