Piać tysiač śmiełych

Šmatludnych vuličnych akcyj Miensk nia bačyŭ niekalki hadoŭ. Tym dziŭniej, što 18 kastryčnika na Kastryčnickuju płošču sabrałosia kala 5000 čałaviek.

U horadzie napiaredadni amal nie było vidać afišak, a niezaležnaja presa baicca drukavać abviestki, kab nie začynili. Zastajecca Internet. Tamu siarod udzielnikaŭ akcyi pieravažali maładyja tvary — tyja, chto nie baicca dubinak i maje alternatyŭnyja BT krynicy infarmacyi. Źjaŭleńnie Łukašenki na vializnym ekranie, ustalavanym na płoščy, i raspovied pra «ašałamlalnyja vyniki» vybaraŭ i referendumu vyklikali vybuch abureńnia. Sproba prarvacca da rezydencyi skončyłasia zatrymańniami: amapaŭcy zapoŭnili maładymi ludźmi dva aŭtobusy. Zrešty, hetym siłavyja akcyi 18-ha j skončylisia. Potym byŭ mitynh na Kastryčnickaj, dzie rej vioŭ Pavał Sieviaryniec, a nia lidery partyj. Paśla mitynhu — pachod da KDB. Staršynia hetaj arhanizacyi Leanid Jeryn sam vyjšaŭ da mitynhoŭcaŭ i pa vynikach razmovy vypuściŭ zatrymanaha «zubroŭca» Jaŭhiena Afnahiela.

Akcyja 19-ha pravodziłasia jašče bolš spantanna, čym papiaredniaja. Tolki MUS abvieściŭ, što maje siły dla «naviadzieńnia paradku». Viadoma, 19-ha heta zrabić było łaćviej: mižnarodnyja naziralniki ŭžo paraźjaždžalisia. Adnak niekalki sotniaŭ čałaviek iznoŭ pryjšli na Kastryčnickuju. Dla razhonu demanstrantaŭ pryhnali nia tolki milicyjantaŭ i amapaŭcaŭ. Za Pałacam Respubliki stajali jašče j 20 hruzavikoŭ z sałdatami ŭnutranych vojskaŭ. Razhaniali biaźlitasna. Bili j zatrymlivali žurnalistaŭ. U aŭtobus z zatrymanymi zapchnuli 11-hadovaha chłopčyka: kali jon pasprabavaŭ vyskačyć, amapaviec kinuŭ jaho na padłohu aŭtobusa. Tolki paźniej jamu ŭdałosia vyśliznuć. Amal usie zatrymanyja byli asudžany na «sutki» aryštu — ad 3 da 15, niekatorym vypisvali vielizarnyja štrafy — pa 40—50 b.v.

Arkadź Šanski

Biełaruskaja apazycyja «admaŭlajecca ad praviadzieńnia vuličnych akcyj i pierachodzić na novuju stratehiju baraćby z uładaj». Pra heta zajaviŭ na pres-kanferencyi lideraŭ «Piaciorki+» Siarhiej Kalakin: «Vidavočna, što šlacham vuličnych akcyj pakul my nie hatovyja źmieści isnuju ŭładu». Jon padkreśliŭ, što «lidery apazycyi nia mohuć iści na toje, kab kidać maładych ludziej pad dubinki». Jak paviedamiŭ Kalakin, «apazycyja zaklikaje hramadzianaŭ pierajści na aktyŭnaje palityčnaje supracoŭnictva z apazycyjaj i sabrać siły dla budučych vystupaŭ».

Adnak, jak stała viadoma «NN» u sieradu, moładź maje namier praciahvać akcyi pratestu na Kastryčnickaj płoščy Miensku suprać falsyfikacyi vynikaŭ hałasavańnia ŭ tradycyjny za apošnija dni čas — pačynajučy z 18.00.

• 0
• 0
• 0
• 0
• 0
• 0
• 0
• 0