Расійскія СМІ зноў абвінавачваюць Уладзіміра Макея ў падрыхтоўцы перавароту
На сайце EurAsia Daily з’явіўся аналітычны артыкул дырэктара цэнтра па працы з выпускнікамі Вышэйшай школы эканомікі (Масква) Дзмітрыя Балкунца «Як дзейнасць кіраўніка МЗС Беларусі ўплывае на адносіны Мінска і Масквы».
Можна сказаць, што ў расійскай прэсе працягваецца серыя ачарняльных матэрыялаў у дачыненні да Уладзіміра Макея. Яшчэ летам шэф-рэдактар «Рэгнума» Юрый Баранчык пісаў, што Макей рыхтуе Майдан на вуліцы Зыбіцкай.
Балкунец у сваіх меркаваннях пайшоў следам за старэйшым таварышам Баранчыкам. «Ёсць падставы меркаваць, што пры ўдзеле Макея вядзецца планамерная работа па неканстытуцыйнай змене ўлады ў рэспубліцы па ўкраінскім сцэнары», — лічыць эксперт. На чым грунтуецца такая выснова? Усё вельмі проста: Макей — міністр замежных справаў, а Парашэнка займаў такую самую пасаду ва Украіне.
«Дзеянні Уладзіміра Макея не толькі наносяць шкоду расійска-беларускім адносінам, але і ўводзяць у зман еўрапейскіх партнёраў Беларусі. Рэспубліка выстаўляецца ў ролі жабрака і пасмешышча, а яе знешняя палітыка носіць дэструктыўны характар», — рубіць Балкунец.
Вялікае абурэнне маскоўскага палітолага выклікае той факт, што цяпер вядуцца перамовы пра ўзнаўленні працы пасольства ЗША ў Мінску. Як бачым, кагосьці прынамсі ў Маскве вельмі нервуюць гэтыя перамовы.
Дзмітрый Балкунец заяўляе, што толькі за снежань Макей быў у эпіцэнтры трох скандалаў. Першы з іх — арышт прарасійскіх публіцыстаў за распальванне міжнацыянальнай варажнечы, што пісалі пад псеўданімамі на расійскіх імперскіх сайтах.
«Пры гэтым беларускія ўлады не звяртаюць увагі на адкрытыя русафобскія публікацыі ў дзяржаўных і незалежных СМІ», — як элегантна аўтар паставіў у адзін шэраг усе беларускія СМІ. Каравул! Русафобія на ўсіх узроўнях.
Два іншыя скандалы — гэта нота пратэсту расійскаму боку ў сувязі з заявай Леаніда Рашэтнікава адносна беларускай мовы і дзяржаўнасці, а таксама наведванне Макеем «лініі акупацыі» ў Грузіі.
«Уладзімір Макей на сустрэчах з еўрапейскімі і амерыканскімі дыпламатамі замоўчвае аб грамадзянах Беларусі, якія дзякуючы, у тым ліку, і яго намаганням, пазбаўленыя магчымасці наведваць рэспубліку. Візіты ў краіну для іх вельмі небяспечныя, інакш можна пасяліцца ў «амерыканцы» (турма КДБ) або атрымаць «ўкол парасонам», — відаць, Балкунец мае на ўвазе сябе і Юрыя Баранчыка.
«Мінск мае патрэбу ў нармалізацыі адносін з краінамі ЕС і ЗША, але не цаной здрады нацыянальных інтарэсаў рэспублікі і разбурэння расійска-беларускіх адносін», — турбуецца аналітык.
Дзмітрый Балкунец паходзіць з Слоніма, яму 33 гады. У Беларусі вучыўся ў сельскагаспадарчай акадэміі. Потым скончыў магістратуру ЕГУ (Літва). У 2013 скончыў аспірантуру пры Вышэйшай школе эканомікі ў Маскве. У ВШЭ працуе Андрэй Суздальцаў, грамадзянін Расіі, якога некалі дэпартавалі з Беларусі.
Намаганнямі Балкунца і Суздальцава ў ВШЭ рэгулярна праводзяць сустрэчы і канферэнцыі на тэму Беларусі. Яго наведваюць як апазіцыйныя палітыкі, накшталт Таццяны Караткевіч і Вольгі Карач, гэтак і заходнерусісты кшталту Льва Крыштаповіча і Юрыя Баранчыка.
Артыкул Балкунца сведчыць аб адарванасці аналітыка ад беларускіх рэалій, няведання ўнутранага жыцця краіны і чынавенства. А можа разглядацца як сігнал, што Масква патрабуе адстаўкі Уладзіміра Макея. Як бы тое не было, але механізм дыскрэдытацыі міністра замежных справаў, запушчаны яшчэ летась, працягвае набіраць абароты.
Што вядома пра жанчыну, якая загінула ў аўтобусе, што вёз беларускіх футбалістаў-школьнікаў у Геленджык?18
Каментары