Парафія мінскага Чырвонага касцёла апублікавала ліст «чараўніку Аляксандру Рыгоравічу»
У парафіі закрытага ўладамі мінскага Чырвонага касцёла, у якой каля 10 тысяч чалавек, застаецца толькі маленькая плябанія, адключаная ад камунікацый, — вернікам даводзіцца прывозіць туды ваду. А частка парафіян напісала ліст «чараўніку», піша Katolik.life.
На сайце мінскай рыма-каталіцкай парафіі Святога Сымона і Святой Алены 20 снежня апублікавалі свежую інфармацыю. У ёй адзначаецца, што ўжо другі год запар вернікі парафіі пазбаўленыя магчымасці праслаўляць нованароджанага Хрыста ў сваім родным касцёле, закрытым ужо 15 месяцаў.
«Працягваем шчыра прасіць Госпада, каб як мага хутчэй было адноўлена парафіяльнае жыццё ў нашым храме (…) Шчыра дзякуем тым, хто дапамагае нашым святарам сваім дзяжурствам у плябаніі, куды штодня звяртаюцца людзі ў розных духоўных патрэбах. Няхай Гасподзь аддзячыць вас, паважаныя браты і сёстры, якія рэгулярна ўжо на працягу года, прывозяць гарачую і халодную ваду ў плябанію для розных патрэб. Нашы святары штодня моляцца за сем'і нашых дабрадзеяў, якія ў цяжкі час выпрабавання для нашай парафіі не засталіся абыякавымі», — гаворыцца ў аб'явах.
Святую Імшу «Пастэрку» для парафіі Святога Сымона і Святой Алены будуць адпраўляць 24 снежня а 19 гадзіне ў архікатэдральным касцёле, там жа 25 снежня а 15-й адбудзецца ўрачыстая святая Імша.
Акрамя таго, парафія апублікавала ліст, які падаецца дзіўным. Ён складзены на рускай мове ад імя бацькоў дзяцей, якія настаялі на такім лісце, сцвярджаецца ў паведамленні. Каму адрасаваны адкрыты ліст, канкрэтна не гаворыцца, але звяртаюцца яго аўтары да «Аляксандра Рыгоравіча», на якога «спадзяюцца як на чараўніка».
Раней парафія не раз звярталася да вышэйшых чыноўнікаў Беларусі — просьбы аб адкрыцці храма заставаліся без адказу.
У публікацыі называецца агульная колькасць парафіян Чырвонага касцёла — каля 10 тысяч чалавек, сярод якіх больш за паўтары тысячы дзяцей.
Цяпер чытаюць
Раптоўна памяняўся кіраўнік Віцебскай вобласці. Прычынай назвалі хваробу 50‑гадовага Аляксандра Рагожніка3
Каментары
Цьху! Краіна рабоў. Немагчымы змены ў гэтай краіне. Пасля Лукі будзе новы гаўляйтар масковіі і ўсе будуць паслухмяна паслугоўваць