У Гарадку ўлады вызначыліся з назваю сквера, які з'явіцца да Дня беларускага пісьменства
У ліпені мясцовыя ўлады райцэнтра Гарадок (Віцебская вобласць), дзе сёлета пройдзе ХХХ Дзень беларускага пісьменства, абвясцілі грамадскае абмеркаванне назвы сквера, дзе стаіць скульптура героя паэмы «Тарас на Парнасе». Вынікаў — усіх выказаных прапаноў і колькасці галасоў — грамадскасці не паведамілі, і сама апытанка ўжо знікла з сайта Гарадоцкага райвыканкама, а назва ўжо зацверджаная — Вераніцынскі сквер.
Паводле ўмоў абмеркавання, жыхарам Гарадка было прапанавана або прыдумаць уласную назву, або падтрымаць адну з вызначаных выканкамам: Літаратурны сквер, Літаратурная альтанка, Ля Парнаса, парк ХХХ Дня беларускага пісьменства або Вераніцынскі сквер — у памяць пра Канстанціна Вераніцына, аўтара паэмы «Тарас на Парнасе», ураджэнца Гарадоччыны. Як паведамляе віцебская гарадская газета «Витьбичи», быў прыняты менавіта апошні варыянт. Чамусьці выданне падае яго па-руску.
Новую назву наведвальнікі змогуць прачытаць на шыльдзе — яна стане часткай скульптурнай кампазіцыі на ўваходзе ў сквер. Кампазіцыя будзе «ў арыгінальнай форме каванага дрэва, ствол якога расце са стопкі старажытных кніг як сімвал таго, што карані нашага народа моцна назапашаныя ведамі, якія перадаюцца з пакалення ў пакаленне». На гэтае дрэва «нанясуць прозвішчы творчых асоб, якія праславілі Гарадок сваім мастацтвам».
Да ХХХ Дня беларускага пісьменства ў скверы з'явіцца і яшчэ адзін арт-аб'ект — у выглядзе асобных літар алфавіта, у тым ліку літары «Ў». Гэта аўтарская праца Ігара Сілкі, студэнта Беларускай акадэміі мастацтваў. Дарэчы, роўна 20 гадоў таму помнік літары «Ў» быў адкрыты ў Полацку да Х Дня беларускага пісьменства.
Да сёлетніх святкаванняў, запланаваных на 2-3 верасня, у візуальным абліччы Гарадка з'явіліся і іншыя змены. На сцены 10-ці будынкаў нанеслі малюнкі з цытатамі класікаў беларускай літаратуры, адмысловая творчая група з работнікаў устаноў культуры і адукацыі размалявала вялікія валуны ў наваколлях райцэнтра і аўтобусныя прыпынкі па дарозе на Астраўляны — вёску, дзе ў 1834 годзе нарадзіўся Канстанцін Вераніцын.
«Усе экстрэмісты ці ўжо асуджаныя, ці з'яўляюцца фігурантамі спраў, якія будуць разгледжаны судамі». Швед падводзіць рысу пад рэпрэсіямі?20
Каментары