Užo 20 hod zapar u vioscy Zabrodździe na Vialejščynie 9 traŭnia źbirajecca hramada dziela ŭšanavańnia Dnia Pieramohi. Ładzić mierapryjemstva mastak Barys Cytovič — tamtejšy žychar, jaki pieratvaryŭ hłuchi kutok u sapraŭdny muzej pad adkrytym niebam.
Paśla zakančeńnia Teatralna-mastackaha instytutu jon razam z žonkaj Valancinaj u 1974 h. pierajechaŭ siudy na stałaje žycharstva. U sarakahadovy jubilej pieramohi ŭ Zabrodździ byŭ zakładzieny memaryjalny park i naradziłasia tradycyja śviatkavańnia hetaj padziei šyrokim kołam siabroŭ, ziemlakoŭ i haściej z roznych kutkoŭ. Drevy byli pasadžany piśmieńnikami i mastakami, vajskoŭcami i vučniami, i ciapier na vysokim bierazie raki Naračanki vyras ładny park.
Z časam siadziba mastaka i susiednija chaty pieratvarylisia ŭ sapraŭdnuju ekspazycyju, jakaja padaje ład žyćcia pačatku minułaha stahodździa i ŭtrymlivaje jak etnahrafičnyja rysy zvyčajnaj vioski, tak i cikavyja rečy vajskovaha pobytu časoŭ pieršaj suśvietnaj. Apošnija ekspanaty nievypadkovyja, bo hetyja miaściny bahatyja na padziei i toj vajny. Namahańniami mastaka ŭ lesie niedaloka ad vioski la šašy na miescy vajskovaha špitalu i mohiłak pastaŭlena maleńkaja kaplička ŭ pamiać palehłych carskich žaŭnieraŭ. Mienavita malebien na hetym miescy pad supravadžeńnie zvona, vyrablenaha z artyleryjskaj hilzy, raspačynaje sustrečy 9 traŭnia. Tak było i ciapier, kali ŭžo ŭ dvaccaty raz źjechalisia ludzi roznaha vieku (usiaho niedzie dźvie sotni), kab sustrecca z nahody Pieramohi.
Poŭny varyjant artykułu hladzicie ŭ hazecie "Naša Niva".
Usievaład Ścieburaka, Zabrodździe—Miensk
Kamientary