У Варшаве развітваюцца са згвалтаванай і забітай беларускай. На пахаванні быў Пазняк з жонкай ФОТА
На варшаўскія Паўночныя могілкі (Cmentarz Północny) развітацца з трагічна загінулай Лізай Герцэн прыйшлі дзясяткі людзей.
У многіх у руках белыя кветкі.
На пахаванні распавялі, што дзяцінства Лізы не было простым: разам з братам Артурам яны раслі ў доме, поўным канфліктаў, гвалту, без стабільнасці. У ім «дарослыя не давалі рады сваім абавязкам».
У горшыя моманты яны падтрымлівалі адно аднаго тым, што сядалі піць разам гарбату і марылі пра сваю ідэальную будучыню: «з лядоўняй, поўнай смачных прадуктаў, з каханымі побач, з утульнымі, чыстымі дамамі, поўнымі раслін на падваконнях».
Свае мары Ліза шмат у чым змагла рэалізаваць з Данілам, украінцам, з якім яна пазнаёмілася пасля эміграцыі ў Польшчу.
Як яны пазнаёміліся?
Была восень 2020 года, кавідны час. Усе публічныя месцы, у тым ліку трэнажорныя залы, былі зачыненыя. Таму Даніла займаўся спортам у сваім пакоі, які здымаў на першым паверсе шматпавярховіка, і ўбачыў Лізу — суседку, што жыла вышэй. Яна запаліла цыгарэту. Даніла згадвае, што гэта яму не спадабалася, але яму спадабалася Ліза.
Дзяўчына вельмі любіла вандраваць (асабліва яе захапляла мора), гатаваць, пякла торты. А яшчэ яна абажала дарыць падарункі. Даведаўшыся, што Даніла марыць навучыцца граць на гітары, яна знайшла яму настаўніка і арганізавала яго першы хатні канцэрт.
Пра што марыла дзяўчына? У сваім дзённіку яна апісвала гэта так:
«Жыве ў Парыжы, разам з хлопцам, які кахае і падтрымлівае яе. Таксама з ёй жыве малодшая сястра з Беларусі. Яна кіруе ўласнай машынай, мае бізнэс, які квітнее і дазваляе ёй вандраваць па ўсім свеце».
На пахаванні таксама распавялі, што пасля смерці Ліза паспела прыйсці ў сны да некаторых блізкіх і знаёмых — да брата, маці Данілы і сваіх кліентак.
У сне брата Артура яна распавяла, што падчас гвалтавання не паспела адчуць пакуты: адразу ж адключылася. Праз хвіліну пасля атакі яна апынулася зусім ў іншым месцы, дзе было спакойна: Ліза пакінула сваё цела, яе там не было.
Нагадаем, 25-гадовую беларуску Лізу згвалтавалі ў цэнтры Варшавы 25 лютага. У выніку ўдушша дзяўчына перанесла гіпаксію галаўнога мозгу. Медыкі змагаліся за яе жыццё, але 1 сакавіка яна памерла, не прыходзячы ў прытомнасць.
Па падазрэнні ў згвалтаванні і забойстве цяпер праходзяць следчыя дзеянні з 23-гадовым жыхаром Варшавы Дарыянам С. Па мясцовым заканадаўстве яму можа пагражаць пажыццёвае зняволенне.
«Яе звалі Ліза». У Варшаве прайшоў Марш у памяць аб згвалтаванай і забітай беларусцы РЭПАРТАЖ
«Мне пашчасціла. А Лізе — не». Пасля смерці беларускі ў Варшаве ў сеціве шырыцца хэштэг #хопіцьгвалціць — вось што пішуць
Грошы, якія ахвяравалі на рэабілітацыю згвалтаванай у Варшаве беларускі, вяртаюцца на рахункі. Але запушчаны новы збор
«Для вас ён звер, а для мяне сын». Бацька гвалтаўніка, які забіў беларуску, пракаментаваў трагедыю і выклікаў абурэнне
Каментары