Piatro Prakapovič prapanavaŭ Rasiei zaviedama nieprymalny kampramis.
Kiraŭnictva Rasiei praciahvaje nastojvać na ŭviadzieńnia supolnaj valuty ŭ jakaści pieradumovy miždziaržaŭnaje intehracyi. Dla Biełarusi taki varyjant nieprymalny.
Na sustrečy z kiraŭnictvam Centrabanku Rasiei Piatro Prakapovič zaprapanavaŭ kampramis: Biełaruś admaŭlajecca ad prava na emisiju najaŭnych hrošaj, adnak Rasieja musić całkam pakryć «straty» ad takoj admovy. Rasieja pavinna dać Biełarusi «techničny kredyt», jaki tuju (pakul nie nazvanuju) sumu całkam pakryje. Słova «kredyt» užytaje dla źmiakčeńnia farmuloŭki: viartać jaho Biełaruś nia budzie. Prakapovič spasłaŭsia na dośvied novych čalcoŭ Eŭraźviazu, što patrabujuć ad Centralnaha eŭrapejskaha banku kampensacyi za stratu manetarnaha suverenitetu. Pavodle pahadnieńniaŭ, što byli zaklučanyja raniej, Centrabank užo abaviazaŭsia dać Biełarusi ŭ 200 młn. dalaraŭ dy 4,5 młrd. rasiejskich rubloŭ (kala 150 młn. dalaraŭ) kredytu na stabilizacyju kursu našaha rubla.
Miž tym, emisija najaŭnaha rubla nia jość vyznačalnaj dla hrašovaj systemy. Hałoŭnaje – emisija bieznajaŭnaha rubla, ad jakoj Biełaruś nia maje namieru admaŭlacca.
Rasiejskaje internet-vydańnie «Hazieta.ru» ad prapanovy Prakapoviča ŭ lohkim transie: «Pra jakija straty Biełarusi razmova, nie zusim zrazumieła. Biełaruś, naadvarot, moža niamała zekanomić na druku banknotaŭ».
Kali Rasieja admovicca «płacić za čarhovy krok da abjadnańnia», dyk pryznačany na 1 studzienia 2005 h. uvod adzinaj valuty nie adbudziecca. Zrešty, Piatro Prakapovič paśla viartańnia z Maskvy nazvaŭ jašče tuzin pryčynaŭ, čamu supolnaja valuta niemahčymaja: niama supolnaj haspadarskaj prastory, adzinaha Padatkovaha kodeksu, mytnaj prastory, peŭnaści ź biełaruskaj zapazyčanaściu za haz i rasiejskimi cenami na jaho, adzinaha rynku kaštoŭnych papieraŭ i h.d.
Rasiejski bok paprasiŭ miesiac na rozdum.
MB
Chalezin: Nieŭźlin finansuje Chartyju'97 jašče z prezidenckich vybaraŭ 2010 hoda36
Kamientary