Былы кіраўнік адміністрацыі Лукашэнкі пасля прыкладна году працы ў беларускай дачыннай кампаніі «Лукойла» знайшоў новую працу ў расійскай сталіцы.
Былы кіраўнік адміністрацыі Лукашэнкі пасля прыкладна году працы ў беларускай дачыннай кампаніі «Лукойла» знайшоў новую працу ў расійскай сталіцы.
Цяпер Урал Латыпаў узначальвае кампанію «Директ Менеджмент»,
што кіруе найбуйнейшым у Еўропе гандлёвым комплексам «Горбушкин двор» і іншымі буйнымі аб’ектамі нерухомасці ў расійскай сталіцы.
«Горбушкин двор», нагадаем, належыць выхадцу з Мінска Аляксандру Міляўскаму.
Былы ўласнік вядомага маскоўскага тэлезавода «Рубін», некалі галоўнага канкурэнта «Гарызонта», у 2003 годзе прадаў свой тэлевізійны бізнэс карэйскай кампаніі «Rolsen» і заняўся выключна дэвелаперскімі праектамі. У актыве кантраляванага ім праз жонку Жанну Міляўскую (сам Міляўскі з 2005 года з’яўляецца дэпутатам Маскоўскай гарадской Думы ад «Адзінай Расіі», дзе курыруе, дарэчы, пытанні горадабудаўніцтва) ААТ «МТЗ «Рубін» знаходзіцца вядомы гандлёвы комплекс «Горбушкин двор», офісныя цэнтры і некалькі перспектыўных пляцовак пад забудову.
У іх ліку, напрыклад, гатэльны комплекс (плошча 137 тыс. кв. м.) і гандлёва‑забаўляльны цэнтр «Филион» (62 тыс. кв. М.). З’яўленне 58‑гадовага Урала Латыпава, які доўгі час з’яўляўся ключавой фігурай у атачэнні Аляксандра Лукашэнкі (у 2001‑2004 гадах ён узначальваў яго адміністрацыю), на ААТ «МТЗ «Рубін» зусім не выпадковае. Уладальнікі «Рубіна» Міляўскія даўно робяць стаўку на высокапастаўленыя беларускія кадры.
У 1990‑я генеральным дырэктарам завода «Рубін» быў Анатоль Лашкевіч, былы першы сакратар Партыі камуністаў Беларусі, які эміграваў з Беларусі з‑за палітычных рознагалоссяў з Лукашэнкам.
У пачатку 2000‑х прытулак на «Рубіне» знайшоў былы прэм’ер‑міністр Беларусі Уладзімір Ярмошын, які быў вымушаны з’ехаць з Беларусі пасля закрыцця мясцовага прадстаўніцтва СТАА «Мабільныя ТэлеСістэмы».
За архітэктуру ў рамках холдынгу адказваў былы галоўны архітэктар Мінска Аляксандр Чадовіч.
Нарэшце, зараз членам савета дырэктараў «Директ Мененджмента» і ААТ «МТЗ «Рубін» з’яўляецца Упендра Махата — генеральны консул Непала ў Беларусі. Сям’я Махата — дастаткова ўплывовыя бізнэсмэны ў Беларусі: Бірэндра Махата з’яўляецца ўласнікам 60% акцый і членам савета дырэктараў ААТ «Амкадор», Сурэндры Махата належыць медыцынскі цэнтр «Кравира». Акрамя таго, братам Махата належаў да нядаўніх часоў буйны пакет ў ЗАТ «Межторгбанк», выкуплены «Альфа‑банкам».
Каментары