Pastanova Saŭminu pra likvidacyju Humanitarnaha liceju zaśviedčyła, što dziejańni ŭłady byli nie ŭ apošniuju čarhu abumoŭlenyja žadańniem zavałodać budynkam u centry Miensku, dzie mieścicca navučalnaja ŭstanova. Tym časam vykładčyki j baćki rehistrujuć hramadzkaje abjadnańnie «Biełaruski licej».
Humanitarny licej likvidujecca «dziela aptymizacyi navučańnia i palapšeńnia materyjalna-techničnaha stanovišča» pavodle admysłovaj pastanovy Saŭminu i zahadu Minadukacyi. Pastanova za podpisam Hienadzia Navickaha datavanaja 25 červienia — dniom pachavańnia Vasila Bykava. Supadzieńnie tym bolš symbaličnaje, što apošni publičny vystup piśmieńnika pryśviačaŭsia abaronie liceju. Saŭmin rekamenduje Mienskamu haradzkomu ŭpraŭleńniu adukacyi stvaryć na bazie likvidavanaj ustanovy «Mienski haradzki humanitarny licej». Siońniašnija liceisty mohuć praciahvać navučańnie tam abo «ŭ inšych siarednich navučalnych ustanovach». Vybar navučencam dajecca tolki naminalny: pryjomnyja ispyty ŭ licei dy himnazii ŭžo skončylisia, zastalisia zvyčajnyja škołki. Navošta likvidavać licej i stvarać na jaho miescy novy?
«Heta robicca admysłova, kab pazbavicca ad vykładčyckaha kalektyvu. Nijakich harantyjaŭ pryjomu na pracu Ministerstva nie daje: vyrašać los vykładčykaŭ budzie haradzkoje ŭpraŭleńnie adukacyi», — pierakanany Lavon Barščeŭski, namieśnik dyrektara liceju. Pastanova vyśviečvaje i jašče adnu metu. «Pad ramont» adychodzić licejski budynak u centry Miensku. Namieśnik ministra adukacyi Kazimier Faryna paabiacaŭ, što budynak zastaniecca navučalnaj ustanovie: jaho viernuć, maŭlaŭ, paśla ramontu. Pakul ža «novaliceistam» daviadziecca navučacca ŭ pamiaškańni Liceju BDU, Peduniversytetu ci na inšych «płoščach». Adnak sumnieŭna vyhladajuć abiacanki-cacanki viarnuć usio paśla ramontu. Razam z budynkam u liceju zabirajuć i imia. Jak patłumačyŭ K.Faryna, imiem Jakuba Kołasa novaja ŭstanova zvacca nia moža, bo «jana tolki stvarajecca. Voś stvorycca hety licej, tady i budzie padavać zajavu na nadańnie jakoha-niebudź imia».
30 červienia kala troch dziasiatkaŭ liceistaŭ ź plakatami «Dzieci — nie bijamasa», «Viarnicie naš licej» i inš. stali ŭ šerah pad voknami Minadukacyi, kala Domu ŭradu. Da liceistaŭ tak i nia vyjšaŭ nivodzin čynoŭnik, tolki z voknaŭ pazirali.
Ciapier z vulicaŭ zmahańnie za licej pierachodzić u biurakratyčnyja kalidory. 2 lipienia baćki navučencaŭ i nastaŭniki praviali schod inicyjatyŭnaj hrupy pa stvareńni hramadzkaha abjadnańnia «Biełaruski licej». Kiraŭnikom byŭ abrany doktar filalahičnych navuk, prafesar Michaś Tyčyna. Dakumenty dla rehistracyi abjadnańnia buduć padrychtavanyja ciaham miesiaca. Hramadzkaje abjadnańnie — heta taki pierakidny mastok da niedziaržaŭnaha Humanitarnaha liceju. Naturalna, jano budzie mieć svoj rachunak dy inšyja rekvizyty, što daść mahčymaść atrymlivać dapamohu ad achviaradaŭcaŭ.
Ale całkam admaŭlacca ad vuličnaje baraćby liceisty taksama nie źbirajucca. «Hałoŭnaje dla nas — zachavać vykładčycki kalektyŭ i dać dzieciam mahčymaść vučycca. Usie vykładčyki buduć padavać zajavy i na pryjom u novy licej, jaki stvaraje ŭłada», — kaža Ŭładzimier Kołas. Adnak, kali čynoŭniki nia prymuć uvieś kalektyŭ, a pačnuć «adsieŭ niačesnych», ad pracy admoviacca ŭsie. U hetkim razie navučalny hod moža pačacca z strajku. «Dzieci ŭ nas razumnyja: jany mohuć i nie chadzić u škołu dva miesiacy, a potym usio adno nahoniać prahramu», — skazaŭ na schodzie adzin z baćkoŭ.
Arkadź Šanski
Kamientary