Tytułavany bijatłanist i muž Darji Domračavaj Ole-Ejnar Bjorndalen trenirujecca ciapier u Minsku. U biełaruskaj stalicy jon rychtujecca da novaha siezona i prabudzie da naradžeńnia dziciaci.
— Ja ŭžo nie pieršy raz trenirujusia ŭ «Raŭbičach». Tut mnie padabajecca łyžarolernaja trasa, jakaja prachodzić praź les. Dziakujučy vietranaj abstanoŭcy cikavaj vychodzić praca na ahniavym rubiažy, a ŭ vypadku drennaha nadvorja jość kryty cir. Dla letniaha bijatłonu hety kompleks uvohule adzin z najlepšych.
Adkazvajučy na pytańnie, ci treniravaŭsia Ole-Ejnar ź biełaruskaj mužčynskaj kamandaj i ci chacieŭ by jon dać im parady, znakamity bijatłanist zaŭvažyŭ, što ŭ našaj zbornaj dobryja treniery i ŭ jaho dapamozie niama nieabchodnaści.
— Ja bačyŭ, jak niekatoryja spartsmieny vyhladajuć na trasie, ale, na žal, nie bačyŭ, jak jany vyhladajuć na strelbiščach. Ja bačyŭ mnohich junijoraŭ, i toje, što jany robiać na trasie, — heta vielmi dobra. Raście dastojnaja źmiena. Viadoma, heta sprava nie adnaho hoda, projdzie hady try-čatyry, jany padrastuć, i ŭ ich jość budučynia. Było b vydatna, kali b ja moh im dać parady, ale ŭ ich jość dobryja treniery i hodnyja prykłady dla pierajmańnia.
Praciahvajučy temu trienierstva, Bjorndalen skazaŭ, što jon budzie dapamahać Domračavaj treniravacca.
— Ale ŭ Darji jość svoj trenier, i jon praciahnie ź joj pracavać. Ja dumaju, jana dobra adnovicca i praciahnie vystupać.
Bjorndalen taksama pachvaliŭ «Honku lehiend», jakaja druhi raz projdzie ŭ Biełarusi, ale zaŭvažyŭ, što jamu jašče rana ŭ joj brać udzieł, bo jon dziejny spartsmien i rychtujecca da novaha siezonu.
— Było b nie vielmi sumlenna spaborničać sa spartoŭcami, jakija pryjeduć na honku. Ale, kali ja skonču svaju karjeru, ja taksama pryjedu i budu ŭdzielničać u hetym spabornictvie.
Jon taksama adznačyŭ, što ŭ Biełarusi jamu bolš za ŭsio padabajecca ježa.
— Ja mahu jeści amal usio z vašaj kuchni. U tym liku i nacyjanalnuju ježu. Jana, darečy, trochi padobnaja da nardyčnaj, da jakoj ja pryvyk. Lublu i biełaruskaje małako. Što mnie jašče padabajecca ŭ Minsku, dyk heta čyścinia. U mianie ŭ hałavie nie ŭkładajecca, jak heta mahčyma. Jon pa hetym pakazčyku na druhim miescy siarod usich haradoŭ, dzie ja byŭ. Čyściej tolki ŭ Manaka. U vas jość dobryja parki, što niazvykła dla takich vialikich haradoŭ.
Kažučy ab svajoj praciahłaj karjery, Ole-Ejnar Bjorndalen zajaviŭ, što pakul nie źbirajecca jaje zakančvać i rychtujecca ŭziać udzieł u Alimpijadzie 2018 hoda.
U «Raŭbičy» taksama pryjechaŭ ultrasučasny trejler, jaki źjaŭlajecca domam na kołach, majsterniaj i spartyŭnaj załaj dla znakamitaha bijatłanista.
U kancy impravizavanaj pres-kanfierencyi było zadadzienaje pytańnie, jakoha połu dzicia čakaje para.
— My čakajem źjaŭleńnia zdarovaha malaniaci. A ŭžo chto heta budzie — dziaŭčynka abo chłopčyk — usio roŭna.
Nahadajem, što 5 krasavika Bjorndalen i Domračava abviaścili, što ŭ kastryčniku ŭ ich narodzicca dzicia.
— U mianie blizkija adnosiny z Darjaj, jakija praciahvajuć raźvivacca. My para i ŭ kastryčniku čakajem naradžeńnia dziciaci. Jak bačycie, my ŭsie vielmi dobra spłanavali.
16 lipienia jany zhulali viasielle.
Jak ciapier vyhladaje palitźniavoleny Ihar Łosik FOTA8
Kamientary