ekanamičnaja chronika

11 vieraśnia 2003h.

Planavany deficyt biudžetu — 0,5% ad VUP

Jak stała viadoma ahienctvu BiełaPAN z kuluaraŭ parlamentu, urad planuje skłaści biudžet nastupnaha hodu z deficytam 0,5% ad vałavoha ŭnutranaha praduktu krainy pry źnižeńni siaredniaje padatkovaje nahruzki na 2%. Sioleta deficyt biudžetu składaje 1,5%. Mahčymy rost cenaŭ na haz raspracoŭščyki ŭ raźlik nia brali. Eksperty ličać taki mały deficyt nierealistyčnym.

Abychodnyja šlachi «Hazpromu»

«Hazprom» moža vykarystać kanflikt ź Biełarusiaj jak dadatkovuju nahodu dla budaŭnictva hazapravodu pa dnie Bałtyjskaha mora ŭ Niamieččynu. A druhuju čarhu hazapravodu «Jamał — Eŭropa», što idzie praź Biełaruś, — adkłaści. Zrabić heta dazvalajuć i plany budaŭnictva novaha hazapravodu z Kazachstanu praz Ukrainu da miažy z Vuhorščynaj, pa jakim patrebny abjom hazu budzie traplać na Zachad. Spryjaje i novaje rasiejska-polskaje hazavaje pahadnieńnie. Raniej «Hazprom» abaviazvaŭsia prakłaści druhuju halinu hazapravodu «Jamał — Eŭropa» ŭ Polšču da kanca 2001 h., a potym abaviazacielstvy anulavaŭ. Deklarujecca tolki, što sprava taje investycyi budzie vyrašanaja da kanca 2004 h. A zaplanavany abjom hazu pojdzie ŭ Polšču inšymi šlachami.

26016 kuflaŭ

Mahiloŭski ABEZ zatrymaŭ žychara Pinsku, jaki pieravoziŭ na aŭtamabili MAZ 13008 litraŭ piva rasiejskaj vytvorčaści biez supravadžalnych dakumentaŭ. Kantrabanda acenienaja ŭ 33 młn rubloŭ.

Navinki Frankfurckaha aŭtasalonu

Na 60-m mižnarodnym Frankfurckim aŭtasalonie prezentavana 125 navinak. Baraćba za pieršaje miesca ŭ holf-klasie razhorniecca miž «Falksvahienam Holfam V», «Opelem Astraj» i «Mazdaj-3». Novy «Holf» bolšy za papiarednija madeli. Daŭžynia pavialičyłasia na 57 mm, šyrynia — na 24, a vyšynia — na 39. Pasažyry na zadnich siadzieńniach majuć 6,5 lišnich santymetraŭ prastory dla noh. «Holf» maje 6 padušak biaśpieki, 5 padhałoŭnikaŭ, traŭmabiaśpiečnyja rulavuju kalonku i pedalny vuzieł. Tryvałaść kuzava vyrasła na 80%. «Opel Astra» prapanuje pakupnikam pryncypova novy dyzajn i šyrokuju hamu ruchavikoŭ (ad 80 da 200 k.s.). Kozyry «Astry» — šmatlikija elektronnyja «pamočniki kiroŭcy».

«Mazda» zrabiła akcent na spartovaści. Pakupnikam prapanujuć mahutnyja vysokaabarotnyja matory ŭ jaskravaj i stylovaj abałoncy.

Prychilnikaŭ «BMV» važdanina ŭ holf-klasie nie čaplaje: źjavilisia najnoŭšaja «šaściorka» i pazadarožnik X3! «Šaściorka» «BMV» budzie kaštavać 110 tys. dalaraŭ, X3 — 60 tys.

Kanservatyŭny «Jahuar» pryvioz na vystavu pieršy ŭ historyi firmy seryjny «ŭniversał» «X-Type Estate». Źmianilisia linija dachu, dźviery, bakavyja dekaratyŭnyja paneli, zadni bamper. «Volva», kaleha «Jahuaru» pa fordaŭskim cechu, ź vialikaj pompaj prezentavała novaje pakaleńnie S40.

Niamieččynie treba daktary

Dziažurstva ŭ bolnicy — heta praca, a nie adpačynak, abviaściŭ u aŭtorak Eŭrapiejski trybunał, adkazvajučy na zvarot niamieckaha lekara. Dahetul u Niamieččynie ličyłasia, što pracoŭny čas medyka — heta chviliny, patračanyja na pracedury, a nie na čakańnie ŭ dziažurcy. Ale doktar padčas dziažurstva nia moža volna rasparadžacca svaim časam. Ciapier niamieckim bolnicam daviadziecca nabrać ad 15 da 27 tys. daktaroŭ, niekalki socień tysiač medsiostraŭ i sanitaraŭ. Nieviadoma, adkul va ŭmovach pustych fondaŭ i reformy niamieckaj systemy achovy zdaroŭja ŭziać srodki, dzie znajści patrebnych daktaroŭ. U Niamieččynie tolki siem tysiač biespracoŭnych medykaŭ.

Zołata ŭ canie

Zołata nabliziłasia da 7-hadovaha cenavaha maksymumu — 382,8 dalara za uncyju. Hetamu paspryjała padzieńnie amerykanskaj valuty. Z pačatku hodu dalar patańnieŭ u paraŭnańni z eŭra na 6,6%. Ceny na zołata, adpaviedna, pavialičylisia na 9,9%.

SP

• 0
• 0
• 0
• 0
• 0
• 0
• 0
• 0