Kandydat ad pryrody

Milinkievič idzie ad zialonych. U tym, što Alaksandar Milinkievič budzie kandydavać, nie sumniavaŭsia nichto. Nichto nie čakaŭ, što biespartyjnaha haradzienca Milinkieviča ŭ jakaści kandydata na prezydenckija vybary pieršaj vyłučyć Centralnaja rada Biełaruskaj partyi zialonych na svaim pasiadžeńni ŭ Homieli. Vyłučeńnie adbyłosia na pasiadžeńni Centralnaj rady Biełaruskaj partyi zialonych, što ŭvachodzić u kaalicyju “Piaciorka+”. Štab Milinkieviča ŭznačalić kiraŭnik Fondu lakalnaha raźvićcia, kolišni deputat Viarchoŭnaha Savietu SSSR Viktar Karniajenka.

Vyłučeńnie adbyłosia ŭ Homieli, bo tam znachodziacca kiroŭnyja orhany partyi. Milinkievič sam prapanavaŭ svaju kandydaturu tym partyjam ad kaalicyi, što nia mieli svajho kandydata.

Sp.Milinkievič spadziajecca jak na padtrymku inšych partyj, tak i rehijony. “Kamanda budzie upłyvać na ŭsie katehoryi nasielnictva. Budziem sprabavać schilić na svoj bok usich — i namenklaturu, i nastaŭnikaŭ, i uračoŭ, i kožnuju babulku”, — zajaviŭ palityk karespandentu “NN”.

U vypadku abrańnia adzinym kandydatam kampanija Milinkieviča budzie pabudavana na ahulnademakratyčnych kaštoŭnaściach i projdzie pad lozunhami jadnańnia z Eŭropaj, rynkavaj ekanomiki, niezaležnaści, padtrymki nacyjanalnaj kultury.

U subotu kandydatura Milinkieviča budzie prapanavana Sojmu Partyi BNF. “Ja vitaju vyłučeńnie Milinkieviča i miarkuju, što Sojm padtrymaje jahonuju kandydaturu. Milinkievič — mienavita toj kandydat, jakoha padtrymlivaje Partyja BNF”, — zajaviŭ “NN” staršynia partyi V.Viačorka.

Palityk kaža, što ŭskładaje vialikija spadzievy na pracu ŭ kamandzie — ź inšymi kandydatami ad kaalicyi: “Ja — kamandny čałaviek. My budziem pracavać razam, budziem razam jeździć pa rehijonach”. Kanca travienia palityk čakaje ź niepakojem: “Kali nazavuć imia adzinaha kandydata, ci zdolejuć inšyja partnery pa kaalicyi adkinuć ambicyi i padparadkavacca supolnamu rašeńniu?”

Šyrokim masam jahonaje imia pakul nieviadomaje. Ale, miarkujuć jahonyja pry¬chilniki, Domaš pačynaŭ taksama z nula, a ŭ 2001-m sabraŭ najbolš podpisaŭ u svaju padtrymku. Dziakujučy štabu na čale ź Milinkievičam. Ciapier Milinkievič idzie na vybary sam.

U asiarodździ demakratyčnych aktyvistaŭ pašyranaje mierkavańnie, što “padtrymajem luboha, zdolnaha na niestandartnyja chady i nastrojenaha na pieramohu”. Samim miescam vyłučeńnia pieršaje Milinkievič užo dakazaŭ.

Aleh Rajaviec

Aleś Milinkievičnaradziŭsia 25 lipienia 1947 h. u Horadni ŭ pravasłaŭnaj siamji. Kandydat fizika-matematyčnych navuk, tema dysertacyi “Mechanizm hieneracyi zvyšmahutnych łazernych impulsaŭ”. Stažavaŭsia va ŭniversytecie Manpelje (Francyja) i Kalifarnijskim universytecie. Pracavaŭ zahadčykam katedry Setyfskaha universyteta (Alžyr), dacentam Haradzienskaha ŭniversytetu. U 1990—1994 h. zajmaŭ pasadu namieśnika staršyni Haradzienskaha harvykankamu. Byŭ kiraŭnikom Biełaruskaj asacyjacyi resursavych centraŭ. Viadomy krajaznaŭca i historyk. Vioŭ histaryčnuju prahramu na haradzienskaj televizii. Znajšoŭ pachavańnie apošniaha karala Rečy Paspalitaj Stanisłava Aŭhusta Paniatoŭskaha, restaŭravaŭ najstaražytniejšy ŭ Eŭropie haradzienski viežavy hadzińnik (XV—XVI st.).

• 0
• 0
• 0
• 0
• 0
• 0
• 0
• 0