Прэзідэнты Літвы і Польшчы просяць НАТА звярнуць увагу на «беларускі фактар»
У інтэрв'ю тэлеканалу «Настоящее время» Гітанас Наўседа сказаў, што Літва не можа пачувацца ў бяспецы, маючы побач такую краіну, як Беларусь. Ён адзначыў, што «ніякая агароджа на мяжы не дапаможа, калі паляцяць ракеты». Разам з прэзідэнтам Польшчы Анджэем Дудай літоўскі палітык звярнуўся да NATO.
«Зразумела, што Беларусь удзельнічае ў вайне. Беларусь знаходзіцца ў поўным распараджэнні Расіі для перамяшчэння войскаў у любыя рэгіёны — на захад ці на поўдзень. І цяпер на тэрыторыі Беларусі знаходзяцца расейскія вайскоўцы, якія гатовыя ехаць у раёны ваенных дзеянняў ва Украіне. Але іх таксама могуць адправіць на заходнюю мяжу. Трэба думаць пра гэта. І таму мы звярнуліся да генеральнага сакратара NATO і камітэтаў Альянсу з просьбай звярнуць больш увагі на беларускі фактар у гэтай вайне», — сказаў Наўседа ў інтэрв'ю.
Таксама прэзідэнт Літвы выказаўся пра імаверны напад расіян на Сувальскі калідор. Ён не выключае атакі на гэты рэгіён.
«З геапалітычнага пункту гледжання, вядома, гэта слабае звяно. Там ёсць Беларусь — як спадарожнік Расіі. А з другога боку, там ёсць Калінінградская вобласць, і мы вельмі добра ведаем, што гэты рэгіён шчыльна ўкамплектаваны тэхнікай, вайскоўцамі. Магчыма, некаторыя з іх былі адпраўлены на вайну ва Украіну, але тым не менш. Ядзерная зброя, тактычная ядзерная зброя ўсё яшчэ там. Калі ўлічваць агрэсіўнасць і непрадказальнасць Расіі, сітуацыя выглядае вельмі небяспечнай. Плюс Беларусь».
Каментары