Z usioj krainy

Z usioj krainy

Bujnaja aŭtaavaryja

17 vieraśnia a 4-j ranicy vioska Vialikaja Hać, praź jakuju prachodzić šaša Ivacevičy—Pinsk, abudziłasia ad strašennaha hrukatu. Kiroŭca “KamAZu” vyjechaŭ na pałasu sustrečnaha ruchu i źbiŭ lehkavik “Falksvahien-Pasat”. Zahinuli pryvatny taksyst, žychar Ivacevičaŭ Vasil Papko, i čatyry jahonyja pasažyrki: try žančyny z Tatarstanu i adna — ź Nižaharodzkaj vobłaści, jakija jechali ŭ Pinsk pa miascovy trykataž. Ad inšamarki zastałasia kuča metałałomu. Kiroŭca “KamAZu” nie spyniŭsia, a naadvarot, prybaviŭ hazu. Milicyjanty zatrymali jaho ŭ lesie za 10 kilametraŭ ad miesca avaryi. Rasiejec Hleb Ivanoŭ z Tahanrohu byŭ u niećviarozym stanie, jon źmieščany ŭ izalatar časovaha zatrymańnia. Pra darožnuju trahiedyju paviedamlena pasłu Rasiei ŭ Biełarusi. Za śledztva ŭziaŭsia śledčy kamiet MUS pa Bieraściejskaj vobłaści.

Aleś Łaŭraniuk, Ivacevičy

Razburany apošni viatrak

Mocny viecier źnios viatrak u vioscy Adelsk (Haradzienščyna), jakomu było bolš za 200 hadoŭ. Ad jaho zastalisia adnyja hranitnyja žorny. Paśla druhoj suśvietnaj vajny, pakul nie pačałasia žorstkaja kalektyvizacyja ŭ “zachodnikaŭ”, kala vioski stajała 10 vietrakoŭ, a ŭvohule vakoł Horadni ich było pad 30.

U bolnicy nie zalažyšsia

Na tysiaču skaraciłasia kolkaść miescaŭ va ŭstanovach systemy achovy zdaroŭja Haradzienščyny. Adbyłosia heta ŭ ramkach abłasnoje prahramy “pieraaryjentacyi medyčnaj dapamohi nasielnictvu”. Siaredni termin znachodžańnia chvorych u bolnicach pamienšaŭ z 13 da 12,5 dnia. Pavialičyłasia kolkaść dzionnych stacyjanaraŭ, što dazvoliła źnizić kolkaść vyklikaŭ “chutkaj” amal na 7%. Nadalej buduć arhanizavanyja stacyjanary adnaho dnia: aperacyja ŭ bolnicy z nastupnym dalečvańniem chvorych va ŭmovach palikliniki, što dazvolić zekanomić značnyja srodki.

Andrej Mialeška, Horadnia

Bambist

U Baranavičach, prykładna a 23-j hadzinie, kala baru na vuł. Kamsamolskaj, 4 nieviadomy kinuū vybuchovaje prystasavańnie pad “Mersedes” raniej sudzimaha žychara horadu. Bambist uciok. Achviara teraktu zastałasia žyvaja, mašyna atrymała paškodžańni.

Zatrymali rekieciraū

Baranavickija milicyjanty zatrymali złačyncaū, jakija teraryzavali žančynu-pradprymalnicu. Jany prymušali kabietu płacić im pa 50 dalaraū štomiesiac. Taja nia vytrymała j źviarnułasia ū miłicyju. Dvuch złačyncaū zatrymałi, jašče dva paśpieli pachavacca.

Epidemija ŭ škole milicyji

U baranavickaj škole milicyji adbyłasia epidemija. 57 kursantaū z kryvaūkaj na minułym tydni byli špitalizavanyja. U samoj škole ūviedzieny karantyn — astatnich nie adpuskali na vychodnyja dachaty. Zachvareli budučyja milicyjanty ci to ad pitnoj vady, ci to z-za stałoūki.

Rusłan Raviaka, Baranavičy

Płatnaja daviedka

Pasłuhi haradzienskaj haradzkoj telefonnaj daviedačnaj słužby stali płatnyja. Košt adnoj daviedki ŭdzień składaje 20 rubloŭ, unačy (ad 22.00 da 7.00) — 40. Haradzienskaja vobłaść — pieršaja paśla Miensku, dzie byli ŭviedzienyja płatnyja pasłuhi haradzkoj daviedki.

Alesia Sidlarevič, “Nioman-Infarm”