Беларускія навукоўцы аднаўляюць папуляцыю рэдкай рыбы кумжы, якая занесена ў Чырвоную кнігу. Пра гэта паведаміў 21 мая намеснік гендырэктара па навуковай інавацыйнай працы Навукова-практычнага цэнтра НАН па біярэсурсах Павел Гештаўт, піша агенцтва «Мінск-Навіны».
Кумжа — гэта ласосевая рыба, якая прыходзіць у беларускія рэкі на нераст. Каб павялічыць яе колькасць, вучоныя выпусцілі каля 3000 падрослых малькоў у чатыры ўчасткі ракі Нарачанкі. Рыбу выгадавалі ў рыбным гадавальніку «Скок» з ікры, якую атрымалі спецыялісты цэнтра НАН.
Павел Гештаўт таксама нагадаў, што ўжо каля дзесяці гадоў у Беларусь прыходзіць на нераст і сёмга. Такія месцы строга ахоўваюцца дзяржавай і валанцёрамі. Лавіць там рыбу забаронена: за парушэнне прыродаахоўнага заканадаўства прадугледжаныя вялікія штрафы, а ў некаторых выпадках нават крымінальная адказнасць.
Навуковец падкрэсліў, што да прыроды трэба ставіцца з павагай, бо яна — наша агульная каштоўнасць. Калі ж каму-небудзь выпадкова трапіць на вуду рэдкая рыбіна, лепш яе адразу выпусціць назад у ваду.
Каментары