З турмы ў Эквадоры прапаў вядомы мафіёзі. І ў краіне абвясцілі надзвычайнае становішча
Адольфа Масіяс Вільямар па мянушцы Фіта сядзеў ужо 12 гадоў і пры гэтым узначальваў магутную мафіёзную групоўку.
З камеры ў эквадорскай турме знік лідар злачыннай групоўкі, якую, у прыватнасці, падазраюць у забойстве кандыдата ў прэзідэнты краіны. У краіне абвешчана надзвычайнае становішча тэрмінам на два месяцы, піша Бі-бі-сі.
44-гадовы Адольфа Масіяс Вільямар па мянушцы Фіта сядзеў ужо 12 гадоў і пры гэтым узначальваў магутную мафіёзную групоўку «Лос Чанерас» («людзі з горада Чоне»). Камера Вільямара знаходзіцца ў той частцы турмы ў горадзе Гуаякіль, якая тэарэтычна павінна ахоўвацца асабліва старанна.
Прэзідэнт Эквадора Даніэль Набоа абвясціў надзвычайнае становішча тэрмінам на 60 дзён, якое прадугледжвае, у прыватнасці, часовую забарону на публічныя сходы і каменданцкую гадзіну.
Па словах прэзідэнта Набоа, рэжым надзвычайнага становішча дазволіць вайскоўцам і паліцыі ўзяць пад прамы кантроль турмы краіны.
«Лос Чанерас» фактычна кантралююць большую частку рэгіянальнай турмы ў Гуаякіле, дзе сядзеў Фіта.
«Наркатэрарыстычныя групоўкі хочуць запалохаць нас і думаюць, што мы саступім іх патрабаванням, — заявіў прэзідэнт Набоа. — Але мы не будзем весці перамовы з тэрарыстамі і мы не супакоімся, пакуль не адновім мір у краіне».
35-гадовы Даніэль Набоа перамог на прэзідэнцкіх выбарах у кастрычніку мінулага года, менш за тры месяцы таму. Падчас перадвыбарчай кампаніі быў забіты адзін з кандыдатаў, былы журналіст і змагар з мафіяй Фернанда Вільявісенсіа, і ў датычнасці да гэтага забойства падазраюць «Лос Чанерас» і асабіста Фіта, які пагражаў палітыку.
Як тлумачыць эквадорская паліцыя, адсутнасць Фіта ў камеры было выяўлена ў нядзелю. Яго шукалі па ўсім крыле турмы, што вельмі строга ахоўваецца, але так і не знайшлі.
Пакуль не ясна, збег Фіта ці ж хаваецца дзесьці на тэрыторыі вялікага турэмнага комплексу. Калі менавіта Фіта знік з камеры, паліцыя таксама не ведае.
Па словах начальніка паліцыі, Фіта шукалі і шукаюць сотні паліцэйскіх.
Рэгіянальная турма (La Regional) з'яўляецца складовай часткай турэмнага комплексу, у які ўваходзяць пяць папраўчых устаноў. У іх сядзяць больш за 12 тысяч зняволеных.
У мінулым жніўні Фіта перавялі ў іншую турму комплексу, La Roca. Яна лічыцца больш надзейнай, бо там менш зняволеных.
Перавод Фіта быў цэлай вайсковай аперацыяй з удзелам некалькіх тысяч салдат.
Але неўзабаве адвакат Фіта падаў апеляцыю на яго перавод і выйграў яе, пасля чаго мафіёзі вярнулі ў La Regional.
Фіта аднойчы ўжо збег з гэтага турэмнага комплексу. У 2013 годзе ён і яшчэ 17 зняволеных выбраліся з La Roca і на лодках перабраліся праз раку, якая служыць мяжой комплексу.
Праз чатыры месяцы Фіта разам з братам, таксама членам «Лос Чанерас», злавілі ў доме іх маці ў горадзе Манта.
З тых часоў Фіта турму не пакідаў. Пры гэтым лідарам групоўкі ён стаў у зняволенні, у 2020 годзе, пасля забойства папярэдняга верхавода Хорхе Луіса Самбрана.
«Лос Чанерас» займаюцца ў асноўным наркагандлем і рэкетам і супрацоўнічаюць з магутным мексіканскім картэлем Сіналоа.
Байпол назваў імёны магчымых забойцаў Андрэя Зельцэра. І заявіў, што сілавіка «Нірвану застрэліў свой жа1
Каментары