Японская медыякарпарацыя Nikkei Asia пры дапамозе аб'яднання былых беларускіх сілавікоў «Белпол» выявіла схему паставак з Кітая ў Беларусь дэталяў для ракет і бомбаў, якія потым выкарыстоўваюцца расійскай арміяй супраць Украіны.
«БелОМА» і «Пеленг» атрымліваюць ад кітайскіх кампаній тысячы кампанентаў для модуляў лазернага навядзення ракет і бомбаў, якія потым Расія скідае на Украіну. Пра гэта паведамляе буйное японскае агенцтва Nikkei Asia, якое ладзіла расследаванне сумесна з ініцыятывай «Белпол».
Паводле расследавання, 1 снежня 2023 года кітайская кампанія Green Cycle Energy атрымала ад беларускага абароннага падрадчыка «БелОМА» заказ на пастаўку 3000 кампанентаў для лазернага модуля LAD-21T. Гэты найноўшы модуль ужываецца ў бомбах і ракетах з лазерным навядзеннем.
Плацёж па дадзенай угодзе быў зроблены ў юанях. У аперацыі ўдзельнічаў шанхайскі філіял расійскага дзяржаўнага банка ВТБ. Потым ужо 16 лютага гэтага года Green Cycle Energy і «БелОМА» падпісалі новы кантракт на суму яшчэ 5,56 мільёна юаняў (764 тысячы даляраў) на закупку ўсё тых жа кампанентаў.
Яшчэ адна кітайская кампанія Morotack Technology 1 лютага падпісала з рагачоўскім заводам «Дыяпраектар» (належыць холдынгу «БелОМА») кантракт на пастаўку 200 адзінак камплектуючых, званых «фланцамі», якія таксама важныя для сістэм навядзення. Сума здзелкі склала 114 тысяч юаняў (15,5 тысячы даляраў), аперацыю праводзілі беларускія і кітайскія банкі.
2 мая «Дыяпраектар» ізноў заказаў гэтыя дэталі ў Morotack Technology.
Акрамя таго, як паведамляе Nikkei Asia, «Дыяпраектар» 20 лютага і 20 сакавіка атрымліваў шматлікія кітайскія лазерныя кампаненты ад расійскай кампаніі Precision Laser Systems на суму амаль 500 тысяч даляраў. Далей беларускі завод перадаваў іх «Пеленгу», а той ужо перадаваў створаныя модулі навядзення і прыцэлы расійскай арміі.
Цяпер чытаюць
Хто той рэдактар беларускай Вікіпедыі, якога пасадзілі на два гады за «дыскрэдытацыю Беларусі»23
Каментары