U Varšavie padviali vyniki pieršaha naboru na prahramu Kalinoŭskaha. U lipieni 2006 h. na navučańnie byli pryniatyja 244 asoby, ź ich 20 adsotkaŭ nia vykanała ŭmovaŭ prahramy albo parušyła jaje pryncypy.
U lipieni 2006 hodu na navučańnie pa Prahramie Kalinoŭskaha byli pryniatyja 244 asoby, jakija raspačali vučobu pavodle 77 roznych napramkaŭ u 37 vyšejšych navučalnych ustanovach u 15 haradoch usioj Polščy.
Najčaściej biełarusy abirali infarmatyku, prava, kiravańnie, palitalohiju, mižnarodnyja adnosiny, a taksama eŭrapieistyku, malekularnuju bijalohiju, skandynaŭskuju filałohiju dy inžyneryju.
Usie ŭdzielniki prahramy atrymali štomiesiačnuju stypendyju ŭ pamiery 450 dalaraŭ ZŠA, biaspłatny kamplekt dapamožnaj litaratury pa polskaj movie, ź biudžetu prahramy byli taksama vydzielenyja srodki na apłatu knižak, patrebnych dla vučoby na kankretnym fakultecie. Bieručy pad uvahu nieabchodnaść adaptacyi j składnaści, źviazanyja ź pieršym časam navučańnia, kožnamu studentu byŭ pryznačany admysłovy asystent, jaki dapamahaŭ aklimatyzavacca va ŭmovach polskaj systemy navučańnia.
Niahledziačy na šyroki spektar padtrymki, nia ŭsie studenty vykarystali mahčymaść navučańnia, — kaža kiraŭnik prahramy doktar Jan Malicki. Niekatoryja ŭdzielniki prahramy nia zdoleli adaptavacca ŭ Polščy, častka nia spraviłasia z navučalnaj prahramaj, byli navat i takija, chto ŭvohule ani razu nie źjaviŭsia ŭ svajoj navučalnaj ustanovie.
Ja. Malicki: Nia vykanała ŭmovaŭ prahramy albo parušyła jaje pryncypy kala 40 asobaŭ, što składaje 20% ad usich udzielnikaŭ prahramy. Takaja samaja kolkaść studentaŭ adpadaje j z polskich navučalnych ustanovaŭ u vyniku zvyčajnaha navučalnaha pracesu. Pry tym treba zaŭvažyć, što kalinoŭcy apynulisia ŭ značna horšaj sytuacyi, čym palaki, pakolki jany mieli składanaści j z movaj i z pryvykańniem da ŭmovaŭ navučańnia ŭ Polščy. My imkniemsia dapamahać studentam va ŭsim, adnak jość praviły, jakich my nia možam parušyć. Student pavinien dasiahnuć taho ŭzroŭniu, jaki patrabuje navučalnaja prahrama kankretnaha napramku.
Rektar Varšaŭskaha ŭniversytetu Katažyna Chałasińska‑Macukaŭ pryznałasia, što kali prahrama tolki stvarałasia, jana mieła sumnievy nakont realizacyi jaje hałoŭnaj mety, bajučysia, što inicyjatyva moža mieć vyklučna pakazny charaktar.
K. Chałasińska‑Macukaŭ: My ŭsie pavinny być zadavolenyja raźvićciom hetaj prahramy j mieć pačućcio vykananaha abaviazku adnosna našych uschodnich susiedziaŭ. Takim čynam, my vykonvajem doŭh pierad tymi, chto ŭ ciažkija časy kaliści dapamahaŭ nam.
Finansavańnie prahramy imia Kastusia Kalinoŭskaha adbyvajecca ŭ ramkach prajektu «Polska Pomoc», jaki ažyćciaŭlaje Ministerstva zamiežnych spravaŭ Polščy. Hieneralny dyrektar Departamentu supracy j raźvićcia MZS Polščy Ježy Pamianoŭski zaznačyŭ, što jahonaje viedamstva budzie praciahvać finansavańnie padobnych prajektaŭ.
Je. Pamianoŭski: My ličym, što tolki taja finansavaja dapamoha, jakaja skiravanaja na adukacyju, na ŭzmacnieńnie hramadzianskaj supolnaści j samavyznačeńnie nacyi, źjaŭlajecca padstavaj dla ekanamičnaha, palityčnaha j hramadzianskaha raźvićcia. My budziem padtrymlivać prajekty padobnaha nakirunku, nu j, viadoma ž, hety kankretny prajekt.
Miž inšym finansavańniu prahramy Kalinoŭskaha była pryśviečanaja j razmova Alaksandra Milinkieviča z ambasadarami krainaŭ Eŭraźviazu.
A. Milinkievič: My razhladajem hetych studentaŭ jak budučuju biełaruskuju elitu. Dla nas vielmi važna, kab hetyja ludzi nabyli jak maha bolš šyrokija viedy. Było b vielmi karysna, kab jany mieli mahčymaść na semestar albo dva pajechać u inšyja krainy. Biełaruś niepaźbiežna budzie intehravacca ŭ Eŭropu j tyja ludzi pavinny vałodać dastatkovymi viedami pra abjadnanuju Eŭropu, viedami pra reformy ŭ tych krainach, jakija jašče niadaŭna byli sacyjalistyčnymi. Akramia taho, my chacieli b, kab prahrama pašyrałasia. Siońnia asnoŭny ciažar niasie Polšča, vielmi važna, kab da jaje dałučylisia j inšyja.
Užo raniej razmovy pra mahčymaść navučańnia studentaŭ u inšych krainach Eŭropy pravodzilisia sa švedzkimi ŭładami. Alaksandar Milinkievič miarkuje, što ciapier ŭdasca značna pašyryć koła eŭrapiejskich navučalnych ustanovaŭ dla ŭdzielnikaŭ prahramy.
Prahrama Kastusia Kalinoŭskaha budzie praciahvacca j u nastupnym navučalnym hodzie. Druhi nabor budzie składacca vyklučna z tych studentaŭ i daktarantaŭ, jakija byli adličanyja sa svaich navučalnych ustanovaŭ albo jakija nia mohuć praciahvać navučańnie ŭ suviazi sa svaimi palityčnymi pohladami. U hetym hodzie kolkaść udzielnikaŭ prahramy nie pavinna pieravysić 80 čałaviek.
Anžalika Mielnikava paśla źniknieńnia nabyła dźvie kvatery ŭ Minsku90
Anžalika Mielnikava paśla źniknieńnia nabyła dźvie kvatery ŭ Minsku
«Ź piaci varyjantaŭ try kvatery zdavalisia tolki hramadzianam Biełarusi». Rasijanie pierajechali ŭ Homiel paśla ataki USU na Bransk — što ich dzivić?2323
Kamientary