Dyskahrafija

Pieśnia hodu-2005, Budź razam z nami, Cover Band. CD1.

Pieśnia hodu-2005

«Pieśnia hodu-2005». Častka pieršaja. Roznyja vykanaŭcy. ANT, 2005

Pradusarskaja kantora ANT na čale ź Jahoram Chrustalovym saskrebła na adzin dysk apošnija pop-hity krainy, što prahučali ŭ adnajmiennym teleprajekcie ŭ pačatku viasny.

Bolšaść miescaŭ addadziena maładym. Zamiž Darafiejevaj — Hanna Mušak, na miesca «Siabroŭ» dobra ŭpisałasia «Atlantyka», Jałfimaŭ padmianiŭ Dajneku. Z 21 pieśni tolki adna zaśpiavanaja pa-biełarusku. I heta «Słuckaja brama» ŭ vykanańni «Kramy», jakuju niemaviedama jakim vietram zaniesła pamiž Hrybalovaj i «Prymaj Vieraj». Dobry padarunak usim radyjnikam Biełarusi. Ale, kab im žyłosia spakojna i Ministerstva im nie vyhavorvała, padobnyja dyski musiać źjaŭlacca štotydzień.

Najlepšaje z dysku: Hiuneš («Nazovi mienia po imieni»), «Krama» («Słuckaja brama»), «Pryma Viera» («Polot»), Jałfimaŭ («Anhieł»).

▶

Budź razam z nami.

«West Records», 2005

Novy dysk «Kramy» zdolny zadavolić kožnaha — i taho, chto sabraŭ kalekcyju «kramaŭskich» albomaŭ na kasetach, i taho, chto ŭbačyŭ «Kramu» ŭpieršyniu na «Pieśni hodu-2005» na ANT. Zadavolilisia i sami muzykanty, jany ŭpieršyniu za 15-hadovuju historyju kalektyvu atrymali zapis, jakoha žadali. «Krama» ŭ studyi nijak nie mahła dasiahnuć svajho «firmovaha», viadomaha z kancertaŭ huku. Zaminali ŭmovy (albom «Kamendant» pisaŭsia ŭ bambaschoviščy), niepastajanny skład, asabistyja prablemy. Paśla albomu «Što dapamoža nam» (1998 h.) Varaškievič dumaŭ raspuścić hurt. Toj albom pisaŭsia niby pad prymusam: tvorčy kryzis, śmierć Iharavych dzieda, babuli, baćki, razvod z žonkaj, alkahol — usio heta ŭ adzin čas atakavała lidera «Kramy». Hurt vystajaŭ: choć doŭha nie było novych piesień, davaŭ kancerty i nahadvaŭ pra siabie.

Na hetym dysku sabranyja 14 najlepšych piesień «Kramy» roznych časoŭ. Usio syhrana, śpieta, zapisana nanoŭ. Admysłova dla hetaha muzyki źniali katedž u Baranavičach, pazyčyli dobruju aparaturu i miesiac vychodzili z domu tolki dla taho, kab parybačyć.

Bolšaść piesień z albomu «Chvory na rok-n-roł» — lehiendarnaha debiutu «Kramy» (1993). Aranžyroŭki «Vypi sa mnoj», «Biažy, chłopiec» nie paznać. Pieśni «Što dapamoža nam», «Słuckaja brama» zapisanyja razam z džaz-bendam «Apple Tea». Vakał Varaškieviča zahučaŭ bolš upeŭniena i jarka. U standartny šerah piesień alkaholnaj, studenckaj i histaryčnaj tematyki dobra ŭpisalisia mienš viadomyja: «Mama» — spoviedź syna pierad maci — i «Pachodnaja» — varyjacyi na temu Adyseja. Varta mieć u kalekcyi kožnamu.

Siarhiej Budkin

▶

Cover Band. CD1

«Cover Band. CD1». «Apple Tea». (p) «Apple Tea», 2004. Nie dla prodažu

Capraŭdny rarytet. Takoha vydańnia nie było ŭ historyi biełaruskaj papularnaj muzyki. Ci zdarałasia padobnaje ŭ muzycy suśvietnaj — nie biarusia śćviardžać, bo niejak užo niečakana vyhladaje albom znakamitaj džaz-hrupy.

Miarkujcie sami: z 24 trekaŭ — tolki adzin ułasna džazavy. Rešta — klasyka suśvietnaj i savieckaj pop-muzyki, hity Ihlesijasa, Stynha, «BoneyM», Rataru i h.d. «Harbatnyja» muzyki sabrali na dysku častku repertuaru, z dapamohaj jakoha jany zarablajuć muzykanckija «čarku dy skvarku», hrajučy na prezentacyjach, viečarynach pa speczaprašeńniach. Kali chočacie viedać, što takoje «Apple Tea» ŭ paciašalnym (bolš pryziemlena — chałturnym) varyjancie — pastaŭcie dysk na prajhravalnik.

Ale chałtura ad chałtury roźnicca. Hety CD, zapisany ŭ studyi, jakaja pracuje ŭ Baranavičach pry kaściole i karystajecca ŭsio bolšaj papularnaściu siarod muzykaŭ, nijak nielha ličyć hetkaj zabaŭkaj, zroblenaj levaj rukoj praz pravaje vucha. Usio vykonvajecca naležnym čynam, biez kardynalnych źmienaŭ u aranžyroŭcy, što taksama śviedčyć pra vysokuju klasu muzykaŭ. Albom nia znojdzieš u prodažy, atrymać jaho možna padčas vystupaŭ hrupy. Bo chto ž prosić hrošy za vizytoŭku? Ale kali hrošy prapanujecie, muzyki, dumaju, nie admoviacca. Adno aŭtary «Łandyšaŭ» adličeńniaŭ nie dačakajucca…

Na sajcie hrupy www. apple-tea.com abjaŭleny konkurs na składańnie repertuaru nastupnaha takoha dysku. A pakul pieśni vybirajucca, «Apple Tea» piša ŭ Baranavičach čarhovy albom z čysta džazavym repertuaram.

Kavyrnuty SŁUCHAČ

∎

• 0
• 0
• 0
• 0
• 0
• 0
• 0
• 0