Z usioj krainy

 Z usioj krainy

 U pralocie

23 sakavika maładafrontaŭcy na čale z Paŭłam Sieviaryncam praviali akcyju pad fajnym słohanam «Łukašenka ŭ pralocie». Jany źjavilisia la budynku prezydenckaj administracyi z roznakalarovymi balonikami. Na samym vialikim byli namalavanyja paznavalnyja vusy j čub.

Da Dnia metearolaha Małady Front padrychtavaŭ humarystyčny prahnoz palityčnaha nadvorja na viasnu–vosień 2001 hodu. Tak, na 25 sakavika jon abiacaŭ demanstracyi, miescami AMON, sabaki j branietechniku; uranku — zamarazki, udzień — admarozki. Uviesnu na ŭsioj terytoryi respubliki — mahutny Małady Front sa škvalnymi manifestacyjami. Da pačatku vosieni stan palityčnaha nadvorja budzie vyznačać mocny Viecier Pieramienaŭ. U dzień vybaraŭ čakajucca masavyja falsyfikacyi j parušeńni zakanadaŭstva. Rezkija paryvy telefonnych linijaŭ u ofisach apazycyjnych partyjaŭ buduć spałučacca z praliŭnoj chłuśnioj aficyjnaha telekanału. Zavieršycca vosień, na dumku maładafrontaŭcaŭ, 100-tysiačnymi manifestacyjami, a bližej da zimy ŭsie «Drazdy» palatuć u vyraj — u Afryku ci ŭ Paŭnočnuju Kareju.

«Pavodle našych prahnozaŭ, Łukašenka na sioletnich vybarach «u pralocie», — skazaŭ Sieviaryniec. — Kab spraŭdzić, nakolki mocna, ź jakim adryvam ad demakratyčnaha kandydata, my j zapuskajem hety zond». Z hetym balonik i padniaŭsia ŭ pavietra. Nabiehli supracoŭniki słužby achovy prezydenta j milicyjanty, ale zatrymać im udałosia tolki Sieviarynca. Jaho zavieźli ŭ pastarunak i praz paŭtary hadziny adpuścili.

B.T.

Pamiatajuć Kalinoŭskich

U Śvisłačy tutejšyja aktyvisty ŭskłali kvietki da mahiły Viktara Kalinoŭskaha — brata Kastusia. Naviedali jany i Jakušoŭku, dzie była siadziba Kalinoŭskich.

Siarhiej Kraŭcoŭ, Horadnia

Biespracoŭnyja pravincyjały

Pieršyja viesnavyja dni nie prynieśli asablivaj radaści na Astravieččynie. U bližejšyja dni ŭ arhanizacyjach projduć skaračeńni. Tak, u aŭtaparku №4 skarociać 10 kiroŭcaŭ, bo bolšaść “MAZaŭ”, jakim z paŭhodu niama pracy, budzie razabranaja. Jašče kala 40 čałaviek skarociać u abjadnańni hramadzkaha charčavańnia i na hurtovaj bazie. Pieravažna žančyn.

Marjan Vianhroŭski, Astraviec

A moh by i strelić...

Žychar Łuninca dobraachvotna zdaŭ u milicyju zaradžany ručny supraćtankavy hranatamiot, paviedamiŭšy, što znajšoŭ jaho ŭ kanavie.

Zakryli “Lambdu”

Časopis «Forum Lambda» — adzinaje ŭ Biełarusi drukavanaje hiej-vydańnie — pazbaŭleny paśviedčańnia ab rehistracyi. Časopis byŭ zarehistravany jak navukova-papularny, kulturalahičny, ale bolš za hod vydavaŭsia jak eratyčny, paličyli ŭ Dziaržkamdruku.

Mikoła

naviny za tydzień

Vitaŭtu – kvietki, Leninu – vianok

Śviatočnaja demanstracyja (kala 2000 čałaviek) prajšła vulicami Horadni. Kala Kałožy adbyŭsia mitynh. Byli ŭskładzienyja kvietki da pomnika kniaziu Vitaŭtu i memaryjalnaj doški paŭstancam Kaściuški ŭ Novym zamku. Admysłova da Dnia Voli byŭ padrychtavany vianok z kalučaha drotu, ź siarpom i mołatam usiaredzinie, jaki pryznačaŭsia pomniku Leninu. Ale 25 sakavika plac Lenina achoŭvali 300 milicyjantaŭ. Udzielniki akcyi kinuli vianok prosta im pad nohi. Nikoha nie zatrymali.

Siarhiej Kraŭcoŭ, Horadnia

U Baranavičach

U Baranavičach u mitynhu ŭziali ŭdzieł kala 200 čałaviek. Vystupali paet Michaś Skobła i bard Źmicier Sidarovič. Adbyŭsia tolki adzin nievialiki incydent – maładafrontaŭca Aleha Faleja padčas vystupu adciahnuli ad mikrafona major milicyi ŭ adstaŭcy i pensijanerka. Akcyju zdymaŭ na videakamieru čałaviek, jaki pradstaviŭsia supracoŭnikam hazety «Sovietskaja Biełoruśsija».

Hieneralski zvarot

Były kamandujučy Viciebskaj dyvizii pavietrana-desantavych vojskaŭ hienerał-lejtenant Bačaroŭ i hienerał-majory Vaščyła, Łukjanaŭ, Stremavus skłali zvarot u abaronu Vasila Bykava dy hienerała Kazłoŭskaha, u jakim zaklikajuć žycharoŭ Biełarusi nia vieryć chłuśni dziaržaŭnych ŚMI j patrabujuć ad Hieneralnaha prakurora raspačać spravu pavodle faktaŭ paklopu z boku dziaržaŭnaha telebačańnia. Šturškom da źjaŭleńnia zvarotu stalisia pieradačy BT, u jakich Vasil Bykaŭ byŭ nazvany «litaraturnym palicajem», a Pavał Kazłoŭski abvinavačany ŭ źnižeńni bajazdolnaści biełaruskaha vojska.

Ašmianski bunt

Kiraŭniki amal usich pradpryjemstvaŭ Ašmianščyny źviarnulisia ŭ administracyju Łukašenki z prośbaj zvolnić kiraŭnika rajonu Vitolda Kudyrku. Ašmiancy niezadavolenyja Kudyrkam, jaki pryjechaŭ u Ašmianu ź Lidy.

Tut budzie horad-sad!

Mienharvykankam vyrašyŭ zabrać učastak ziamli na Pryvakzalnaj płoščy, arendavany pradpryjemstvam «Restarany «Makdonaldz» terminam na 39 hadoŭ, i pieradać jaho Biełaruskamu dziaržaŭnamu ŭniversytetu. Ułady zaplanavali pabudavać tut novy korpus BDU i raźmiaścić u im fakultet mižnarodnych znosinaŭ. Z dnia svajho adkryćcia ŭ kastryčniku 1997 hodu restaran absłužyŭ bolš za 3,5 miljony naviednikaŭ. Tam pracuje 140 čałaviek. U hetym ža budynku kampanija zdaje ofis Biełaruskaj słužbie Radyjo Svaboda.

B.T.

Represii suprać aktyvistaŭ

3 sakavika ŭ Bieraści za rasklejku nalepak “Zubr” zatrymali niapoŭnahadovych Alaksandra Strakača i Siarhieja Žurbiłu. 6 sakavika Kryčaŭski rajsud prysudziŭ štrafy redaktaru hazety “Naš Volny Horad” Mikałaju Matoranku i hazety “Volny horad” Siarhieju Niaroŭnamu (50 min. zarobkaŭ kožnamu). 12 sakavika na vakzale zatrymali Jaŭhiena Łabanoviča (AHP), jaki vioz u Maskvu materyjały pra źnikłych biełaruskich palitykaŭ dla pakazu ŭ prahramie NTV. 15 sakavika dva maładafrontaŭcy Rusłan Charkievič z kaleham N byli zatrymanyja za razdaču ŭlotak-vinšavańniaŭ z Dniom kanstytucyi. 16 sakavika ŭ Barysavie za arhanizacyju pikietu salidarnaści z aryštavanymi “zubroŭcami” byli zatrymanyja dva Źmitry — Barodka dy Fiadorčanka. 19 sakavika Valerja Ščukina zasudzili na 3 miesiacy aryštu za “niezakonnuju sprobu” patrapić na pres-kanferencyju ministra ŭnutranych spravaŭ U.Navumava. U toj ža dzień u Miensku zatrymali Andreja Siniakova za toje, što jon havaryŭ ź milicyjantam pa-biełarusku. 21 sakavika byŭ źbity kiraŭnik Baranavickaj arhanizacyi BNF Aleś Pikuła. 23 sakavika ŭ Miensku za razdaču ŭlotak byŭ zatrymany Pavał Patapaŭ (Małady Front). 25 sakavika ŭ Miensku zatrymali Alesia Bialackaha, Jurasia Bieleńkaha, Vincuka Viačorku, sp.Burka, Ludmiłu Hraznovu, Cinu Kłykoŭskuju, sp.Alchoŭskaha, Ksieniu Pihul. U Bieraści byli zatrymanyja Jaŭhien Białasin z dačkoj, Valancin Łazaronkaŭ i jašče čatyry aktyvisty.

Pieranieśli «Dziady»

23 sakavika ŭ vystaŭnaj zali haradzienskaha adździaleńnia Sajuzu mastakoŭ nie adkryłasia vystava kavalstva Jurasia Macka pad nazvaj «Dziady». Jaje pieranieśli na krasavik z pryčyny “nieadpaviednaści intaresam abłasnoj arhanizacyi BSM”. Haradzienskamu kavalu inkryminujecca taksama «vykarystańnie vystaŭnych płoščaŭ dla reklamy i prapahandy palityčnych idej. Pahroza hramadzkamu pravaparadku i majomaści zali».

Realnaja pryčyna adna: nia dać kavalu pravieści adkryćcio napiaredadni ŭhodkaŭ BNR, bo jon ščyra skazaŭ dyrektarcy zali, što zaprosić uvieś miascovy niezaležnicki bamond.

S.K.

naviny haspadarskija

Hrošy napierad. Inakš – referendum?

U sferu cikavaści rasiejskaha kapitału trapili Mienski aŭtamabilny i Mienski matorny zavody. Na ich pretenduje hołdynh “Horkaŭski aŭtazavod”, ułaśnikam jakoha źjaŭlajecca “Sybirski alumini”. Kankretnyja ŭmovy nieviadomyja, ale sprava moža skončycca navat prodažam zavodaŭ, bo nadziei na alternatyŭnyja krynicy finansavańnia sioletnich vybaraŭ robiacca ŭsio bolš pryvidnymi.

Tak, razreklamavanaje ŭviadzieńnie ŭ Biełarusi rasiejskaha rubla da 2005 h. zastaniecca tolki na papiery. Sa słovaŭ Piatra Prakapoviča, Rasieja choča mieć manapolnaje prava na druk hrošaj, tady jak Biełaruś planuje stvaryć emisijny centar abodvuch centralnych bankaŭ. Sproby damovicca vynikaŭ nie dali, tamu siońnia ŭsio čaściej hučyć dumka “paraicca z narodam” što da budučyni nacyjanalnaj valuty.

Akramia taho, Rasieja źbirajecca nakiravać abiacany kredyt u 100 miljonaŭ dalaraŭ na spłačvańnie raniejšych zapazyčanaściaŭ Biełarusi. A Łukašenku zaraz treba žyvyja hrošy, bo za ŭsie papiarednija hady “ekanamičnaha ŭzdymu” Nacbank stvaryŭ valutnyja rezervy ŭ pamiery… 17 dalaraŭ ZŠA na kožnaha biełarusa. A treba ž vykonvać hałoŭny punkt pieradvybarčaj prahramy PPRB – padvyšać zarobki.

Za studzień-luty ich siaredni pakazčyk zastaŭsia niaźmiennym, a tak zvany realny (z ulikam rostu cenaŭ) zarobak źmienšyŭsia na 8,5 %. Vypravić hetaje stanovišča možna ŭ sakaviku – z rostam “minimałki”.

Adnak nia varta zabyvacca na advarotny bok medala. Niesvoječasovaja vypłata zarobkaŭ stałasia realijaj nia tolki dla kałhaśnikaŭ i pramysłoŭcaŭ, ale j dla nastaŭnikaŭ i medykaŭ. Dzie-nidzie nie paśpieli naličyć “novyja” zarobki, jak papaŭźli ŭhoru ceny. Niadaŭna na čverć pavialičyŭsia košt telefonnych razmovaŭ, padaražeŭ prajezd u ciahnikach “unutranych” maršrutaŭ i elektryčkach. Paśla aciaplalnaha sezonu ŭzdymucca kamunalnyja taryfy… Praciah budzie?

Siaržuk Ivanoŭski

spartovy tydzień

Bulba z sałam

Biełaruskija dy ŭkrainskija futbolnyja zaŭziatary varahavali šče z savieckich časoŭ, i, napiaredadni matču zbornych, vastryli adzin na adnaho zub u Internecie. Adnak chulihanskija razborki ŭ Kijevie svajoj žorstkaściu pieraŭzyšli samyja žudasnyja pradkazańni.

Pieršaja sutyčka adbyłasia na Chryščaciku pierad hulnioj moładzievych zbornych. Blizu 20 čałaviek z kožnaha boku z armaturaj, butelkami dy kamianiami ŭčynili kryvavuju bojku. Ź dziasiatak zabrała “chutkaja dapamoha”. Adzin ukrainiec, vidać, zastaniecca invalidam – pierałom tazavych kostak.

Na stadyjonie zmahańnie nabyło infarmacyjny charaktar: ukraincy raŭli apanentam “bulba”, a ŭ adkaz čuli “sała” dy “škvarki”. Biełarusy tak razyšlisia, što kinuli na pole dymavuju šašku. Milicyja nia zdoleła “absadzić” haściej da kanca matču, paśla jakoha apošnich, dziela ichnaj biaśpieki, razvozili na aŭtobusach. I bajacca było čaho – tak, hrupku biełarusaŭ, kanvajavanuju dziasiatkam milicyjantaŭ, na Chryščaciku atakavali ŭkraincy ź dziahami dy armaturaj. Milicyja adbiła napad i schavała biełarusaŭ u metro.

Zranku bojki pačalisia ŭ roznych miescach Kijeva. Najbolš ahresiŭnyja biełaruskija zaŭziatary ŭvieś matč prasiedzieli ŭ pastarunku. Usiaho ŭ “Alimpijskim”, raźličanym na 80 tysiačaŭ, było blizu 1,5 tysiačy biełarusaŭ. A matč skončyŭsia ničyjoj 0:0. Što značyć — pośpiech biełarusaŭ.

Bohuś Bijatlanionak