Aŭkcyjon pa prodažy dziaržaŭnaha pakietu akcyjaŭ “Słaŭnafty” pravaliŭsia. Biełaruski ŭrad “kinuli”.
Na tarhi, što adbylisia 22 listapada na Biełaruskaj valutna-fondavaj biržy, vystavili adnym lotam 515.087.000 akcyjaŭ “Słaŭnafty” (10,83% statutnaha fondu). Urad, zdavałasia, spadziavaŭsia addać svaje akcyi “Surhutnaftahazu”. Kiraŭnik hetaj firmy Ŭładzimier Bahdanaŭ navat pryjaždžaŭ u Biełaruś 19 listapada. Ale “Surhutnaftahaz” navat nie padaŭ zajaŭki na ŭdzieł, choć i maje, pavodle acenak ekspertaŭ, 4 młrd. “volnych” dalaraŭ. Na aŭkcyjon źjaviŭsia tolki “Słaŭnaftabank”, jaki pradstaŭlaje intaresy hubernatara Čukotki Ramana Abramoviča ź jahonaj kampanijaj “Sibnafta”.
“Adziny kandydat” prapanavaŭ za biełaruski pakiet 210 młn. dalaraŭ (na 10 młn. bolš za startavuju canu). Ale biełaruski bok planavaŭ atrymać za akcyi nijak nia mienš za 250 młn., tamu było abviaścili, što aŭkcyjon nie adbyŭsia. Bałazie, jon prachodziŭ za “začynienymi dźviaryma” i hramadzkaść nia viedaje ŭsich akaličnaściaŭ pieramovaŭ pamiž “Słaŭnaftabankam” dy ŭradam. 25 listapada adbyŭsia “druhi raŭnd” tarhoŭ. Vynik toj samy.
Heta nie pralik uradu, jaki “załamiŭ” zanadta vysoki košt, a, chutčej, uzhodnienaja hulnia rasiejskich biznesoŭcaŭ. Biełaruski bok zychodziŭ z taho, što startavaja cana akcyjaŭ musić u adsotkavych adnosinach stasavacca z rasiejskaj (1,7 młrd. dalaraŭ za 74,95% rasiejskich akcyjaŭ prykładna adpaviadajuć 200 młn. za 10,83% biełaruskich). Realny ahulny košt “Słaŭnafty” — kala 2,8 młrd. dalaraŭ. Heta aznačaje, što Biełaruś maje prava raźličvać prykładna na 300 młn. dalaraŭ. Kali tak, dyk 210 młn., prapanavanych“Słaŭnaftabankam”, zamała.
Mahčyma, źviestki pra finansavyja ciažkaści “Surhutnaftahazu” j jahonaja admova brać udzieł u aŭkcyjonie — taktyčny chod, jaki musić źbić canu dy pieratvaryć handal u fars, što skončycca damovaj miž uradam i kampanijaj. “Surhutnaftahaz” zacikaŭleny nie stolki ŭ biełaruskim pakiecie akcyjaŭ, kolki ŭ pryvatyzacyi biełaruskaha naftachimičnaha komleksu. Biełaruś ža choča tolki pradać akcyi, kab spłacić “Hazpromu” zapazyčanaść za haz.
A.K.
Kamientary