Пасольства Ізраіля ў Беларусі зноў спыніла выдачу віз з-за працоўнага канфлікту. Пра гэта гаворыцца ў паведамленні, размешчаным на сайце дыпмісіі.
Згодна з працоўнымі санкцыямі МЗС Дзяржавы Ізраіль ад 4 сакавіка 2014 года пасольства гэтай краіны ў Беларусі не будзе аказваць консульскія паслугі насельніцтву.
«У сувязі з тым што Міністэрства фінансаў Ізраіля адмаўляецца вырашыць даўні працоўны канфлікт з Міністэрствам замежных спраў, ізраільскія дыпламаты аднавілі працоўныя санкцыі, — гаворыцца ў паведамленні. — Можа падацца дзіўным, што дыпламатычная службы дзяржавы аказалася «ўцягнутай» у працоўны канфлікт. Але мы, ізраільскія дыпламаты, спадзяемся, што разумныя патрабаванні тых, хто прадстаўляе дзяржаўныя інтарэсы за мяжой, чый абавязак — ствараць міжнародную рэпутацыю Ізраіля і падтрымліваць нацыянальную бяспеку, будуць задаволеныя».
Пасольства Ізраіля ў Беларусі не будзе размяшчаць на сваім сайце і ў сацыяльных сетках нейкую інфармацыю да тых пор, пакуль працоўны канфлікт не будзе належным чынам вырашаны.
Тэрміны аднаўлення выдачы віз таксама не паведамляюцца.
Нагадаем, з 24 чэрвеня па 1 жніўня мінулага года ізраільскія пасольствы па ўсім свеце, у тым ліку ў Беларусі, часова спынялі выдачу ізраільскіх віз у сувязі з працоўным канфліктам.
Канфлікт доўжыўся з вясны 2013 года — Міністэрства замежных спраў Ізраіля спрабавала дабіцца паляпшэння ўзроўню аплаты і ўмоў службы ізраільскіх дыпламатаў за мяжой, а таксама структурных змяненняў у самім міністэрстве.
Паколькі за гэты час Міністэрства фінансаў Ізраіля не зрабіла ніякіх захадаў па задавальненні патрабаванняў МЗС, з 24 чэрвеня прафсаюз работнікаў знешнепалітычнага ведамства перайшоў да больш рашучых дзеянняў.
Як паведамляла ізраільская прэса, у сярэдзіне чэрвеня акруговы суд па працоўных канфліктах абавязаў міністра фінансаў Яіра Лапіда неадкладна пачаць перамовы з рабочым камітэтам МЗС.