«Дзеянні палесцінцаў — гэта перамога Масквы і Мінска». Што пра падзеі ў Ізраілі пішуць лукашэнкаўскія СМІ
Радуюцца эскалацыі, кпяць з эмігрантаў з Беларусі і рэпосцяць расійскіх братоў па розуме. Сабралі асноўнае.
Тэлеграм-канал «Беларускі сілавік» — сярод тых, хто актыўна публікуе навіны наконт падзей у Ізраілі. Ëн радуецца поспехам палесцінцаў і рэпосціць допісы расійскіх шавіністычных каналаў.
«Саюзнікаў у нас там няма. Самае галоўнае, што можна здабыць у гэтым канфлікце, так гэта запавольванне любой дапамогі Ізраіля ЕЗ і Украіне», — адзначае «Белорусскій сіловік».
Пры гэтым канал спрабуе падаць бакі канфлікту як абое рабое.
Інфаказачка Вольга Бондарава, паміж віншаваннямі з днём нараджэння Пуціна і гродзенскай міліцыі, таксама актыўна рэпосціць антыізраільскія каналы. Не забыла яна абліць брудам і расійскіх зорак, якія пераехалі ў Ізраіль на знак пратэсту супраць расійскага нападу на Украіну.
Допісаў пра Алу Пугачову і Максіма Галкіна на старонках розных прапагандыстаў шмат. Адзін з такіх — рэпост яшчэ аднаго лукашэнкаўскага прапагандыста Юрыя Уварава.
Запосціла Бондарава і відэафэйк, у якім тэрарыстычны рух ХАМАС дзякуе Украіне за продаж ім зброі. Піша, што вялікая частка РПГ, якія выкарыстоўвалі тэрарысты супраць мірнага ізраільскага насельніцтва і салдат, была пастаўлена з краіны, якая сама зараз знаходзіцца ў стане вайны. Насамрэч, гэта хлусня.
Канал «Жоўтыя слівы» таксама смакуе сітуацыю.
А вось прапагандыст Рыгор Азаронак пісаў пра канфлікт у Ізраілі не так шмат. Але і ён пажартаваў з дзяўчат, якія танчылі з чырвона-чорным сцягам АУН з зоркай Давыда — знакам салідарнасці яўрэяў з украінскім супраціавам, і выказаў занепакоенасць лёсам шоўмена Яўгена Булкі, які не змаўчаў у 2020 годзе, а пасля пераехаў у Ізраіль.
Акрамя таго, Азаронак заклапаціўся правамі тэрарыстаў, затрыманых ізраільскай арміяй.
«Аmnesty International, Freedom House, Хельсінскі камітэт, АБСЕ ды іншыя міжнародныя праваабарончыя канторы старанна заплюшчаць на гэта вочы», — піша прапагандыст.
Радыкальныя прапановы робіць «Мінская праўда».
У артыкуле прапагадыста RT, які друкуе газета, сцвярджаецца, што расійскае і беларускае грамадства адзіныя ў падтрымцы Палесціны, а перамога Палесціны на акупаваных тэрыторыях — гэта перамога Масквы і Мінска. «Мы ўжо перамаглі», — пішацца там.
Галоўная газета краіны «Беларусь сегодня» на галоўнай старонцы трымае інспекцыю галоўнакамандуючым умацаванага раёна пад Жабінкай і сканчэння ўборкі грэчкі ў чатырох абласцях.
Але і яна адзіная з іншымі лукашэнкаўскімі СМІ ў тым, што на падзеі ў Ізраілі таксама глядзіць вачыма Масквы. Калонка на тэмы ізраільска-палесцінскага канфлікту ў «СБ» сканчаецца ўгодлівым цытаваннем аўтара з Масквы: «Як выключна дакладна адзначыла ў сваім Telegram-канале прафесарка МГІМО Алена Панамарова … арганізацыя і падрыхтоўка сённяшняга нападу і асабліва яго сімвалізм — у гадавіну вайны Суднага дня — кажа пра тое, што галоўныя інтарасанты вялікай вайны сядзяць у цёплых кабінетах у Вашынгтоне і Лондане».
У гэтай цытаце — думка, пазбаўленая ўсякай логікі, акрамя адной. Што б ні здарылася на свеце, паўтарай, што скажа Масква. І што б ні здарылася, абвінавачвай Захад.
«Наша Нiва» — бастыён беларушчыны
ПАДТРЫМАЦЬ
Каментары