З Беларусі вымушана з'ехаў вядомы ў Магілёве актывіст і валанцёр, народны «Чалавек года — 2020» Сяргей Пехцераў. «Я ў бяспецы і не ў РБ», — напісаў ён на сваёй старонцы ў Instagram. Па словах Пехцерава, яго ад'езд звязаны з дзеяннямі сілавікоў у дачыненні да яго, піша Tut.by.
У сераду, 17 сакавіка, Сяргея Пехцерава затрымалі. Ён паспеў паведаміць сябру, што яго забіраюць у РАУС, увечары магілёўца адпусцілі. Тады ў Сяргея канфіскавалі аўтамабіль, працоўны камп'ютар і тэлефон з-за БЧБ-налепкі на машыне. Канфіскацыю матывавалі неабходнасцю агляду ў рамках адміністрацыйнай справы, растлумачыў Пехцераў.
На думку Сяргея, міліцыя зноў занялася ім з-за тэлеграм-канала LOSQUE, у якім ён публікуе інфармацыю. «Я думаю, гэта ўсё з-за пабліка. Зачышчаюць інфармацыйныя каналы перад Днём Волі. Думаю, у мяне забралі тэлефон і камп'ютар, каб я не мог нешта посціць», — мяркуе Сяргей.
У сваім instagram-акаўнце ён таксама напісаў, што пасля арышту ў верасні — Пехцераву далі 14 сутак па арт 23.34 КаАП РБ — яго чатыры разы «цягалі людзі ў пагонах».
— Хоць я нічога не рабіў. Не знаходзіўся ў дваровых чатах, не «псаваў сцены», не распаўсюджваў газеты, не спыняў цягнікі, не раскідваў шрубы пад РАУС, не заклікаў праз LOSQUE выходзіць на маршы і блачыў усе такія заклікі. Уся мая поствыбарная актыўнасць была накіравана на дапамогу людзям і на развіццё горада (як і раней). Працаваць, зарабляць і плаціць падаткі ў Беларусі стала немагчыма. Я — «лішні».
Сяргей напісаў таксама, што ён вернецца. Ад'езд жа, як магілёвец растлумачыў Tut.by, быў вымушанай мерай бяспекі.
Сяргей Пехцераў — айцішнік і адзін з самых яркіх актывістаў новай хвалі ў Магілёве. У 2019 годзе ён разам з праектам маніторынгу чысціні паветра Pavetra.Online дайшоў да фіналу рэспубліканскага конкурсу сацыяльных праектаў Social Weekend.
Увесну 2020 года Пехцераў разам з таварышам Антонам Турко запусціў інтэрактыўную анлайн-карту ў падтрымку беларусаў, якія адважыліся на самаізаляцыю ў разгар першай хвалі эпідэміі каранавіруса.
У жніўні 2020 года дапамагаў родным і блізкім тых, хто трапіў у Магілёўскі ІЧУ.
У студзені 2021 года народным галасаваннем магілёўцы выбралі яго і стваральніка праекта DRONNY Андрэя Музарава «людзьмі года — 2020».
Цяпер чытаюць
Таццяна Заміроўская першы раз за 11 гадоў вярнулася з ЗША ў Еўропу. Многія манеры, звычкі і нават птушкі, якіх мы не прыкмячаем, выклікалі ў яе буру ўспамінаў88
Каментары