29 гадоў таму адбыўся першы рэферэндум у гісторыі суверэннай Беларусі. Адно з пытанняў датычылася дзяржаўнага статусу рускай мовы. Пра тое, як галасавала Галіна Лукашэнка, згадаў журналіст Дзмітрый Гурневіч.
14 мая 1995 года ў Беларусі прайшоў прапанаваны Аляксандрам Лукашэнкам рэферэндум. На галасаванне вынеслі чатыры пытанні — аб наданні рускай мове роўнага статусу з беларускай, аб вяртанні абноўленых савецкіх сімвалаў замест нацыянальных бел-чырвона-белага сцяга і «Пагоні», аб эканамічнай інтэграцыі з Расіяй і аб дазволе прэзідэнту распускаць Вярхоўны Савет.
Па афіцыйных даных, па ўсіх пытаннях удзельнікі галасавання падтрымалі Лукашэнку. За наданне рускай мове статусу дзяржаўнай, паводле звестак ЦВК, прагаласавалі 83,3% удзельнікаў рэферэндуму — крыху больш за 4 мільёны чалавек.
Аднак, жонка Лукашэнкі Галіна ў гэтыя 4 мільёны не ўваходзіла. Журналісты газеты «Свабода» ў тыя майскія дні датэлефанаваліся да яе. Яна распавяла, што галасавала супраць статусу рускай мовы як дзяржаўнай.
Са слоў Галіны Лукашэнкі, ёй было вельмі шкада, што людзі ў такой вялікай колькасці выказаліся за рускую мову. Зрэшты, жонка Лукашэнкі выказала ўпэўненасць, што беларуская мова не знікне.
«Матчына мова будзе жыць заўсёды. Я ў гэта веру», — заявіла тады Галіна Лукашэнка.
У Канстытуцыі 1994 года без зменаў і дапаўненняў толькі беларуская мова валодала статусам дзяржаўнай. Пры гэтым у асноўным законе гаварылася, што руская з'яўляецца мовай міжнацыянальных зносін і свабода карыстання рускай мовай абаранялася дзяржавай.
«Трэба дамаўляцца істотна». Лукашэнка расказаў пра сустрэчу з прадстаўнікамі Зяленскага40
«Трэба дамаўляцца істотна». Лукашэнка расказаў пра сустрэчу з прадстаўнікамі Зяленскага
«Лютая, абразлівая крытыка ўсяго беларускага. Але з мінулага ў будучыню немагчыма прайсці міма сучаснасці». Насевіч грунтоўна адказаў Алесю Беламу141141
Каментары