Dla druku/nie dla druku
Ci možna čytać čužy dziońnik? Asabliva kali hety dziońnik intymny i nie raźličany na publikacyju. Adkaz na hetaje pytańnie viadomy kožnamu ź dziacinstva. Čytać čužyja zanatoŭki amaralna. Hetaja iścina pierastaje hučać pierakanaŭča, kali havorka zachodzić pra intymnyja dziońniki vialikich tvorcaŭ.
Užo bolš za dziesiać hadoŭ u Biełarusi viadziecca palemika pra toje, ci možna apublikavać eratyčnyja zanatoŭki Maksima Bahdanoviča, ci maralna heta i ci nie sapsuje cnatlivy vobraz ulubionaha tvorcy. Hety dziońnik pieršaha ramanu, seksualnaha staleńnia źbierahajecca ŭ muzei Bahdanoviča ŭ Miensku i staranna achoŭvajecca supracoŭnikami ad čužoha voka. Palemika za ścienami muzeju praciahvajecca.
Što ž takoha ŭčyniŭ Bahdanovič sa svajoju kachankaj, što byccam by ažno niepryjemna toj dziońnik u rukach trymać i što ŭžo bolš za 10 hadoŭ nie daje spakoju jahonym prychilnikam? Čym kiepski skandał vakoł imia paeta, jaki nibyta vykliča publikacyja hetych dziońnikaŭ? I niaŭžo pacierpić vieličynia tvorcy, zdolnaha praz sto hadoŭ dać nahodu dla skandału vakoł svajho imia?
Što bolš etyčna — čytać čužyja dziońniki ci kultyvavać niepraŭdzivy vobraz čałavieka i tvorcy? Ujavicie, što b skazali tvorcy minułych epochaŭ, sutyknuŭšysia sa svaimi padcharošanymi vobrazami. Najčaściej jany pratestavali b. U spravie Bahdanoviča jahony dziońnik vyhladaje adčajnaj sprobaju vyratavać svoj ułasny paśmiarotny vobraz.
Dziońniki vydatnych piśmieńnikaŭ usio ž urešcie drukujucca zaŭsiody. Čałaviectva, imknučysia zrazumieć pryrodu talentu, dazvalaje sabie nie ličycca z volaju tvorcy. Jano nia źmirycca z tabu na dziońniki. Kažuć, kali b była vykananaja pieradśmiarotnaja vola Kafki, śviet paprostu nie pačuŭ by pra takoha piśmieńnika.
Dziońnik pisaŭsia Bahdanovičam dla inšych jak śviedčańnie taho, što jon pražyŭ karotkaje, ale paŭnavartasnaje ŭ sensie paznańnia žyćcio. U hetym musiŭ pierakanacca baćka, a razam ź im i ŭsie, chto nieabyjakavy da asoby tvorcy. Mahčyma, publikacyja dziońnika i źmienić dla kahości vobraz Bahdanoviča. Ale ci ŭ horšy bok?
Kamientary