У Беластоку судзяць двух беларусаў і паляка за кантрабанду цыгарэт з дапамогай дронаў
Акруговы суд Беластока пачаў разглядаць справу аб кантрабандзе цыгарэт з дапамогай дронаў. На лаве падсудных апынуліся два грамадзяніны Беларусі і адзін грамадзянін Польшчы, піша Most.
Трое абвінавачаных — даўнія сябры, якія жывуць у Беластоку. Беларусы пражываюць у адным будынку, а паляк часта прыходзіў да іх у госці.
Абвінавачаных затрымалі ў красавіку раніцай, калі яшчэ было цёмна. У тэлефоне аднаго з іх выявілі скрыншоты з каардынатамі пунктаў у лесе пад Беластокам. Патрулі памежнікаў выехалі на гэтыя месцы і знайшлі загорнутыя ў плёнку цыгарэты.
Трох мужчын абвінавачваюць у кантрабандзе 4,6 тысячы пачакоў цыгарэт ацэначным коштам 94 тысячы злотых (22 тысячы еўра)
Ніхто з мужчын не прызнае сваёй віны. Абвінавачаныя сцвярджаюць, што ехалі шукаць згубленыя тэлефон і кашалёк, калі іх затрымалі памежнікі. Усе яны знаходзяцца пад вартай.
У апошні час Польшча часта разглядае кантрабанду цыгарэт як парушэнне санкцый, уведзеных супраць Беларусі за яе саўдзел у вайне супраць Украіны. За гэта прадугледжана пазбаўленне волі на тэрмін ад трох гадоў.
Каментары