Мінабароны пра выступ Хрэніна: Беларускі народ не хоча, каб яму што-небудзь навязвалі звонку
Міністэрства абароны адказала на публікацыю тэзісаў міністра Віктара Хрэніна на сайце «Нашай Нівы».
Чытайце. «Злачынны загад, не злачынны… Мы — людзі ваенныя». Закрыты выступ міністра абароны перад афіцэрамі
У ваеннае ведамства паступаюць пытанні ад прадстаўнікоў СМІ з нагоды «закрытай нарады, на якой выступіў міністр абароны». Інфармуем, што ніякай закрытай нарады не праводзілася. Міністр выступіў на планавым інфармаванні, якое праходзіць рэгулярна.
Беларуская армія была і застаецца непадзельнай часткай беларускага народа, які не хоча, каб яму што-небудзь навязвалі звонку.
Мы бачым, што ў інтэрнэце ўжо трактуюць выступ міністра як тое, што ён «пераконваў афіцэраў у тым, што яны павінны выконваць любы загад, нават злачынны».
Выкананне загадаў выразна рэгламентавана статутамі. Пункт 35 Статута ўнутранай службы Узброеных Сіл вызначае, што «загад —абавязковы для выканання, выказаны ў строгай адпаведнасці з заканадаўствам вусны або пісьмовы ўказ начальніка».
Больш за тое, само прымяненне Узброеных Сіл дакладна вызначана законамі і ваеннай дактрынай Беларусі.
Што тычыцца слоў генерал-маёра Віктара Хрэніна, то ўчора ён выступіў з заявай аб пачатку комплекснага тактычнага вучэння на гродзенскім кірунку. Яго выступ завяршаецца словамі: «Мы ўсе беларусы. Гэта наша зямля і мы яе нікому не аддадзім» — гэта ўсё, што трэба ведаць аб пазіцыі міністра абароны.
Каментары