Aleś Kudrycki. Sprava Žukaŭca

Sprava Žukaŭca

Ci byŭ bahatyr maładafrontaŭcam?

8 lutaha ŭ Biełastoku zatrymali 30-hadovaha Andreja Žukaŭca. Jak borzda paviedamiła rasiejskaje ahienctva ITAR-TASS, jon “źjaŭlajecca siabrom Maładoha Frontu”, a aryštavali jaho “za nieviartańnie kredytu pamieram 700 tys. dalaraŭ”. Vo tabie, maješ: niaŭžo pamiž nas žyvuć užo patryjoty-miljanery, z kašalkom dastatkova toŭstym, kab, jak maryŭ Maksim Harecki, “kupić usiu Vilniu dla biełarusaŭ”?

Mienski biznesoviec Žukaviec źjechaŭ u 1998 h. u Polšču, kab atrymać palityčny prytułak. Nieŭzabavie biełaruskija “orhany” nakiravali zapyt u Interpoł z patrabavańniem zatrymać Žukaŭca. Padstava – nieviartańnie kredytu. Tady ž mahiloŭski palituciakač Jaś Abadoŭski, jaki atabaryŭsia ŭ Biełastoku raniej, staŭ prasić roznyja arhanizacyi, kab tyja zaśviedčyli, što na baćkaŭščynie Žukaviec zmahaŭsia za demakratyju, praŭdu i niezaležnaść Biełarusi. Žadanyja rekamendacyi Žukaŭcu na atrymańnie palityčnaha prytułku dali ŭ 1999 h. Małady Front i Mahiloŭski Pravaabarončy Centar, jakim kiruje baćka Ja.Abadoŭskaha — Siarhiej. Razam z MF Žukaviec padbaŭ pra zaruki Narodnaha Ruchu Ŭkrainy.

U Biełarusi firma Žukaŭca vyrablała darožnyja znaki i reklamnuju pradukcyju – heta jahonaj vytvorčaści śvietłavyja reklamy “Biełarusbanku” i “Biełprambudbanku” vitali haścioŭ stalicy na budynkach Pryvakzalnaj płoščy ŭ Miensku. Pavodle inšych źviestak, jahonaja firma vykonvała 70% darožnych znakaŭ stalicy. Pracavała ŭ joj u momant najbolšaha roskvitu da 100 čałaviek.

Ci źjaŭlaŭsia Žukaviec maładafrontaŭcam? Nie, siabrom MF jon nia byŭ, ale ŭ palityku anhažavaŭsia dosyć aktyŭna. Mienavita hetym kiravalisia lidery MF, dajučy jamu rekamendacyju. Žukaviec udzielničaŭ u vuličnych akcyjach u 1997—98 h. Dapamahaŭ jon niezaležnikam i pa emihracyi ŭ Polšču: mienavita na jahonyja hrošy ŭdałosia vypuścić ulotki da letašniaha Dnia Voli.

Dziejnaść Žukaŭca ŭ Polščy była źviazanaja z reklamaj i kamputarami. Razam ź im u Biełastoku žyvuć jahonaja žonka i 5-hadovy syn Andrej. Na hety momant Žukaviec znachodzicca pad vartaju, i ŭ bližejšyja niekalki tydniaŭ vyrašycca pytańnie pra jahonuju vydaču. Biełaruskamu boku dali čas, kab dasłać usie adpaviednyja papiery. Pavodle biełaruskaha zakanadaŭstva, Žukaŭcu pahražaje źniavoleńnie na termin ad 7 da 15 hadoŭ. Status Žukaŭca na momant zatrymańnia zastavaŭsia niavytłumačany — pytańnie pra nadańnie jamu palityčnaha prytułku vyrašałasia mienavita ŭ hety čas.

Pavał Sieviaryniec pryznajecca, što nia viedaje ŭsiaho ab pradprymalnickaj dziejnaści Žukaŭca, nia maje poŭnaje infarmacyi, ale, kaža, što jamu vidavočna, što siońniašniaja biełaruskaja pravaachoŭčaja systema nia zdolnaja abjektyŭna j spraviadliva raźbiracca ŭ ekanamičnych złačynstvach. Małady Front miarkuje, što ŭ hetaj spravie lepš raźbiracca ŭ Polščy, ale nie ŭ Biełarusi, tamu i dasłaŭ adpaviedny list u polskija kampetentnyja orhany. Bo z tym kredytam ciomnaja historyja. Jak kažuć znajomyja Žukaŭca, 700 tysiačaŭ dalaraŭ — heta tolki ahulnaja suma niejkaj ździełki, a sam atrymany kredyt byŭ roŭny prykładna 50 tys. dalaraŭ. Pavodle versii samoha Žukaŭca, jaho dy jahonuju firmu pieraśledavali mienavita z-za jahonaje palityčnaje dziejnaści. Usio było padstrojena, kaža jon, — ź jaho patrabavali chabar, potym nie davali pieravieści hrošy na rachunak, kab spłacić kredyt, specyjalna, kab pasadzić. Pavał Sieviaryniec śćviardžaje, što jość krynicy, jakija paćviardžajuć hetuju versiju Žukaŭca.

Vidavočna, kiraŭniki Maładoha Frontu bačać u padtrymcy Žukaŭca niemałuju pedahahičnuju karyść – Žukaviec, jakoha, najchutčej, nia vydaduć, budzie dobrym prykładam inšym biełaruskim bahatyram.

U zamiežžy ŭsio čaściej staviać znak roŭnaści pamiž słovami “Belarus” i “Lukashenka”. Mienavita tamu atrymać palityčny prytułak biełarusam nia duža składana, voś i źjaŭlajucca pseŭdapalitpaciarpiełyja, jakija, patrabujučy statusu palituciekača, sprabujuć atabarycca ŭ zamožnych krajoch. Ich ciažka adroźnić ad tych, chto papraŭdzie paciarpieŭ za Biełaruś i musiŭ chavacca ad represijaŭ.

Što da strumieniu “palityčnych uciekačoŭ”, jakija napraŭdzie nikoli nie zajmalisia palityčnaj dziejnaściu, dyk Pavał Sieviaryniec kaža, što takich sapraŭdy niamała. MF zmahajecca z hetaj navałaju z dapamohaj strohaj systemy atrymańnia prośbaŭ na palityčny prytułak. Usiaho na siońnia, kaža jon, 25 maładafrontaŭcaŭ atrymali palityčny prytułak u zamiežžy. Zbolšaha jany vučacca ŭ Prazie dy Varšavie, jość ludzi ŭ Kapenhahienie, Hielsynkach, u Anhielščynie, Ukrainie.

Viačasłaŭ Siŭčyk admoviŭsia kamentavać prablemu paciarpiełych i pseŭdapalitpaciarpiełych. “Front — nia dziarždepartament, mahčymaściaŭ dla dakładnaha ŭliku niama”. Razam z tym, jon skazaŭ što kožny emihrant — u toj ci inšaj miery paciarpieły ad łukašenkaŭskaha režymu: ad dabra nie biahuć.

Aleś Kudrycki