Futbolnyja kiberžarści

Futbolnyja kiberžarści

feljeton

Paraza rasiejskaj zbornaj u matčy ź Japonijaj unuryła ŭ hłybokuju medytacyju nia tolki rasiejskich spartovych čynoŭnikaŭ. Fanam ź “biełymi kaŭnierykami” (hurtu rasiejskich chakieraŭ) spatrebiłasia niekalki sutak, kab razabracca ŭ sytuacyi i zrabić svaje vysnovy. Ab hetym jany j paviedamili na sajcie ź vielmi pavažnaj nazvaj SecurityLab (http://securitylab.ru/?ID=31355).

Akazvajecca, chitryja samurai daŭmielisia kiravać ruchami futbolnaha miača! Dzion za kolki da pačatku čempijanatu chakiery praleźli ŭ kamputarnuju sietku stadyjonu ŭ Jokahamie. Ich uraziła, da jakoj stupieni stadyjon našpihavany elektronikaj. Aproč kamputarnych systemaŭ administracyi, buhalteryi, słužby biaśpieki, chakiery natknulisia na systemy kantrolu aśviatleńnia, aŭtamatyčnaha palivu hazonu, blakavańnia dźviarej u kalidorach i na aŭtastajancy dy na niešta nakštałt systemy padahrevu stadyjonu. Ale nia heta ŭrešcie pryciahnuła ichnuju ŭvahu. Siarod inšych vyjaviłasia vielmi składanaja systema, jakaja, jak “admysłoŭcy” paźniej (naturalna, užo paśla matču) ściamili, pradraŭšysia praz amal niepieraadolnyja moŭnyja pieraškody, była pryznačanaja dla stvareńnia mahutnaha elektramahnitnaha pola, zdolnaha “karektavać” palot miača. Da hetaj dumki ich padšturchnuła spazirańnie taho, jak pasyłanyja rasiejcami miačy ŭparta nia jšli ŭ japonskuju bramu.

Chakiery rastłumačyli heta tym, što ŭ hieksahanalnych nasiečkach miačoŭ była schavanaja cienkaja dracianaja sietka z najnoŭšych nanamateryjałaŭ, jakaja i reahavała na ŭklučanaje technikami ŭ naležny momant elektramahnitnaje pole, adchilajučy miač ad, zdavałasia b, stoadsotkavaj hołavaj trajektoryi. Pradstaŭniki SecurityLab źviarnulisia pa tłumačeńni da supracoŭnikaŭ labaratoryi zvyšhukavych chutkaściaŭ Instytutu mechaniki MDU, jakija nibyta pryznalisia, što sami daŭno ŭžo zajmajucca takimi prablemami, a toje, pra što paviedamili chakiery, tearetyčna mahčyma.

Ale ž rasiejskim chakieram daviałosia vyrašyć zadačku nia z prostych! A tamu i z sytuacyjaj jany razabralisia nie adrazu, a to abrynuli b na kamputarnyja systemy stadyjonu ŭ Jokahamie ŭsiu chakierskuju moc adnoj šostaj ziamnoj kuli i, chto viedaje, moža, jašče paśpieli b paŭpłyvać na vynik taho haniebnaha dla Rasiei matču. I heta było b pa-džentelmensku. Nia toje što bić biez razboru biaźvinnych uładalnikaŭ tvaraŭ z azijacka-cichaakijanskimi rysami.

Jany hetaha, adnak, nie zrabili. Ale adpomścić złamysnym razumnikam-japoncam paabiacali. Adrazu i za krejser “Varah”, i za Siarhieja Łazo, i za parazu ŭ Jokahamie… Rasiejskija chakiery harantavali turkam pieramohu. Bahata jakija rasiejskija fany paśla hetaha ŭzdychnuli z palohkaj i vieraj u spraviadlivaje pakarańnie. U moc rasiejskich chakieraŭ vierać ciapier bolej, čym u moc zbornaj…

Tyja, kamu cikava, mohuć krychu jašče pazabaŭlacca, pačytaŭšy na paznačanaj vyšej staroncy forum, admysłova pryśviečany hetaj temie.

Siarhiej Sańko