Юрыя Зянковіча, які быў асуджаны па справе аб «дзяржперавароце», змяшчалі ў ШІЗА, ён абвяшчаў галадоўку
Грамадзяніна ЗША Юрыя Зянковіча, які праходзіў па «справе змоўшчыкаў», адпраўлялі ў ШІЗА ў бабруйскай калоніі, там ён абвяшчаў галадоўку, распавяла праекту «Маланка» яго сястра Аксана.
Адміністрацыя калоніі прымушала Юрыя Зянковіча выносіць вёдры з экскрэментамі і мыць прыбіральні пасля асуджаных з нізкім сацыяльным статусам. Гэта адна з формаў ціску на вязняў з боку адміністрацыі. Такім чынам вязні могуць пагоршыць сваё становішча ў калоніі паводле няпісаных правілаў асуджаных.
Паводле сястры Зянковіча, той адмовіўся і быў за гэта пакараны, адсядзеў 8 дзён у ШІЗА і абвясціў 8-дзённую галадоўку.
Сястра расказала, што на мінулым тыдні адвакат не змог трапіць да Юрыя Зянковіча ў калонію ў Бабруйску.
Зянковіча асудзілі 2 верасня па «справе змоўшчыкаў» да 11 гадоў калоніі ва ўмовах узмоцненага рэжыму. Ён абвінавачваўся па ч. 1 арт. 357 КК (змова з мэтай захопу дзяржаўнай улады неканстытуцыйным шляхам), ч. 1 арт. 361-1 КК (стварэнне экстрэмісцкага фарміравання і кіраванне ім), ч. 3 арт. 361 КК (публічныя заклікі да захопу дзяржаўнай улады), ч. 3 арт. 130 КК (распальванне сацыяльнай варожасці). Яго дадалі ў спіс «тэрарыстаў».
Зянковіч цалкам прызнаў віну і, як высветлілася, заключыў пагадненне са следствам, абавязаўшыся дапамагчы «выкрыць» астатніх «змоўшчыкаў». Зянковіч, Аляксандр Фядута, Рыгор Кастусёў, Вольга Галубовіч і Дзяніс Краўчук былі затрыманыя ў красавіку 2021 года.
Цяпер чытаюць
Бліжэйшым часам будуць вызвалены больш за 150 палітзняволеных17
Каментары