apytańnie “NN”
Rybakova — u adstaŭku?
Biełaruś — adna z 11 krainaŭ (Vanuatu, Kirhizija, Łatvija, Małdova, Nauru, Salamonavy astravy, Tadžykistan, Turkmenistan, Uzbekistan, Filipiny), jakaja nie kupiła pravoŭ na tranślacyju mundyjalu. Biełteleradyjokampanija spadziavałasia vyrašyć hetuju prablemu ŭ zvykły sposab: “skraści karcinku” na jakim rasiejskim kanale. Dumali, što rasiejcy nia znojduć techničnych mahčymaściaŭ pierakryć syhnał. A rasiejcy mažlivaść adšukali.
Va ŭsim śviecie hučnyja skandały takoha kštałtu vyklikajuć adstaŭku vinavataha. U hetym vypadku niaŭzbrojenym vokam možna ŭbačyć vinu kiraŭnictva Biełaruskaha telebačańnia. Pytańnie “NN”: ci musić kiraŭnik teleradyjokampanii Jahor Rybakoŭ pajści ŭ adstaŭku?
Uładzimier Parfianovič, viaślar, trochrazovy alimpijski čempijon, deputat pałaty pradstaŭnikoŭ: Čamu tolki Rybakoŭ? Našaja kraina stała horšaj za Handuras: navat pry kamunistach futboł hladzieli.
Uładzimier Kavalonak, kasmanaŭt: Pakolki biełaruskaj zbornaj na čempijanacie niama, dyk, mahčyma, kiraŭnictva teleradyjokampanii zrabiła i pravilna: pakaz čempijanatu — darahoje zadavalnieńnie. Navat u Savieckim Sajuzie pakazvali nia ŭsie eŭrapiejskija čempijanaty… Lepiej na hetyja hrošy pabudavać jašče adzin dom.
Aleś Lipaj, dyrektar infarmacyjnaha ahienctva BiełaPAN: Kali jon futbolny zaŭziatar — to pavinien, kali nie — to nie.
Hienadź Buraŭkin, paet: Rybakoŭ pavinien pajści ŭ adstaŭku nie z-za čempijanatu, a z-za taho, što zrabiŭ telebačańnie niecikavym, epihonskim. Ja liču, što skandał vakoł čempijanatu — adna z prajavaŭ nieprafesijanalizmu i pahardy da hledačoŭ. Jany nie hladziać, što ludziam treba, a što nie. Hladziać tolki na načalstva.
Jury Bieleńki, namieśnik staršyni KCHP-BNF, zaŭziaty futbalist: Pry čym tut vykanaŭca čužoj voli? U dziaržavie stvoranaja systema ŭłady, kali staršynia teleradyjokampanii, jak i inšyja čynoŭniki, vykonvaje čužyja zahady. Jany nie rasparadžajucca hrašyma i nie vyznačajuć pryjarytetaŭ.
Vital Skałaban, historyk: Nia dumaju, što Rybakoŭ musić syści ŭ adstaŭku, choć jon i nia spraŭdziŭ nadziejaŭ našych zaŭziataraŭ.
Andrej Sańnikaŭ, kaardynatar Chartyi'97: Tak. Razam z Łukašenkam.
Alaksandar Starykievič, hałoŭny redaktar prafsajuznaj hazety “Biełaruski čas”: Nia baču padstavaŭ dla adstaŭki Rybakova. Chiba ŭ nas adbyvajucca niejkija masavyja akcyi pratestu? Para socień čałaviek — mała dla dvuchmiljonnaha horadu. Hramadztva ŭspryniało ŭsio spakojna.
Dzianis Nosaŭ, telerežyser: Lepš by jon daŭno syšoŭ u adstaŭku, bo ŭsia dziejnaść Rybakova na pasadzie kiraŭnika teleradyjokampanii vielmi nieprafesijnaja.
Vasil Šłyndzikaŭ, Abjadnanaja hramadzianskaja partyja: Kab Rybakoŭ pajšoŭ u adstaŭku sam, heta było b ščyra. Ale heta nia ŭ styli siońniašniaha čynavienstva.
Apytvaŭ Adam Voršyč
Kamientary