Pastar prasiŭ pryznać niezakonnym rašeńnie Centralnaha sudu Miensku, jaki aštrafavaŭ jaho za nie sankcyjanavanaje ŭładami nabaženstva.
Nabaženstva na Trojcu, 27 traŭnia, Antoni Bokun pravodziŭ va ŭłasnym domie. Paśla jaho zaviaršeńnia supracoŭniki milicyi skłali pratakoł ab administracyjnym pravaparušeńni, a sud aštrafavaŭ śviatara na 620 tysiač rubloŭ.
Mienski haradzki sud hetaje rašeńnie pakinuŭ biaź źmienaŭ.
Spadar Bokun kaža, što i nie spadziavaŭsia na inšaje, ale zmahańnie budzie praciahvać, i voś čamu:
«Kali niama takich abskardžańniaŭ, to takoje składvajecca ŭražańnie, što ŭsio narmalova i ŭsio spakojna. A heta ŭsio‑taki niejkija dakumentalnyja śviedčańni, što nia ŭsio dobra ŭ relihijnym zakanadaŭstvie. Nie chaciełasia b davodzić sytuacyju, jak u carkvie «Novaje žyćcio».
Nahadaju, što vierniki pratestanckaj carkvy «Novaje žyćcio», skarystaŭšy ŭsie jurydyčnyja normy dziela adstojvańnia svaich pravoŭ, trymali 23‑dzionny strajk. Jany pratestavali suprać rašeńnia ŭładaŭ, jakija pastanavili zabrać budynak ich carkvy.
Siońniašniaje sudovaje rašeńnie kamentuje sakratar carkvy «Novaje žyćcio» Siarhiej Łukanin:
«Na žal, našyja sudy nie źjaŭlajucca niezaležnymi ŭstanovami. I ŭsie sudovyja pracesy, jakija tyčylisia pratestanckich supolnaściaŭ, jany zakančvalisia nie na karyść viernikaŭ. Treba było, kab sud, pavodle zakonu, admianiŭ usie pastanovy adnosna pastara Bokuna».
Rašeńniem sudu Centralnaha rajonu Miensku za praviadzieńnie niesankcyjanavanaha nabaženstva Antoni Bokun adbyŭ troje sutak aryštu.
Hety prysud pastar abskardžvaje ŭ Viarchoŭnym Sudzie ŭ aŭtorak, 26 červienia.
Vierniki carkvy «Novaje žyćcio», a taksama inšych relihijnych supolnaściaŭ sabrali kala 25 tysiač podpisaŭ hramadzianaŭ da kiraŭnictva krainy. Jany patrabujuć admianić normy zakonaŭ, jakija parušajuć pravy viernikaŭ.
Kamientary