Што ў адміністрацыі прэзідэнта РФ думаюць пра «Поўдзень супраць Пуціна»? Колькі працэнтаў «намалююць» Пуціну? А колькі набярэ Даванкоў? Піша «Медуза».
У Крамлі лічаць, што нягледзячы на смерць Аляксея Навальнага і вайну, перадвыбарная кампанія «прайшла больш-менш роўна».
Па задумцы Крамля, на гэтых выбарах (яны пройдуць 15-17 сакавіка) Уладзімір Пуцін павінен прадэманстраваць «рэкордныя вынікі» — і набраць больш за 80%. Падчас папярэдняга галасавання ў 2018 годзе Пуцін, паводле афіцыйных звестак, атрымаў 76,69% галасоў.
Паводле ацэнкі крыніц, блізкіх да АП, другое месца можа заняць Уладзіслаў Даванкоў — кандыдат ад партыі «Новыя людзі», за якога пасля зняцця Барыса Надзеждзіна і Кацярыны Дунцовай заклікаюць галасаваць многія расійскія апазіцыянеры.
Суразмоўцы «Медузы», блізкія да Крамля, падкрэслілі: у АП былі «некаторыя асцярогі», што Даванкоў можа «прыцягнуць на сябе дадатковы [пратэсны электарат]», — але ў выніку ўсё склалася шчасна для прэзідэнцкай адміністрацыі і кандыдат «не стаў выходзіць за сцяжкі».
Паводле ацэнкі крыніц «Медузы», рэйтынг Даванкова «не выклікае асцярог» у Крамля: ВЦИОМ дае яму 6%, а Russian Field — 7,4%. У АП упэўненыя, што выніковыя паказчыкі кандыдата наўрад ці будуць сурʼёзна адрознівацца ад гэтых лічбаў, — і гэты сцэнар цалкам задавальняе Крэмль.
Блізкі знаёмы Даванкова, які паразмаўляў з «Медузай» на ўмовах ананімнасці, адзначыў: паводле ўнутраных звестак перадвыбарчага штаба палітыка, ён сапраўды павінен заняць другое месца, аднак там асцерагаюцца, што на ўчастках выбаршчыкі могуць проста не ўзгадаць прозвішча кандыдата, малавядомага да пачатку кампаніі.
Першапачаткова ў Крамлі хацелі, каб другое месца заняў лідар ЛДПР Леанід Слуцкі: ва ўнутрыпалітычным блоку АП даўно спадзяюцца, што гэтая партыя пазбавіць КПРФ нефармальнага статусу «другой у краіне».
Другое месца вельмі хацеў і сам Слуцкі — яму яно неабходна, каб умацаваць уласныя пазіцыі ў партыі. Аднак, нягледзячы на ўсе намаганні штаба Слуцкага, які пазіцыянуе кандыдата як паўнавартаснага спадчынніка Уладзіміра Жырыноўскага, рэйтынг кандыдата так і не вырас: па даных ВЦИОМ на 8 лютага рэйтынг Слуцкага складаў 4%, на сярэдзіну лютага — 2%, на пачатак сакавіка — 3%.
Калі верыць вынікам апытання Russian Field, трэцім стане кандыдат ад КПРФ Мікалай Харытонаў. Кампанію самога Харытонава ў АП ацэньваюць як «вельмі млявую» — за апошнія месяцы перад выбарамі кандыдат запомніўся толькі вельмі дзіўнымі інтэрвʼю і яшчэ больш дзіўнымі перадвыбарнымі ролікамі.
Што ў Крамлі думаюць пра акцыю «Поўдзень супраць Пуціна»? І ці чакаюць пратэстаў з-за забойства Навальнага?
Смерць Аляксея Навальнага ў АП успрынялі як «негатыўны і непрыемны фактар» для перадвыбарнай кампаніі. Шматтысячныя чэргі на пахаванне і шматдзённае ўскладанне кветак на магілу палітыка крыніцы «Медузы» з ліку «расійскіх эліт» назвалі «непазбежным злом». Пры гэтым у Крамлі ўпэўненыя, што значнага ўплыву на ход выбараў усё гэта не акажа: адзін з суразмоўцаў «Медузы», блізкіх да АП, спасылаючыся на апытанне «Левада-Цэнтра», указаў, што «негатыўныя эмоцыі» з-за смерці Навальнага зведала менш за 20% расіян.
Як запэўніваюць крыніцы «Медузы», акцыю апазіцыянераў «Поўдзень супраць Пуціна» ў Крамлі таксама не лічаць сурʼёзнай праблемай — і маштабных пратэсных выступаў па яе выніках не чакаюць.
«Напэўна, на нейкіх участках у Маскве ці іншым горадзе-мільённіку нешта заўважнае будзе. Але па Расіі ў цэлым — не. І зноў жа — кагосьці здзівіць, што ў буйных гарадах ёсць нейкія сотні ці нават тысячы апазіцыянераў на ўвесь мільённы горад? Не, не здзівіць», — падкрэсліў адзін з суразмоўцаў.
У Крамлі ўпэўненыя, што на галоўны для АП вынік выбараў — працэнт за Пуціна — акцыя прыкметнага ўплыву не акажа. Па задуме прэзідэнцкай адміністрацыі, усе намаганні апазіцыі перакрые мабілізацыя бюджэтнікаў і супрацоўнікаў буйных кампаній, блізкіх да дзяржавы, а таксама шматдзённае і дыстанцыйнае галасаванне (яго вынікі лёгка сфальсіфікаваць і практычна немагчыма праверыць).
Паліттэхнолаг, які працуе з АП, у размове з «Медузай» ахарактарызаваў мінулую кампанію як «добра аформленую сімуляцыю» — якая, на яго думку, прывядзе да вынікаў галасавання, якія прыкладна «адпавядаюць агульнаму настрою расіян».
Цяпер чытаюць
Брат беларускай каралевы прыгажосці трапіў у рэанімацыю ў Азербайджане6
Каментары