Раніцай 24 сакавіка па дарозе на працу зноў затрымалі доктара Руслана Бадамшына. Па словах яго жонкі Таццяны, напярэдадні да іх дадому прыходзіў участковы, выклікаў «на размову» ў РУУС. Сёння, каля 7.30, Руслан выйшаў з дому і праз некалькі хвілін пазваніў у дамафон, паведаміў, што яго затрымалі, піша Tut.by.
Са жніўня 2020 года Руслана Бадамшына затрымлівалі чатыры разы. Апошні — 14 студзеня, калі ён хварэў на COVID-19 і вяртаўся з паліклінікі. Тады суддзя Максім Трусевіч прызначыў яму 15 сутак арышту, але з адтэрміноўкай на месяц. Двое сутак Руслан правёў у ІЧУ. Каб адбыць пакінуты арышт, яго забралі проста на працоўным месцы — гэта адбылося 5 сакавіка.
Па словах Таццяны, ён павінен быў выйсці 18 сакавіка, але адпусцілі мужа толькі да вечара 19-га.
— У студзені, калі Руслана затрымалі, да поўных двух сутак ён недасядзеў 30 хвілін. Але яму «залічылі» толькі 20 гадзін і адпусцілі на дзень пазней.
Пасля таго як Руслан адбыў апошні адміністрацыйны арышт, кожны дзень да яго дадому прыходзілі невядомыя людзі, але сям'я не адчыняла дзверы, бо не ведала, хто гэта быў, кажа жонка.
— Учора, калі я адчыніла дзверы, мужчына, які да нас прыйшоў, прадставіўся ўчастковым і сказаў, што хоча запрасіць Руслана на гутарку і падпісаць нейкую паперу, што муж не будзе ўдзельнічаць у Дні Волі. Таксама напярэдадні вечарам да Руслана прыходзілі на працу.
Сёння, у раёне 7 раніцы, кажа Таццяна, на тэлефон дзіцяці патэлефанавалі з невядомага нумара. Прыкладна ў 7.30 Руслан выйшаў на працу і яго адразу ж затрымалі.
— Ён патэлефанаваў у дамафон, сказаў: «Таня, мяне забралі на лесвічнай пляцоўцы, вязуць у апорны пункт». Туды паехаў бацька Руслана, у гэты час мужа ўжо саджалі ў машыну. Прывезлі на Уруцкую, 8 (па гэтым адрасе знаходзіцца ГАМ Першамайскага раёна Мінска). Нібыта на гутарку. Мы тэлефанавалі, пыталіся, калі скончыцца гутарка. Нам казалі, што ўсё можа зацягнуцца. Калі атрымалася зайсці ў будынак, дзяжурны нам сказаў, што Руслан затрыманы, у дачыненні да яго пачаты адміністрацыйны працэс, бо «выявіўся факт хуліганства». Цяпер Руслана вязуць у Першамайскі РУУС.
У прэс-службе ГУУС Мінгарвыканкама паабяцалі ўдакладніць інфармацыю аб затрыманні Руслана Бадамшына і даць каментар пазней.
Руслан Бадамшын — неўролаг, у РНПЦ неўралогіі і нейрахірургіі ён працуе на пасадзе доктара функцыянальнай дыягностыкі, спецыялізуецца на спадчынных і набытых нейрамышачных захворваннях, у тым ліку працуе з пацыентамі са СМА. Са жніўня 2020 года ён правёў пад арыштам 48 дзён.
Цяпер чытаюць
Прабітыя лёгкія, разарваная печань і сэкс з малалетняй: што адбываецца ўнутры беларускай міліцыі і як начальства гэта хавае19
Прабітыя лёгкія, разарваная печань і сэкс з малалетняй: што адбываецца ўнутры беларускай міліцыі і як начальства гэта хавае
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім1414
Каментары