Міністр замежных спраў Чэхіі Ян Ліпаўскі заявіў, што галоўны выклік для Прагі ў тым, каб трымаць Расію як мага далей ад чэшскіх межаў і працягваць падтрымку Украіны, піша «Еўрапейская праўда» са спасылкай на ČTK.
«Калі Украіна ўпадзе, мы сутыкнёмся з Расіяй крыху бліжэй — літаральна на межах Еўрасаюза, вельмі блізка да Чэхіі, і мы не павінны гэтага дапусціць», — сказаў Ліпаўскі.
Паводле яго слоў, дапамога Украіне — ваенная, гуманітарная, фінансавая, палітычная або маральная — на карысць і еўрапейскай бяспецы.
«Мы павінны памятаць, што ва Украіне мы стрымліваем імперскую экспансію Расіі, якая таксама точыць зубы на цэнтральнаеўрапейскі рэгіён, на краіны Балтыі», — дадаў ён.
Кіраўнік МЗС указаў, што стомленасць ад вайны, пра якую часта гавораць, праяўляецца па-рознаму, таму ён лічыць важным тлумачыць грамадскасці неабходнасць падтрымкі Украіны.
«Аднак, калі гэта праўда, што мы стаміліся ад уласнай бяспекі, то мы страчваем нашу свабоду і суверэнітэт», — сказаў міністр.
«Я рэгулярна кажу ўсім у Еўропе, што наш галоўны выклік — трымаць РФ як мага далей ад нашых межаў. Менавіта на гэта павінна быць накіравана наша палітыка. Дэбаты праходзяць няпроста, але мы бачым, што ў рэшце рэшт еўрапейскія краіны здольныя прыйсці да згоды», — адзначыў Ліпаўскі.
Міністр таксама заявіў, што Украіна і Малдова дэманструюць высокую матывацыю і намаганні, каб наблізіцца да ЕС, і Прага павінна дапамагчы ім у гэтым.
«Наша дапамога не матываваная чыстым альтруізмам і тым, што гэта добра. У нашых уласных інтарэсах дапамагчы гэтым краінам наблізіцца да нас як мага бліжэй, таму што імперыялістычная палітыка Масквы зноў скрыгоча на іх зубамі», — дадаў Ліпаўскі.
Цяпер чытаюць
Ціханоўская: Дзеці не пераехалі ў ЗША, а проста часова будуць з татам дзеля бяспекі21
Каментары