Eŭropie baćka nie patrebny

***

Pavialičyć

Alaksandar Łukašenka i siem jahonych uradoŭcaŭ pazbaŭlenyja prava ŭjaždžać na terytoryju 14 krainaŭ Eŭraźviazu. U čornym śpisie kiraŭnik Administracyi prezydenta, premjer, staršynia KDB, ministry zamiežnych spravaŭ, abarony, unutranych spravaŭ, justycyi. Tolki Partuhalija, što znachodzicca ad Biełarusi najdalej, dabiłasia prava nie dałučacca da supolnaha rašeńnia.

Partuhalcy bajalisia, što dyplamatyčnyja sankcyi suprać Biełarusi mohuć sapsavać chod kanferencyi ministraŭ zamiežnych spravaŭ ABSE, što maje adbycca 6—7 śniežnia ŭ Portu. Heta byŭ, adnak, nia pieršy vypadak, kali partuhalskija dyplamaty spračalisia z svaimi kalehami nakont vizavych abmiežavańniaŭ. Niadaŭna analahičnyja razychodžańni ŭźnikli ŭ pytańni pra zabaronu na vizy dla kiraŭnikoŭ Zymbabve. Ale partuhalski ministar nie pierakanaŭ kaleh u niemetazhodnaści ŭviadzieńnia sankcyj suprać Biełarusi.

Kab znajści hodny kampramis, ministry pahadzilisia na formułu, što vyklučaje Partuhaliju ź śpisu zabaronienych krainaŭ. Kali łukašenkaŭcy pajeduć u Portu, im budzie vydadzienaja nacyjanalnaja partuhalskaja, a nie šenhienskaja viza.

Čorny śpis byŭ skaročany z 52-ch, pra jakich viałasia havorka raniej, da vaśmioch asobaŭ. Takuju prapanovu ŭniesła Švecyja. Jana spasyłałasia na zaściarohi Polščy, Łatvii i Litvy. Hetyja krainy-kandydatki zazvyčaj amal aŭtamatyčna padtrymlivajuć usie rašeńni Bruselu, ale ŭ dadzienym vypadku heta zrabiła b niemahčymym vyrašeńnie štodzionnych pytańniaŭ pamiežnaha supracoŭnictva.

Napiaredadni sustrečy ŭ Bruseli šef polskaj dyplamatyi Ŭładzimier Cimaševič zajaviŭ, što Polšča padtrymlivaje samo rašeńnie i razumieje jahonyja matyvy, ale, zychodziačy z racyi susiedztva i kaniečnaści kantaktaŭ ź Biełarusiaj, joj ciažka było b spynić ź joj adnosiny.

Padstavaj dla sankcyj stała nieadnarazovaja admova Miensku padoŭžyć vizy supracoŭnikam misii ABSE i poŭnaja adsutnaść demakratyi ŭ Biełarusi. Choć Miensk pačaŭ raspraŭlacca ź misijaj adrazu paśla letašnich vybaraŭ, a demakratyjaj nia pachnie ad 1995-ha, hrom hrymnuŭ tolki ciapier.

U suajčyńnikaŭ pa kantynencie daŭno časalisia ruki pakarać “apošniaha dyktatara Eŭropy”. Strymlivała tolki toje, što jašče bolšaja izalacyja biełaruskaha kiraŭnictva niepaźbiežna šturchnuła b jaho ŭ ciaśniejšyja abdymki Maskvy. Adčuŭšy, što inkarparacyja Biełarusi ŭ Rasieju bolš nie staić na paradku dnia, eŭrapiejcy pamianiali taktyku. A tutaka i nahoda vyrvałasia: impetnaje žadańnie “dyktatara Biełarusi” prarvacca na samit NATO ŭ Prahu, šantažujučy Eŭropu kantrabandaj narkotykaŭ i nielehalnaj imihracyjaj.

U adroźnieńnie ad sankcyj, jakija eŭrapiejcy ŭvodzili ŭ 90-ch, hetym razam jany mohuć dać efekt. Pa-pieršaje, uzrasła zaležnaść krainy ad ekspartu ŭ Eŭraźviaz. Pa-druhoje, siarod biełarusaŭ vyrasła papularnaść idei intehracyi ŭ Eŭrasajuz.

Nijakich adekvatnych mieraŭ u adkaz Biełaruś pryniać nia moža. Chiba što sapraŭdy, na radaść tutejšym kantrabandystam, zdymie drotavyja zasłony na zachodniaj miažy. Tamu aficyjnyja medyi navat nia nadta krytykujuć eŭrapiejskija krainy, abmiažoŭvajučysia zvykłymi spasyłkami na “amerykanski cisk”.

Na kanferencyi pa Biełarusi, arhanizavanaj 14 listapada ŭ Vašynhtonie pad ehidaj “Amerykien enterprajz instytut”, prahučali zakliki da “źmieny režymu” ŭ Biełarusi. Hety vyraz apošnim časam staŭ modnym u dačynieńni da Iraku. Paśla takoje paraleli Łukašenku nie vypadaje spadziavacca na litaść z boku Vašynhtonu. Adnak ad eŭrapiejcaŭ biełarusy zaŭždy čakali bolšaha.

Biełaruś nia moža pravodzić palityku samaizalacyi doŭhi čas. Tamu Pucin zreahavaŭ na rašeńnie eŭrapiejcaŭ imhnienna. U aŭtorak pres-sakratarka kiraŭnika Biełarusi Natalla Piatkievič z zachapleńniem abvieściła, što A.Łukašenka atrymaŭ zaprašeńnie z Maskvy. Praŭda, infarmavanyja rasiejskija krynicy ćvierdziać, što sustreča adbudziecca pa prośbie biełaruskaha boku.

Vizyt Łukašenki ŭ Maskvu moža adbycca ŭžo 27 listapada. Miarkujučy pa imhniennaj reakcyi, Maskva hatovaja hulać ź Mienskam u tuju ž hulniu, jakaja pryniesła joj za apošni hod stolki pieramoh na ŭkrainskim froncie. Biełaruska-rasiejskaja sustreča ŭ viarchach moža stać čarhovym pavarotam fluhiera biełaruskaj palityki. Raz Łukašenku nia budzie kudy jeździć, akramia jak u Rasieju, jon hatovy jeździć u Rasieju.

Mikoła Buhaj

• 0
• 0
• 0
• 0
• 0
• 0
• 0
• 0