Chałopik prarasiejski

Deputat Chałopik adstojvaje spravu intehracyi z Rasiejaj. Jahonyja kalehi pa deputackaj hrupie «SER» ličać hetyja vykazvańni «asabistaj dumkaj».

Lider deputackaj hrupy «Spryjańnie ekanamičnym reformam» (SER) Kiryła Chałopik vystupiŭ z krytykaj prahramy dziejańniaŭ uradu na 2004 hod. U prapanavanym kabinetam Sidorskaha na zaćviardžeńnie PPNS tradycyjnym zakonaprajekcie «Ab asnoŭnych kirunkach zamiežnaj i ŭnutranaj palityki Biełarusi» «intehracyjny» punkt upieršyniu adsutničaŭ. Niama i planaŭ uvodzić z 2005 h. rasiejski rubiel. Stratehija adnosinaŭ z adzinym sajuźnikam ukłałasia ŭ adzin abzac: «Supracoŭnictva z RF u sfery zamiežnaekanamičnaj dziejnaści budzie skiravanaje hałoŭnym čynam na realizacyju prahramy dziejańniaŭ RB i RF pa realizacyi damovy pra stvareńnie sajuznaj dziaržavy. Atrymajuć dalejšaje raźvićcio handlova-ekanamičnyja dačynieńni z rehijonami Rasiei. Asablivaja ŭvaha ŭradu budzie nadadzienaja realizacyi mierapryjemstvaŭ pa supracoŭnictvie z Maskvoj». Voś i ŭsio.

Kali b nie K.Chałopik, na nudny štohadovy dakument, mahčyma, nichto, akramia zamiežnych dyplamataŭ, nie źviarnuŭ by ŭvahi. Punkt ab pryjarytetnym partnerstvie z Rasiejaj musić viarnucca va ŭradavy dakument! Hetuju dumku deputat ahučvaŭ publična, i nia raz, što ŭ rachmanaj pałacie zdarałasia redka. K.Chałopik miarkuje, što prablema palahaje ŭ niežadańni biełaruskich uładaŭ unifikavać zakanadaŭstva z Rasiejaj.

Deputat ad Stolinščyny Ivan Paškievič nia schilny ŭviazvać «intehracyjnaść» kalehi ź jahonymi vybarčymi planami. «Chałopik źjaŭlajecca aŭtaram alternatyŭnaha zakonaprajektu «Ab asnoŭnych kirunkach zamiežnaj i ŭnutranaj palityki Biełarusi», praz kožny artykuł jakoha čyrvonaj nitkaj prachodziać intehracyjnyja nastroi z Rasiejaj. Ciapier i prajekt Chałopika, i ŭradavy zakonaprajekt abmiarkoŭvajucca ŭ deputackich hrupach. Asabista ja addaju pieravahu prajektu Saŭminu», — skazaŭ I.Paškievič.

Jon nia viedaje, intehracyjny pył — asabistaja inicyjatyva deputata Chałopika abo pazycyja niejkaj hrupy. Razam z tym, Ivan Paškievič skieptyčna stavicca da dumki, što kaleha adlustroŭvaje intaresy rasiejskaha biznesu. «Ekanamičnyja adnosiny z Rasiejaj skłalisia takija, što być łabistam bujnych rasiejskich kampanij moža tolki adzin čałaviek u krainie — kiraŭnik dziaržavy», — padkreśliŭ I.Paškievič.

Były dyrektar Vyhałavickaj ptuškafabryki, siabar deputackaj hrupy «Respublika» Ihar Basłyk taksama ličyć, što «intehracyja z Rasiejaj — adzin z hałoŭnych pryjarytetaŭ u dziejnaści ŭradu. Ale nie hałoŭny». Uvohule, ličyć siabar «Respubliki», «Biełaruś hublaje stratehičnaha partnera ŭ asobie Rasiei i stanovicca bufernaj zonaj pamiž Rasiejaj i NATO. Vidać, u Chałopika byli pryčyny zrabić padobnuju zajavu». Adnak nazyvać tyja samyja pryčyny deputat nia staŭ.

Siabar hrupy «SER» Andrej Narejka zaścierahaje, što zajavy kiraŭnika hrupy — asabistaja dumka deputata K.Chałopika. «Pierš čym rabić hetyja zajavy, Kiryła Chałopik nie abmiarkoŭvaŭ prablemy z usioj hrupaju, — skazaŭ deputat. — Heta jahonyja asabistyja pierakanańni». Zrešty, i A.Narejka miarkuje: «Akcenty ŭ adnosinach z Rasiejaj varta rasstavić».

Napiaredadni vybaraŭ takija zajavy z boku deputata, jaki źbirajecca paŭtorna zmahacca za mandat, vyhladajuć i vyklikam, i prahramnym krokam. Takim čynam, prarasiejskaja partyja farmujecca nie siarod demakratyčnaje apazycyi, čym doŭha pałochali dziaržaŭnyja ŚMI, a ŭ samim apłocie łukašenkaŭcaŭ. A na čale jaje prajaviŭsia deputat ź nieprezydentabelnym proźviščam.

Hleb Chmialnicki

• 0
• 0
• 0
• 0
• 0
• 0
• 0
• 0