Былы прэзідэнт ПАР Джэйкаб Зума, асуджаны на 15 месяцаў за непавагу да суда, здаўся ўладам у пятніцу. Аднак ён вызвалены ад адбыцця пакарання ў турме. Прычына — перапоўненасць месцаў зняволення, піша Бі-бі-сі.
81-гадовы Зума раней быў вызвалены ўмоўна-датэрмінова па медыцынскіх паказаннях, што было прызнана судом незаконным.
Міністр юстыцыі Рональд Ламола заявіў, што Зума вызвалілі ад адбыцця пакарання ў сувязі з перапоўненасцю турмаў.
Яго ўключылі ў праграму вызвалення злачынцаў з нізкім узроўнем небяспекі для грамадства. Гэтая праграма была запушчаная ў красавіку з мэтай разгрузіць перапоўненыя турмы. За гэты час, паводле даных улад, па ёй вызваліліся дзевяць тысяч чалавек.
Рональд Ламола падкрэсліў, што рашэнне было прынята турэмнымі ўладамі без якога-небудзь палітычнага ўмяшання і што Зума не карыстаўся ніякімі прывілеямі.
Прадстаўнік Дэпартамента турмаў паведаміў Бі-бі-сі, што колькасць зняволеных у ПАР на 47% перавышае афіцыйную ўмяшчальнасць.
Сітуацыя пагаршаецца пажарам у адной з турмаў на мінулым тыдні, учыненым, як сцвярджаецца, зняволенымі. У выніку чатыры тысячы зняволеных былі пераведзеныя ў іншыя ўстановы, дзе для іх не было койка-месцаў.
Камісар турмаў ПАР Макгоці Табакгале сказаў, што Зума з'явіўся ў папраўчую ўстанову Эсткорт у сваёй роднай правінцыі Квазулу-Натал у пятніцу раніцай і быў «зарэгістраваны» ў сістэме, але праз гадзіну вызвалены.
Лабісцкая група AfriForum абвінаваціла Дэпартамент турмаў ПАР у садзейнічанні Джэйкабу Зума ва ўхіленні ад правасуддзя.
Шлях за краты
Першапачаткова палітык трапіў у турму за тое, што не з'явіўся на расследаванне справы аб карупцыі падчас свайго прэзідэнцтва.
Ён быў вымушаны пайсці ў адстаўку ў 2018 годзе пасля дзевяці гадоў знаходжання на пасадзе, але неаднаразова сцвярджаў, што стаў ахвярай палітычнай змовы.
Турэмнае зняволенне Зума выклікала масавыя беспарадкі — загінула больш за 350 чалавек, у асноўным у правінцыі Квазулу-Натал — аплоце Зума.
У ліпені былы прэзідэнт ПАР Джэйкаб Зума ездзіў у Расію, як заявіў ягоны фонд, на лячэнне. Пасля гэтага ён вярнуўся на радзіму.
Да гэтага ён быў умоўна-датэрмінова вызвалены па неагучанай медыцынскай прычыне былым кіраўніком турэмнай службы Артурам Фрэйзерам, які лічыцца саюзнікам былога прэзідэнта.
Пратасевіч ездзіў да Бабарыкі ў калонію некалькі разоў4
Каментары