СМІ: Расія на наступным этапе вайны плануе масава задзейнічаць супраць Украіны авіяцыю
Расійскае выданне «Важные истории» паведамляе на падставе інфармацыі сваіх крыніц, блізкіх да Мінабароны РФ, што расійскія вайскоўцы вырашылі масава выкарыстоўваць авіяцыю на фронце і гэта можа прывесці да павелічэння стратаў з абодвух бакоў.
Нягледзячы на ўсе намаганні, падчас вайны Расія не здолела знішчыць украінскія СПА. Таму непасрэдна над лініяй фронту і тым больш у глыбіні ўкраінскай тэрыторыі расіяне вельмі рэдка выкарыстоўваюць сваю авіяцыю, бо гэта можа пагражаць ім вялікімі стратамі.
Але цяпер, як пішуць «Важные истории», расійскае камандаванне вырашыла змяніць падыходы.
«Раней яе [авіяцыю] бераглі, яна амаль не залятала ў зону дзеяння ўкраінскай СПА. Цяпер вырашылі змяніць тактыку», — гаворыць суразмоўца выдання.
Ён лічыць, што самалёты і верталёты «будуць масава збіваць», але ва УСУ ў выніку гэтага ўсё адно ўзнікнуць праблемы.
На гэтым тыдні Financial Times са спасылкай на звесткі заходняй разведкі паведаміла, што Расія сцягвае баявую авіяцыю да межаў Украіны. Суразмоўцы брытанскага выдання ў НАТА расказалі, што Расія рыхтуе паветраную кампанію, у якой задзейнічае каля 80% сваёй авіяцыі і паспрабуе знішчыць СПА Украіны.
У той жа час пытанне з перадачай Украіне заходніх самалётаў-знішчальнікаў хоць і абмяркоўваецца, але пакуль што, як выглядае, даволі далёкае ад пазітыўнага вырашэння. Таму ў галіне авіяцыі расійскае войска пакуль што відавочна мае перавагу над украінскім.
Чытайце таксама:
Польшча гатовая перадаць Кіеву знішчальнікі, але не будзе рабіць гэта першай з краін НАТА
На Мюнхенскай канферэнцыі Украіна будзе гаварыць пра ракеты, самалёты і ўступленне ў НАТА
«Не». Байдэн выказаўся пра перадачу Украіне знішчальнікаў F-16
Прапагандысты запэўніваюць, што 196 палітвязняў ужо на свабодзе8
Каментары