Пляжы Канкуна (Мексіка) цяпер удвая недаступныя: і дорага, і свіны грып.
Напярэдадні сезона адпачынкаў мы адкажам на пытанне: «Дзе сёлета можна правесці адпачынак, заплаціўшы за яго максімум 500 даляраў?» Менавіта столькі грошай пажадала выкласці за свой адчынак большасць апытаных на сайце газеты «Туризм и отдых».
Вядома ж, дома
«У беларускім санаторыі з поўным, 4‑разовым, харчаваннем і курсам працэдур за гэтыя грошы можна смела адпачываць 12 дзён. І яшчэ застанецца», — кажа эксперт газеты «Туризм и Отдых» Ірына Шпакоўская. Крыху не хопіць адпачыць у санаторыі 21 дзень: цэны на 3‑тыднёвыя пуцёўкі каштуюць пачынаючы ад 1 млн 600 тыс. Але! Найлепшыя санаторыі краіны зазвычай ужо зарэзерваваныя да пачатка восені.
Яшчэ танны варыянт у Беларусі — усюдыісныя базы адпачынку: 7 дзён без харчавання будуць каштаваць ад 87 тыс. рублёў.
Трэці айчынны эканом‑варыянт — аграсядзібы. За асалоду пажыць у вясковай хаце, але як правіла з усімі гарадскімі выгодамі ўнутры, вы заплаціце ад 12 даляраў на чалавека на дзень (без харчавання). З харчаваннем - ад 30 даляраў на чалавека.
Украіна
Ва ўкраінскіх санаторыях (напрыклад у Трускаўцы) суткі каштуюць ад $20. Цікава, што ў расійскіх здраўніцах падобнага кшталту (напрыклад, у Кіславодску) цэны значна вышэйшыя. Ва Украіне харчаванне залежыць ад якасці нумара: просты нумар — дыетычны стол, даражэйшы нумар — асобнае, з далікатэсамі, харчаванне. Яшчэ адзін украінскі плюсік: часта, калі ў сям’і двое дарослых, дзіцяці дазволяць адпачываць бясплатна.
Чорнае мора: у Адэсе можна знайсці месца ў гатэлі пачынаючы ад $8 за суткі (без харчавання).
Турцыя
З $500 у краіне двух кантынентаў беларускаму турысту сёлета рабіць няма чаго. Курорты, нягледзячы на крызіс, істотна падаражэлі. Фразы кшталту «Турцыя ад $310», у рэкламных абвестках, датычаць марш‑кідкоў на 3—4 дні, не больш. Паўнавартасны адпачынак там будзе каштаваць сёлета ад 800 даляраў на два тыдні. Істотны плюс Турцыі — усё ўключана. Раз заплаціўшы за пуцёўку ў Мінску, у Турцыі вы на пражытак амаль нічога не выдаткуеце.
Егіпет
Яшчэ адна прыязная, бязвізавая для беларускага турыста краіна. Тут $500 на доўгі адпачынак таксама не хопіць. Хіба можна злавіць шанец і за танна з’ехаць па «гарачай пуцёўцы» з Мінска, Кіева і Масквы. Трэба адно сядзець на чамаданах і, скануючы інтэрнэт і турыстычныя абвесткі ў газетах, чакаць нагоды. Але ці будзе гэты сезон «гарэць» (ці будзе сёлета шмат прапановаў з пуцёўкамі ў апошнюю хвіліну) — невядома.
У Егіпце турагенты не рэкамендуюць гнацца за танным жытлом і сяліцца ў гатэлях, ніжэйшых за трохзоркавыя. Егіпецкія гасцініцы не дацягваюць да еўрапейскіх: дзве зоркі ў Егіпце і Балгарыі — гэта два розныя ўзроўні.
Еўропа
Сёлета аматараў недарагога пацешыць адпачынак у Румыніі. Туры туды ў пачатку сезона каштуюць ўсяго 150 еўра без візы, якая стане ў 5 даляраў. У разгар лета стандартны тур у Румынію будзе каштаваць 300 еўра. Істотны мінус: дарога. 28-гадзіннае падарожжа на аўтобусе (а ў Румынію беларускія адпачывальнкі збольшага дабіраюцца наземным транспартам) не кожнаму пад сілу.
Балгарыя: Нельга сказаць, што Балгарыя самая танная, але цудоўны варыянт для сямейнага адпачынку з малымі дзецьмі. Базавы кошт двухтыднёвага паўпансіёну (уключаныя толькі сняданкі): 250—300 еўра + віза коштам 60 еўра + патрэба абедаць і вячэраць за свой кошт. Дарагавата, але паколькі дзіця адпачывае бясплатна, дык маем жаданыя $500 на чалавека.
Але гэта пачатак сезону, а вось у сярэдзіне за месца ў дзьвюхзоркавым гатэлі вы заплаціце ад 420 еўра. Плюсы: у Балгарыі недарагія рэстараны.
Літва. У Паланзе можна заарандаваць пакой з кухняй ад 32 еўра за суткі. Але не забываемся на візу ў 60 еўра.
Прыемная нам таксама краіна Чарнагорыя: у пачатак і канец сезону пуцёўка туды каштуе калі 270 еўра. Віза не трэба, але едучы аўтобусам, давядзецца прыдбаць транзітную візу за 70 еўра. Не шкадуйце — транзітны шэнген мае свае плюсы: можна кораткатэрмінова наведаць прылеглыя Прагу, Вену і Будапешт.
