Арцыбіскуп Кандрусевіч вярнуўся да службы пасля месяца лекавання
Іерарх наведаў Ракаў.
Неўзабаве пасля завяршэння рэабілітацыі з прычыны аперацыі на сэрцы арцыбіскуп-эмерыт Тадэвуш Кандрусевіч вярнуўся да актыўнага служэння. 80‑гадовы іерарх здзейсніў першы пасля хваробы душпастырскі візіт — у парафію ў Ракаве, піша katolik.life.
Тут 23 жніўня святкавалі 30‑годдзе парафіяльнага хору. З гэтай нагоды парафія запрасіла арцыбіскупа ўзначаліць свята ў касцёле. Ён далучыўся нават да спеваў хору, як заўважна на апублікаваных парафіяй здымках.
На працягу месяца ганаровы іерарх, які часта наведвае парафіі ў розных кутках Беларусі, нягледзячы на ўзрост і хваробы, не меў магчымасці здзяйсняць душпастырскія візіты. Яго тэрмінова шпіталізавалі 22 ліпеня пасля ўдзелу ў фэсце ў Гудагаі. Дзякуючы гэтаму прадухілілі чарговы інфаркт і правялі стэнціраванне сасудаў.
Вернікі маліліся аб хутчэйшым выздараўленні арцыбіскупа-эмерыта і працягваюць прасіць Бога пра неабходныя ласкі для яго.
Каментары