Тытулаваны біятланіст і муж Дар'і Домрачавай Оле-Эйнар Б'ёрндален трэніруецца цяпер у Мінску. У беларускай сталіцы ён рыхтуецца да новага сезона і прабудзе да нараджэння дзіцяці.
— Я ўжо не першы раз трэніруюся ў «Раўбічах». Тут мне падабаецца лыжаролерная траса, якая праходзіць праз лес. Дзякуючы ветранай абстаноўцы цікавай выходзіць праца на агнявым рубяжы, а ў выпадку дрэннага надвор'я ёсць крыты цір. Для летняга біятлону гэты комплекс увогуле адзін з найлепшых.
Адказваючы на пытанне, ці трэніраваўся Оле-Эйнар з беларускай мужчынскай камандай і ці хацеў бы ён даць ім парады, знакаміты біятланіст заўважыў, што ў нашай зборнай добрыя трэнеры і ў яго дапамозе няма неабходнасці.
— Я бачыў, як некаторыя спартсмены выглядаюць на трасе, але, на жаль, не бачыў, як яны выглядаюць на стрэльбішчах. Я бачыў многіх юніёраў, і тое, што яны робяць на трасе, — гэта вельмі добра. Расце дастойная змена. Вядома, гэта справа не аднаго года, пройдзе гады тры-чатыры, яны падрастуць, і ў іх ёсць будучыня. Было б выдатна, калі б я мог ім даць парады, але ў іх ёсць добрыя трэнеры і годныя прыклады для пераймання.
Працягваючы тэму тренерства, Б'ёрндален сказаў, што ён будзе дапамагаць Домрачавай трэніравацца.
— Але ў Дар'і ёсць свой трэнер, і ён працягне з ёй працаваць. Я думаю, яна добра адновіцца і працягне выступаць.
Б'ёрндален таксама пахваліў «Гонку легенд», якая другі раз пройдзе ў Беларусі, але заўважыў, што яму яшчэ рана ў ёй браць удзел, бо ён дзейны спартсмен і рыхтуецца да новага сезону.
— Было б не вельмі сумленна спаборнічаць са спартоўцамі, якія прыедуць на гонку. Але, калі я скончу сваю кар'еру, я таксама прыеду і буду ўдзельнічаць у гэтым спаборніцтве.
Ён таксама адзначыў, што ў Беларусі яму больш за ўсё падабаецца ежа.
— Я магу есці амаль усё з вашай кухні. У тым ліку і нацыянальную ежу. Яна, дарэчы, трохі падобная да нардычнай, да якой я прывык. Люблю і беларускае малако. Што мне яшчэ падабаецца ў Мінску, дык гэта чысціня. У мяне ў галаве не ўкладаецца, як гэта магчыма. Ён па гэтым паказчыку на другім месцы сярод усіх гарадоў, дзе я быў. Чысцей толькі ў Манака. У вас ёсць добрыя паркі, што нязвыкла для такіх вялікіх гарадоў.
Кажучы аб сваёй працяглай кар'еры, Оле-Эйнар Б'ёрндален заявіў, што пакуль не збіраецца яе заканчваць і рыхтуецца ўзяць удзел у Алімпіядзе 2018 года.
У «Раўбічы» таксама прыехаў ультрасучасны трэйлер, які з'яўляецца домам на колах, майстэрняй і спартыўнай залай для знакамітага біятланіста.
У канцы імправізаванай прэс-канферэнцыі было зададзенае пытанне, якога полу дзіця чакае пара.
— Мы чакаем з'яўлення здаровага маляняці. А ўжо хто гэта будзе — дзяўчынка або хлопчык — усё роўна.
Нагадаем, што 5 красавіка Б'ёрндален і Домрачава абвясцілі, што ў кастрычніку ў іх народзіцца дзіця.
— У мяне блізкія адносіны з Дар'яй, якія працягваюць развівацца. Мы пара і ў кастрычніку чакаем нараджэння дзіцяці. Як бачыце, мы ўсе вельмі добра спланавалі.
16 ліпеня яны згулялі вяселле.
Цяпер чытаюць
«Хачу ўзяць інтэрв’ю» — «Не» — «Давайце я вас сфатаграфую» — «Не». Бяляцкі расказаў пра сустрэчу ў калоніі з Пратасевічам4
Каментары